ຈັດພິທີເລີ່ມອອກອາກາດສາລະຄະດີ “ຄວາມຜູກພັນດ້ານວັດທະນະທຳຂອງທ່ານ ສີຈິ້ນຜິງ” ຢູ່ນະຄອນຫຼວງວຽງຈັນ

ເນື້ອໃນສານຊົມເຊີຍໄດ້ຂຽນບາງຕອນສຳຄັນວ່າ: ສາລະຄະດີເລື່ອງດັ່ງກ່າວເປັນການສະຫຼຸບທາງດ້ານທິດສະດີແລະ ພຶດຕິກໍາຕົວຈິງທີ່ສະແດງໃຫ້ເຫັນເຖິງວິໄສທັດອັນກວ້າງໄກ, ປັດຊະຍາການບໍລິຫານປະເທດທີ່ຕິດພັນກັບການອະນຸລັກມໍລະດົກທາງດ້ານວັດທະນະທໍາ, ຈິດໃຈຮັກຊາດອັນດູດດື່ມ ແລະ ຄວາມຮັກອັນເລິກເຊິ່ງຂອງປະທານ ສີຈິ້ນຜິງ ທີ່ມີຕໍ່ວັດທະນະທໍາພື້ນເມືອງທີ່ເກົ່າແກ່ຂອງຈີນ, ທັງສະແດງໃຫ້ເຫັນອະລິຍະທໍາຈີນທີ່ມີປະຫວັດສາດຍາວນານກວ່າ 5,000 ປີ ຊຶ່ງເປັນຮາກເຫງົ້າ ແລະ ພະລັງແຮງທີ່ຍືນຍົງໃນການຂັບເຄື່ອນໃຫ້ ສປ ຈີນ ບັນລຸຄວາມໃຝ່ຝັນແຫ່ງການຟື້ນຟູຄວາມຈະເລີນຮຸ່ງເຮືອງອັນຍິ່ງໃຫຍ່ຂອງປະຊາຊາດຈີນ ຊຶ່ງເປັນບົດຮຽນທີ່ດີເລີດໃຫ້ແກ່ ສປປ ລາວ ພວກຂ້າພະເຈົ້າໃນການປົກປັກຮັກສາ, ເສີມຂະຫຍາຍຄຸນຄ່າທາງດ້ານວັດທະນະທໍາທີ່ເປັນເອກະລັກຂອງຊາດໄປຄຽງຄູ່ກັບການພັດທະນາເສດຖະກິດ-ສັງຄົມ ແລະ ຊຸກຍູ້ພາລະກິດແຫ່ງການສ້າງສັງຄົມນິຍົມຢູ່ ສປປ ລາວ.

ໃນພິທີຍັງໄດ້ຮັງຟັງຄຳເຫັນຂອງທ່ານ ເຊີ້ນໄຫຊົງ ຮອງຫົວໜ້າຄະນະໂຄສະນາອົບຮົມສູນກາງພັກກອມມູນິດຈີນ ຜູ້ອໍານວຍການໃຫຍ່ວິທະຍຸໂທລະພາບສູນກາງຈີນ ຫຼື CMG ທີ່ໄດ້ກ່າວຄຳປາໄສຜ່ານທາງວີດີໂອ. ໃຫ້ກຽດເຂົ້າຮວ່ມໃນພິທີຝ່າຍລາວມີທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ. ທ່ານ ວັນສີ ກົວມົວ ຮອງຫົວໜ້າ ຄອສພ, ທ່ານ ລາວປາວຊົ່ງ ນະວົງໄຊ ຮອງປະທານສູນກາງແນວລາວສ້າງຊາດ, ຝ່າຍຈີນມີທ່ານ ຫວາງຊ້າງ ອຸປະທູດຊົ່ວຄາວຂອງສະຖານທູດຈີນປະຈໍາລາວພ້ອມດ້ວຍການນຳ, ອະດີດການນຳ, ລວມເຖິງຜູ້ຕາງໜ້າຈາກພາກສ່ວນຕ່າງໆ, ສື່ມວນຊົນ, ຊາວຈີນ ແລະ ຈີນຕ່າງດ້າວລວມທັງໝົດ 200 ກວ່າທ່ານເຂົ້າຮ່ວມ.

ທ່ານ ເຊີ້ນໄຫຊົງ ກ່າວວ່າ: ປີນີ້ເປັນປີແຫ່ງການສ້າງຕັ້ງສາຍພົວພັນທາງການທູດຈີນ-ລາວ ຄົບຮອບ 65 ປີ, ທັງເປັນ “ປີມິດຕະພາບຈີນ-ລາວ” ທີ່ຜູ້ນຳສອງພັກສອງລັດຈີນ-ລາວ ໄດ້ຮ່ວມກັນຈັດຂຶ້ນ. ພາຍໃຕ້ການນຳພາດ້ານຍຸດທະສາດຂອງທ່ານ ສີຈິ້ນຜິງ ແລະ ທ່ານ ທອງລຸນ ສີສຸລິດ, ການພົວພັນຈີນ-ລາວ ແລະ ການສ້າງຄູ່ຮ່ວມຊາຕາກຳຈີນ-ລາວ, ລາວ-ຈີນ ໄດ້ຂະຫຍາຍຕົວເຂົ້າສູ່ລວງເລິກ ແລະ ເປັນຮູບປະທຳຢ່າງບໍ່ຢຸດຢັ້ງ, ໄດ້ຮັບໝາກຜົນ ແລະ ຄວາມຄືບໜ້າໃໝ່ຫຼາຍຢ່າງ, ທັງໄດ້ສ້າງຜົນປະໂຫຍດຕົວຈິງໃຫ້ແກ່ປະຊາຊົນສອງຊາດ. ສາລະຄະດີ 3 ເລື່ອງທີ່ພວກເຮົານຳສະເໜີໃນຄັ້ງນີ້ປະກອບດ້ວຍ “ຄວາມຜູກພັນດ້ານວັດທະນະທຳຂອງທ່ານ ສີຈິ້ນຜິງ”, “ການນຳພາທີ່ໂດດເດັ່ນ” ແລະ “ແນວຄິດໃໝ່ຈາກຕຳລາບູຮານ”, ຊຶ່ງໄດ້ສະແດງໃຫ້ເຫັນຢ່າງມີຊີວິດຊີວາເຖິງການຄົ້ນຄິດອັນເລິກເຊິ່ງ ຂອງຜູ້ນຳຈີນກ່ຽວກັບການສືບສານ ແລະ ພັດທະນາອະລິຍະທຳຈີນ, ພ້ອມທັງນຳສະເໜີພຶດຕິກຳຕົວຈິງອັນຍິ່ງໃຫຍ່ ຂອງຄວາມທັນສະໄໝແບບຈີນຢ່າງໜ້າປະທັບໃຈ, ໄດ້ເປີດປ່ອງຢ້ຽມໃຫ້ແກ່ປະຊາຊົນລາວຮັບຮູ້ ແລະ ເຂົ້າໃຈແນວຄິດການບໍລິຫານປະເທດຂອງ ທ່ານ ສີຈິ້ນຜິງ, ຊ່ວຍໃຫ້ທຸກທ່ານໄດ້ເຂົ້າໃຈວັດທະນະທຳຈີນ, ສະຕິປັນຍາຈີນ ແລະ ຈິດໃຈຈີນໃຫ້ດີຂຶ້ນ, ທັງເປັນການຮັບຮູ້ເຖິງມົນສະເໜ່ທີ່ມີເອກະລັກພິເສດຂອງຈີນໃນຍຸກໃໝ່. CMG ຍິນດີຮ່ວມກັບບັນດາເພື່ອນມິດໃນທຸກຂະແໜງການຂອງລາວ ຮຽນຮູ້ ແລະ ຖອດຖອນບົດຮຽນຊຶ່ງກັນ ແລະ ກັນ,ຈັບມືກັນກ້າວໄປຂ້າງໜ້າ, ປະກອບສ່ວນເຂົ້າໃນການສ້າງຄູ່ຮ່ວມຊາຕາກຳຈີນ-ລາວ, ລາວ-ຈີນ ທີ່ມີມາດຕະຖານສູງ, ຄຸນນະພາບສູງ ແລະ ລະດັບສູງ.

ທ່ານ ວັນສີ ກົວມົວ ກ່າວວ່າ: ການອອກອາກາດສາລະຄະດີໃນຄັ້ງນີ້ຖືເປັນໂອກາດດີອີກຄັ້ງໜຶ່ງທີ່ຈະເຮັດໃຫ້ປະຊາຊົນລາວໄດ້ຮັບຮູ້ກ່ຽວກັບວັດທະນະທໍາກໍຄືຜົນສໍາເລັດໃນການສ້າງສາພັດທະນາປະເທດຈີນຫຼາຍຂຶ້ນ, ເຮັດໃຫ້ພວກເຮົາຮັບຮູ້ກ່ຽວກັບສະຕິປັນຍາດ້ານການບໍລິຫານປະເທດ, ຄວາມຜູກພັນດ້ານວັດທະນະທຳຂອງຜູ້ນຳຈີນ, ກໍຄື ໝາກຜົນອັນອຸດົມສົມບູນແຫ່ງຄວາມທັນສະໄໝແບບຈີນຢ່າງຈະແຈ້ງກວ່າເກົ່າ ແລະ ເຂົ້າໃຈແນວຄິດ ສີຈິ້ນຜິງ ກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຢ່າງຮອບດ້ານກວ່າເກົ່າ.

ທ່ານ ຫວາງຊ້າງ ກ່າວວ່າ: ວັດທະນະທຳເປັນຈິດວິນຍານຂອງປະເທດໜຶ່ງ ແລະ ຊົນຊາດໜຶ່ງ. ສາລະຄະດີເລື່ອງ “ຄວາມຜູກພັດດ້ານວັດທະນະທຳຂອງທ່ານ ສີຈິ້ນຜິງ” ທີ່ໄດ້ຄັດເລືອກເລື່ອງລາວທີ່ມີຊີວິດຊີວາຂອງທ່ານ ສີຈິ້ນຜິງ ໃນການເອົາໃຈໃສ່ການສືບທອດ ແລະ ພັດທະນາວັດທະນະທຳໄດ້ນຳສະເໜີຢ່າງຮອບດ້ານກ່ຽວກັບຄວາມພະຍາຍາມໃນການຊອກຫາແຫຼ່ງທີ່ມາຂອງອະລິຍະທຳ ແລະ ການອະນຸລັກມໍລະດົກວັດທະນະທຳຂອງຈີນໃນຍຸກໃໝ່, ໃຫ້ເພື່ອນມິດລາວສາມາດສຳຜັດໂດຍກົງເຖິງປະຫວັດສາດອັນຍາວນານ, ເນື້ອໃນອັນເລິກເຊິ່ງ ແລະ ລັກສະນະເປີດກວ້າງ ແລະ ກວມລວມຂອງອະລິຍະທຳຈີນ, ພ້ອມທັງເຂົ້າໃຈເສັ້ນທາງການພັດທະນາ ແລະ ເຫດຜົນການພັດທະນາຂອງຈີນໃນຍຸກໃໝ່. ຈີນຍິນດີຮ່ວມກັນກັບລາວຖືເອົາຄວາມຮັບຮູ້ທີ່ເປັນເອກະພາບກັນອັນສຳຄັນຂອງຜູ້ນຳສູງສຸດສອງພັກສອງລັດຈີນ-ລາວເປັນຫຼັກການ, ຮ່ວມກັນຈັດຕັ້ງປະຕິບັດຂໍ້ລິເລີ່ມອະລິຍະທຳທົ່ວໂລກ, ສືບຕໍ່ລົງເລິກການແລກປ່ຽນໃນຂົງເຂດວັດທະນະທຳເຊັ່ນ: ສື່ມວນຊົນ, ວັດທະນະທຳ ແລະ ການທ່ອງທ່ຽວເປັນຕົ້ນ, ສົ່ງເສີມການເຊື່ອມສານຈິດໃຈລະຫວ່າງປະຊາຊົນສອງຊາດ, ຊຸກຍູ້ໃຫ້ອະລິຍະທຳຈີນ ແລະ ອະລິຍະທຳລ້ານຊ້າງພັດທະນາແບບເຊື່ອມໂຍງເຂົ້າກັນໃຫ້ມີຄວາມສະຫງ່າລາສີຫຼາຍຍິ່ງຂຶ້ນ.

ນັບແຕ່ວັນທີ 1 ມິຖຸນານີ້ເປັນຕົ້ນໄປ, ສາລະຄະດີ 3 ເລື່ອງ ຄື: “ຄວາມຜູກພັນດ້ານວັດທະນະທໍາຂອງທ່ານ ສີຈິ້ນຜິງ” “ການນຳພາທີ່ໂດດເດັ່ນ” “ແນວຄິດໃໝ່ຈາກຕຳລາບູຮານ” ທີ່ຜະລິດໂດຍ CMG ໄດ້ເລີ່ມອອກອາກາດຜ່ານສື່ມວນຊົນຕົ້ນຕໍຂອງລາວ ເຊັ່ນ: ໂທລະພາບແຫ່ງຊາດລາວ, ໜັງສືພິມປະຊາຊົນ, ຂ່າວສານປະເທດລາວ, ວິທະຍຸກະຈາຍສຽງແຫ່ງຊາດລາວ ແລະ ໂທລະພາບນະຄອນຫຼວງວຽງຈັນ. “ຄວາມຜູກພັນດ້ານວັດທະນະທຳຂອງທ່ານ ສີຈິ້ນຜິງ” ໄດ້ສະແດງໃຫ້ເຫັນຢ່າງມີຊີວິດຊີວາເຖິງຄວາມຄິດອັນເລິກເຊິ່ງຂອງທ່ານປະທານ ສີຈິ້ນຜິງ ຕໍ່ການພັດທະນາ ແລະ ສືບທອດວັດທະນະທຳປະຊາຊາດຈີນ, ໄດ້ບັນລະຍາຍເນື້ອໃນທີ່ສຳຄັນຂອງແນວຄິດວັດທະນະທຳ ສີຈິ້ນຜິງ ແລະ ພື້ນຖານດ້ານວັດທະນະທຳທີ່ໜັກແໜ້ນຂອງແນວຄິດການປົກຄອງປະເທດ ແລະ ການບໍລິຫານການເມືອງຂອງທ່ານປະທານ ສີຈິ້ນຜິງ, ໄດ້ສະແດງໃຫ້ເຫັນຢ່າງມີຊີວິດຊີວາເຖິງທັດສະນະຄຸນຄ່າທີ່ “ວັດທະນະທຳທີ່ຈະເລີນຮຸ່ງເຮືອງຊຸກຍູ້ຊາຕາກຳຂອງຊາດທີ່ຈະເລີນ, ວັດທະນະທຳທີ່ເຂັ້ມແຂງຊຸກຍູ້ຊົນຊາດທີ່ເຂັ້ມແຂງ”. “ການນຳພາທີ່ໂດດເດັ່ນ” (ສະບັບສາກົນ)ໄດ້ສະແດງໃຫ້ເຫັນຢ່າງຮອບດ້ານເຖິງຜົນສໍາເລັດທີ່ຍິ່ງໃຫຍ່ຕ່າງໆທີ່ຈີນໄດ້ຮັບນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເປັນຕົ້ນມາ, ໄດ້ສະແດງໃຫ້ເຫັນເຖິງກຳລັງສັດຈະທໍາທີ່ເຂັ້ມແຂງຂອງແນວຄິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຂອງທ່ານ ສີຈິ້ນຜິງ. “ແນວຄິດໃໝ່ຈາກຕຳລາບູຮານ”ໄດ້ສະແດງຢ່າງມີຊີວິດຊີວາໃຫ້ເຫັນເຖິງເນື້ອໃນຈິດໃຈທີ່ເລິກເຊິ່ງ ແລະ ຄຸນຄ່າດ້ານວັດທະນະທຳຂອງແນວຄິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຂອງທ່ານ ສີຈິ້ນຜິງ.