ງານມະຫະກໍາກິລາແຫ່ງຊາດ ຄັ້ງທີ XII ແມ່ນຈະເລີ່ມພິທີເປີດຢ່າງເປັນທາງການ ວັນທີ 15-25/11/2025, ມີການແຂ່ງຂັນ 33 ປະເພດກິລາ ແລະ 1 ປະເພດກິລາສາທິດ, ມີ 21 ພາກສ່ວນສົ່ງຄະນະກິລາຮ່ວມການແຂ່ງຂັນ, ຄາດວ່າຈະມີຄະນະນຳ, ຄູຝຶກ ແລະ ນັກກິລາເຂົ້າຮ່ວມທັງໝົດ 4,759 ຄົນ, ມີການຊີງໄຊ 435 ຫຼຽນຄຳ, 435 ຫຼຽນເງິນ ແລະ 682 ຫຼຽນທອງ ຊຶ່ງໄດ້ກຳນົດເອົາ 14 ຈຸດ ເປັນສະຖານທີ່ຮັບໃຊ້ການແຂ່ງຂັນ.
ທ່ານໃຫ້ຮູ້ຕື່ມວ່າ: ການກະກຽມຄວາມພ້ອມດ້ານເຕັກນິກ-ຈັດການແຂ່ງຂັນ ທີ່ໄດ້ຈັດຕັ້ງປະຕິບັດ ແຜນວຽກສຳເລັດດັ່ງນີ້: ສຳເລັດການກຳນົດສະຖານທີ່ຮັບໃຊ້ຈັດການແຂ່ງຂັນ 14 ຈຸດ ຮ່ວມກັບນະຄອນ ຫຼວງເຈົ້າພາບ ແລະ ສະຫະພັນກິລາແຫ່ງຊາດ; ສຳເລັດການສ້າງກົດລະບຽບຮັບໃຊ້ການແຂ່ງຂັນ 33 ປະເພດກິລາ ໂດຍອີງໃສ່ຂໍ້ກໍານົດວ່າດ້ວຍການຈັດຕັ້ງງານມະຫະກຳກິລາແຫ່ງຊາດ; ສຳເລັດການສ້າງເວັບໄຊ ງານມະຫະກຳກິລາແຫ່ງຊາດ ຄັ້ງທີ XII ແລະ ການສ້າງແບບຟອມສະໝັກລົງທະບຽນໃນຮູບແບບອອນລາຍ; ໄດ້ສົມທົບກັບພາກສວນທີ່ກ່ຽວຂ້ອງຈັດຕັ້ງການປະມູນວຽກງານຈັດຊື້ອຸປະກອນຮັບໃຊ້ການແຂ່ງຂັນ 33 ປະເພດກິລາ; ສຳເລັດການຈັດກອງປະຊຸມຮ່ວມກັບບັນດາສະຫະພັນກິລາແຫ່ງຊາດ ເພື່ອປຶກສາຫາລືກຳນົດຈຳນວນຄະນະຮັບຜິດຊອບຈັດການແຂ່ງຂັນ, ຜູ້ຄວບຄຸມການແຂ່ງຂັນ, ກຳມະການຕັດສິນ, ຜູ້ຊ່ວຍກຳມະການຕັດສິນ ແລະ ຜູ້ຊ່ວຍພາກສະໜາມຂອງບັນດາສະຫະພັນ; ສຳເລັດການຕິດຕັ້ງອຸປະກອນ IT ຮັບໃຊ້ການຂຶ້ນທະບຽນ, ອອກບັດ ແລະ ລາຍງານຜົນ (Entry Form by Number, Entry Form By Name) ຢູ່ຕຶກສຳນັກງານກະຊວງ ສສກ ເຂດສະໜາມກິລາເຈົ້າອານຸວົງ; ການຂຶ້ນທະບຽນແບບໂຕເລກ ຂອງ 17 ແຂວງ, 1 ນະຄອນຫຼວງ ແລະ 3 ກະຊວງ (ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ ແລະ ກະຊວງອຸດສະຫະກຳ ແລະການຄ້າ) ແມ່ນສຳເລັດ 100%.
ຄວາມພ້ອມສ້ອມແປງສະໜາມກິລາ ເພື່ອຮັບໃຊ້ການແຂ່ງຂັນ ມີຄວາມຄືບໜ້າ 90% ຫາ 95%. ພວກເຮົາໄດ້ມີແຜນສືບຕໍ່ລົງຕິດຕາມກວດກາຮ່ວມກັບຄະນະກຳມະການສ້ອມແປງຢ່າງໃກ້ຊິດຄາດວ່າຈະໃຫ້ສຳເລັດຢ່າງສົມບູນກ່ອນຈະເລີ່ມການແຂ່ງຂັນ. ນອກຈາກນີ້, ຈະໄດ້ນຳເອົາເຮືອຊ່ວງ 12 ສີພາຍ ແລະ 22 ສີພາຍ ຈາກ ແຂວງອຸດົມໄຊ ແລະ ແຂວງຊຽງຂວາງ ເພື່ອມາຮັບໃຊ້ການແຂ່ງຂັນຄັ້ງນີ້.
ແຜນວຽກໃນຕໍ່ໜ້າທີ່ຈະຕ້ອງໄດ້ສຸມໃສ່ໃຫ້ສຳເລັດ: ຈະສືບຕໍ່ປະສານສົມທົບກັບພາກສວນທີ່ກ່ຽວຂ້ອງ ລົງກວດກາສະໜາມທີ່ມີການປັບປຸງສ້ອມແປງ ກະກຽມມອບ-ຮັບ ແລະ ຕິດຕັ້ງອຸປະກອນໃຫ້ສຳເລັດ 100% ເພື່ອຮັບໃຊ້ການຝຶກຊ້ອມ ແລະ ການແຂ່ງຂັນປະເພດກິລາທີ່ຈະແຂ່ງຂັນກ່ອນຄື: ຊິນລອນ, ບານບ້ວງ, ຍິງປືນ, ໜ້າເກັກ, ປັນຈັກສີລັດ, ໝາກເສິກ ແລະ ປະເພດກິລາອື່ນໆ ຊຶ່ງທ່ານສາມາດຕິດຕາມໄດ້ໃນເວັບໄຊງານມະຫະກຳກິລາແຫ່ງຊາດ ຄັ້ງທີ XII, (vientiengames2025.org); ສືບຕໍ່ປະສານງານກັບບັນດາກຳມະການ, ບັນດາແຂວງ ແລະ ກະຊວງ ທີ່ສົ່ງຄະນະກິລາເຂົ້າຮ່ວມການແຂ່ງຂັນ ເພື່ອກະກຽມອອກບັດໃຫ້ທັນກັບກຳນົດເວລາ; ຈັດກອງປະຊຸມຝຶກອົບຮົມບຸກຄະລາກອນ ແລະ ອາສາສະໝັກຕາມແຜນທີ່ກຳນົດໄວ້ແຕ່ລະປະເພດກິລາ; ຈັດກອງປະຊຸມເຕັກນິກ-ຈັດການແຂ່ງຂັນ ທົ່ວປະເທດໃນວັນທີ 31 ຕຸລາ 2025 ເພື່ອສະຫຼຸບວຽກງານ ແລະ ພ້ອມທີ່ຈະກ້າວເຂົ້າສູ່ການແຂ່ງຂັນຢ່າງເປັນທາງການໃນເດືອນພະຈິກ; ສືບຕໍ່ຝຶກແອບນາງສາວ ຖືຖາດມອບຫຼຽນລາງວັນໃຫ້ສຳເລັດ ພາຍໃນເດືອນ ຕຸລາ 2025.
ທ່ານຍັງໄດ້ເຊີນຊວນຊາວນະຄອນຫຼວງວຽງຈັນ ແລະ ປະຊາຊົນບັນດາເຜົ່າໃນທົ່ວປະເທດ ໃຫ້ການຊຸກຍູ້ສະໜັບສະໜູນ ຮ່ວມກັນເປັນເຈົ້າພາບທີ່ດີ ໃນການຈັດງານມະຫະກຳກິລາແຫ່ງຊາດ ຄັ້ງທີXII ໃຫ້ສຳເລັດຕາມຄາດໝາຍ.
(ຂ່າວ-ພາບ: ຕຸໄລເພັດ)
ຄໍາເຫັນ