ເຈົ້າພາບເຕະຈຸດໂທດເອົາຊະນະນະຄອນຫຼວງວຽງຈັນ

ທີ່ສະໜາມກິລາແຂວງສາລະວັນໂດຍມີຜູ້ຊົມເຂົ້າຮ່ວມຮັບຊົມຢ່າງຫຼວງຫຼາຍ.
ທີມເຕະບານຊາຍເຈົ້າພາບ ແຂວງສາລະວັນ ບໍ່ເຮັດໃຫ້ລູກຫຼານອົງແກ້ວອົງກົມມະດຳຜິດຫວັງທີ່ຫຼັ່ງໄຫຼເຂົ້າມາຊົມມາເຊຍກັນເຕັມອັດສະຈັນ ດ້ວຍການເຕະຈຸດໂທດສາມາດຊະນະ ທີມນະຄອນຫຼວງວຽງຈັນ ໄປໄດ້ 5-3 ປະຕູ, ຫຼັງຈົບເກມ90 ນາທີ ທັງສອງທີມໄດ້ພຽງສະເໝີກັນ 1-1ປະຕູເຮັດໃຫ້ເຈົ້າພາບ ຜ່ານເຂົ້າສູ່ຮອບຕັດເຊືອກ ຫຼື ຮອບຮອງຊະນະເລີດ ໄປພົບກັບ ແຂວງສະຫວັນນະເຂດ ທີ່ເອົາຊະນະເຕະຈຸດໂທດ ແຂວງບໍ່ແກ້ວມາໄດ້ 5-4 ປະຕູ (ໃນເວລາປົກກະຕິສະເໝີກັນ 1-1).
ສ່ວນຜົນການແຂ່ງຂັນອີກຄູ່ໃນວັນດຽວກັນ ທີ່ສະໜາມກິລາ ມສ ຊົນເຜົ່າແຂວງສາລະວັນ, ແຂວງອັດຕະປື ເຕະຈຸດໂທດເອົາຊະນະ ແຂວງຫຼວງພະບາງ 10-9 ຜ່ານເຂົ້າສູ່ຮອບຮອງຊະນະເລີດ ໄປພົບກັບ ແຂວງຄຳມ່ວນ.
ສຳລັບຕາຕະລາງການແຂ່ງຂັນເຕະບານຊາຍ ໃນງານມະຫະກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VII ຮອບຊີງຊະນະເລີດ ຈະມີຂຶ້ນໃນວັນທີ 19 ທັນວາ 2024 ທີ່ສະໜາມກິລາໃໝ່ຂອງແຂວງສາລະວັນ ເລີ່ມເວລາ 13:00 ໂມງເປັນຕົ້ນໄປ.
(ຂ່າວ - ພາບ: ບຸນອູ້ມ)