 |
ທ້າວ ເຈັງຊຶ ໄດ້ໃຫ້ສຳພາດຕໍນັກຂ່າວໜັງສືພິມປະຊາຊົນວ່າ:ນ້ອງມີຄວາມຮູ້ສຶກພູມໃຈຫຼາຍ ທີ່ໄດ້ເຮັດວຽກຢູ່ສູນບຳລຸງຮັກສາປະຈໍາຫຼວງພະບາງ. ມື້ນີ້, ຂໍມາແບ່ງປັນປະສົບການໃນການເຮັດວຽກ, ນ້ອງຮູ້ສຶກວ່າມີການເຕີບໂຕຫຼາຍ ແລະ ມີຄວາມຄືບໜ້າວຽກງານບຳລຸງຮັກສາຂອງສູນທີ່ນ້ອງໄດ້ເຮັດວຽກເປັນເວລາ 4 ປີ ກວ່າແລ້ວ. ພາຍຫຼັງລົດໄຟລາວ-ຈີນເປີດໃຫ້ບໍລິການ, ນ້ອງໄດ້ມີໂອກາດສະໝັກ ແລະ ຜ່ານການສຳພາດ ຊຶ່ງໄດ້ເຂົ້າຮ່ວມໂຄງການລະດັບສາກົນທີ່ເປັນຄວາມຫວັງຂອງປະຊາຊົນສອງຊາດລາວ-ຈີນ.ໃນໄລຍະທຳອິດທີ່ເຂົ້າສູ່ຕຳແໜ່ງງານ, ເມື່ອຕ້ອງປະເຊີນກັບລະບົບເຕັກໂນໂລຊີໃໝ່ໆ ແລະ ອຸປະກອນທີ່ທັນສະໄໝ, ນ້ອງ ແລະ ພະນັກງານລາວຮູ້ສຶກຕື່ນເຕັ້ນ ແລະ ກັງວົນໄປພ້ອມກັນ, ພ້ອມທັງຮູ້ສຶກເຖິງຄວາມຮັບຜິດຊອບສູງ ແລະ ຄວາມກົດດັນໃນການປົກປັກຮັກສາຄວາມປອດໄພຂອງທາງລົດໄຟ.
 |
ໃນຄະນະດຽວກັນ,ທ້າວ ເຈັງຊຶ ຍັງໄດ້ກ່າວວ່າ:ນ້ອງເຄີຍປະສົບກັບອຸປະສັກທາງດ້ານການສື່ສານ. ບັນຫານີ້, ໄດ້ຮັບການປັບປຸງເທື່ອລະກ້າວ,ການປະສານງານພາຍໃນທີມມີຄວາມຄ່ອງແຄ້ວຫຼາຍຂຶ້ນ. ຍ້ອນການຮຽນຮູ້ພາສາຈີນຢ່າງຕັ້ງໜ້າ ແລະ ອາໄສເພື່ອນຮ່ວມງານເປັນຂົວຕໍ່.ຄຽງຄູ່ກັນນັ້ນ, ນ້ອງກໍໄດ້ປັບປຸງຂັ້ນຕອນການເຮັດວຽກຢ່າງຕໍ່ເນື່ອງ, ເພີ່ມທະວີປະສິດທິພາບ ແລະ ຄຸນນະພາບຂອງວຽກງານ.
ຕະຫຼອດໄລຍະກວ່າ 4 ປີຜ່ານມາ, ນ້ອງໄດ້ກ້າວຈາກຄວາມບໍ່ຮູ້ບໍ່ຊ່ຽວຊານ, ມາສູ່ການປະຕິບັດງານຢ່າງຊຳນານ, ຈາກການເຮັດວຽກແບບອາໄສຄຳແນະນຳ, ມາສູ່ການເຮັດວຽກດ້ວຍຕົນເອງຢ່າງເປັນອິດສະຫຼະ, ທຸກຂັ້ນຕອນຂອງການເຕີບໂຕ ລ້ວນແຕ່ໄດ້ຮັບການຊ່ວຍເຫຼືອຈາກຄູຝຶກຊາວຈີນ ແລະ ການຮ່ວມມື ລະຫວ່າງເພື່ອນຮ່ວມງານ ລາວ-ຈີນ.ນີ້ກໍແມ່ນພາບສະທ້ອນອັນມີຊີວິດຊີວາຂອງການຊ່ວຍເຫຼືອເຊິ່ງກັນ ແລະ ກັນລະຫວ່າງປະຊາຊົນສອງຊາດລາວ-ຈີນ.
 |
ທ້າວ ເຈັງຊຶ ກາຍເປັນຕົວແທນຂອງພະນັກງານລາວຍຸກໃໝ່ ທີ່ກ້າວຂຶ້ນດ້ວຍການຮຽນຮູ້ສິ່ງໃໝ່ໆຢ່າງບໍ່ຢຸດຢັ້ງ ແລະ ການກ້າວຜ່ານຄວາມທ້າທາຍໃນສະພາບການເຮັດວຽກທີ່ເຕັມໄປດ້ວຍເຕັກໂນໂລຊີທັນສະໄໝ. ຈາກຈຸດເລີ່ມຕົ້ນທີ່ເຕັມໄປດ້ວຍຄວາມກັງວົນ ແລະ ຄວາມທ້າທາຍ ລາວໄດ້ພັດທະນາຕົນເອງດ້ວຍການຝຶກຝົນ ແລະ ປະສົບການຈິງ ຈົນກາຍເປັນພະນັກງານມືອາຊີບດ້ານການບຳລຸງຮັກສາທາງລົດໄຟ.
ຄວາມສຳເລັດຂອງລາວ, ບໍ່ແມ່ນເກີດຈາກໂຊກຊະຕາ ແຕ່ເກີດຈາກການຮຽນຮູ້ຢ່າງຕໍ່ເນື່ອງ, ການກ້າຮັບຄວາມທ້າທາຍ ແລະ ຄວາມອົດທົນໃນການພັດທະນາຕົນເອງ. ປັດຈຸບັນ, ລາວໄດ້ກາຍເປັນກຳລັງສຳຄັນໃນການຮັບປະກັນຄວາມປອດໄພ ແລະ ປະສິດທິພາບຂອງລະບົບລົດໄຟລາວ-ຈີນ ຢ່າງມືອາຊີບ.
ຄໍາເຫັນ