 |
ການແຂ່ງຂັນກິລາລົດຖີບ ນະຄອນຫຼວງວຽງຈັນ ເກມ 2025 ຈັດຂຶ້ນ ລະຫວ່າງວັນທີ 17-20 ພະຈິກ 2025 ມີການຊີງໄຊທັງໝົດ 9 ຫຼຽນຄຳ, ຊຶ່ງໃນວັນທີ17 ພະຈິກຜ່ານມາ ກໍມີການຊີງໄຊ 4 ຫຼຽນຄຳ ຈາກປະເພດໄລຍະທາງໄກ ໄຄຣທິລຽມ ຈັບເວລາບຸກຄົນຊາຍ-ຍິງ ປະເພດລົດກວັກ ແລະ ລົດວິບາກ, ໃນນັ້ນ ມີຊີງໄຊ 3 ລາຍການຊາຍ ແລະ 1 ລາຍການຍິງ, ຜ່ານການແຂ່ງຂັນຜົນປະກົດວ່າ:
ໄຄຣທິລຽມ ຈັບເວລາບຸກຄົນຊາຍ ໄລຍະ 30 ກິໂລແມັດ ປະເພດລົດວິບາກ ມີນັກກິລາເຂົ້າຮ່ວມ 12 ຄົນ ຈາກ 5 ແຂວງ ແລະ ເຈົ້າພາບ ນະຄອນຫຼວງວຽງຈັນເຂົ້າຮ່ວມ. ຜົນການແຂ່ງຂັນ ຫຼຽນຄຳ ເປັນຂອງ ທ້າວ ຖາວອນ ພົນອາສາ ຈາກນະຄອນຫຼວງວຽງຈັນ, ຫຼຽນເງິນ ເປັນຂອງທ້າວ ອານັນໄຊ ມີລາກົງ ນະຄອນຫຼວງວຽງຈັນ ແລະ ຫຼຽນທອງ ເປັນຂອງທ້າວ ອະພິຊາດ ສຸດທະວິໄລ ຈາກແຂວງບໍ່ແກ້ວ.
ສຳລັບ ລາຍການ ໄຄຣທິລຽມ ຈັບເວລາບຸກຄົນຊາຍ ໄລຍະ 30 ກິໂລແມັດ ປະເພດລົດກວັກ ມີນັກກິລາເຂົ້າຮ່ວມ 14 ຄົນ ຈາກ 6 ແຂວງ ແລະ ເຈົ້າພາບ ນະຄອນຫຼວງວຽງຈັນເຂົ້າຮ່ວມ.ຜນການແຂງຂັນ, ຫຼຽນຄຳ ເປັນຂອງທ້າວ ບຸນປະເສີດ ຈັນທະພາລີ ນະຄອນຫຼວງວຽງຈັນ, ຫຼຽນເງິນເປັນຂອງທ້າວ ສົມພະໄທ ອິນມາລາ ຈາກແຂວງວຽງຈັນ ແລະ ຫຼຽນທອງເປັນຂອງທ້າວ ເທບພະວົງ ພັນທະວົງ ຈາກແຂວງຄຳມ່ວນ.
ສ່ວນລາຍການ ໄຄຣທິລຽມ ຈັບເວລາບຸກຄົນຊາຍ ໄລຍະ 44 ກິໂລແມັດ ປະເພດລົດກວັກ ມີນັກກິລາເຂົ້າຮ່ວມ 9 ຄົນ ຈາກ 4 ແຂວງ ແລະ ເຈົ້າພາບ ນະຄອນຫຼວງວຽງຈັນເຂົ້າຮ່ວມ, ຫຼຽນຄຳ ເປັນຂອງທ້າວ ອາລິຍາ ພູນສະຫວັດ ນະຄອນຫຼວງວຽງຈັນ, ຫຼຽນເງິນ ເປັນຂອງທ້າວພຸດທະສອນ ອິນທະມິດ ນະຄອນຫຼວງວຽງຈັນ ແລະ ຫຼຽນທອງ ເປັນຂອງທ້າວ ເທບພະສິດ ພົມສຸວັນ ຈາກແຂວງອຸດົມໄຊ.
ໃນຂະນະທີ່ ລາຍການ ໄຄຣທິລຽມ ຈັບເວລາບຸກຄົນຍິງ ໄລຍະ 25 ກິໂລແມັດ ປະເພດລົດກວັກ ມີນັກກິລາເຂົ້າຮ່ວມ 9 ຄົນ ຈາກ 4 ແຂວງ ແລະ ເຈົ້າພາບ ນະຄອນຫຼວງວຽງຈັນເຂົ້າຮ່ວມ, ຫຼຽນຄຳ ເປັນຂອງນາງ ຕຸກຕາ ອິນທະວົງ ນະຄອນຫຼວງວຽງຈັນ, ຫຼຽນເງິນ ເປັນຂອງນາງ ໂບຕັນ ວິໄຊ ຈາກແຂວງຄຳມ່ວນ ແລະ ຫຼຽນທອງ ເປັນຂອງນາງ ຈັນທະໜອມ ໄຊຍະຈັກ ຈາກແຂວງຄຳມ່ວນ.
ຄໍາເຫັນ