 |
ການເດີນທາງກັບຄືນສູ່ ສປປ ລາວ ຄະນະທີມນັກກິລາ ໄດ້ຖືກຕ້ອນຮັບຢ່າງອົບອຸ່ນ ສົມກຽດທີ່ຂົວມິດຕະພາບ ລາວ-ໄທ ແຫ່ງທີ 1 ທີ່ນະຄອນຫຼວງວຽງຈັນ ໂດຍໃຫ້ກຽດຕ້ອນຮັບຂອງ ທ່ານ ຖະໜອມ ຈຽງທອງ ປະທານແນວລາວສ້າງຊາດ ນະຄອນຫຼວງວຽງຈັນ. ຫຼັງຈາກນັ້ນ ທັບນັກກິລາກໍຖືກຕ້ອນຮັບຢ່າງສົມກຽດຕື່ມທີ່ີປະຕູໄຊ ໂດຍໃຫ້ກຽດຕ້ອນຮັບຂອງທ່ານ ກິ່ງມະໂນ ໂພມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ. ຈາກນັ້ນກໍໄດ້ເຂົ້າພົບ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງ ເພື່ອລາຍງານຜົນສຳເລັດຂອງການເຂົ້າຮ່ວມແຂ່ງຂັນລາຍການດັ່ງກ່າວ ແລະ ໄດ້ຮັບການຕ້ອນຮັບຢ່າງສົມກຽດ.
 |
ການແຂ່ງຂັນລາຍການນີ້ ມີສະໂມສອນຈາກທົ່ວໂລກເຂົ້າຮ່ວມ ໂດຍສະເພາະຈາກທະວີບເອີຣົບ, ອາຟຣິກາ, ອາຊີ, ອາເມຣິກາໃຕ້ ແລະ ຄອນຄາເຄັບ, ສ່ວນຕົວແທນຈາກອາຊີ ນອກຈາກ ດັບເບິນຢູໄອຈີ ນາຄາ ຊຶ່ງເປັນທີມທຳອິດຈາກ ສປປ ລາວ ໃນທະວີບອາຊີ ທີ່ເຂົ້າຮ່ວມ ກໍຍັງມີ ມາເລເຊຍ, ສປ ຈີນ, ສະຫະລັດ ອາຣັບເອມິເຣດ, ມາເກົາ ສປ ຈີນ, ເນປານ, ຕັວກເມນິດສະຖານ, ອູຊະເບກິດສະຖານ ແລະ ຟີລິບປິນ.
ສະເພາະ ຢູ13 ລາຍການນີ້ ມີ 48 ທີມ ຈາກ 15 ປະເທດເຂົ້າຮ່ວມຄື: ປັອກຕຸຍການ ເຈົ້າພາບ, ແອັດສະປາຍ, ໂຄຣອາຊີ, ເອັດໂຕນີ, ຣູມານີ, ບຣາຊິວ, ສະຫະລັດ ອາເມຣິກາ, ສປປ ລາວ, ສະຫະລັດ ອາຣັບ ເອມິເຣດ, ອາຟຣິກາໃຕ້, ເອຢິບ, ແທນຊານີ, ກາບົງ, ເບີມູດາ ແລະ ເກາະເຄແມນ.
ໃນຈຳນວນ 48 ທີມ ແບ່ງອອກເປັນ 12 ກຸ່ມ, ກຸ່ມລະ 4 ທີມ ແຂ່ງພົບກັນໝົດແລ້ວຄັດເອົາພຽງທີ 1 ຂອງແຕ່ລະກຸ່ມ ຜ່ານເຂົ້າຮອບ Playoff Gold ຫຼື ລາຍການລະດັບສູງສຸດຂອງລາຍການ, ສ່ວນທີ 2 ຂອງກຸ່ມໄປແຂ່ງຂັນລະດັບດິວິຊັນ 2 ຫຼື ລາຍການ Playoff Silver ແລະ ທີ 3 ຂອງແຕ່ລະກຸ່ມ ໄປແຂ່ງຂັນລະດັບ ດິວິຊັນ 3 Playoff Bronze.
 |
ຜ່ານການແຂ່ງຂັນຢ່າງເຂັ້ມຂຸ້ນ ຜົນປະກົດວ່າ ທີມນັກເຕະບານເຍົາວະຊົນລາວ ດັບເບິນຢູໄອຈີ ນາຄາ ສ້າງຜົນງານໄດ້ຢ່າງໂດດເດັ່ນສະໝ່ຳສະເໝີ ດ້ວຍການເກັບໄຊຊະນະໃນແຕ່ລະນັດ ຕັ້ງແຕ່ນັດທຳອິດຈົນຮອດຮອບ 4 ທີມສຸດທ້າຍ ເຮັດໃຫ້ສາມາດຜ່ານເຂົ້າສູ່ຮອບຊີງຊະນະເລີດໄດ້ສຳເລັດ ໄປພົບກັບ ສະໂມສອນ ເອັບຊີ ໂອດ ເບເລເນັດ (CF osBelenenses) ທີມຈາກເຈົ້າພາບ ປະເທດປັອກຕຸຍການ ຊຶ່ງຜ່ານການແຂ່ງຂັນກໍຖືວ່າເປັນໄປຕາມເປົ້າໝາຍ ຢູ-13 ດັບເບິນຢູໄອຈີ ນາຄາ ໂຊຟອມເກັ່ງເອົາຊະນະ ທີມເຈົ້າພາບໄປໄດ້ 2-0 ປະຕູ ຄວ້າແຊັມລາຍການດັ່ງກ່າວມາຄອງ ທັງໄດ້ສ້າງຊື່ສຽງໃຫ້ກັບປະເທດຊາດໃນເວທີສາກົນ.
ສຳລັບບັນດາພາກສ່ວນທີ່ໃຫ້ການສະໜັບສະໜູນຄັ້ງນີ້ ປະກອບມີ ທ່ານ ອຸທິດ ນັນທະວົງ ປະທານບໍລິສັດ ເອັນທີວີ (NTV) ມອບ 60 ລ້ານກີບ, ອົງການປົກຄອງນະຄອນຫຼວງວຽງຈັນ 50 ລ້ານກີບ, ບໍລິສັດ NTP ການຄ້ານໍ້າມັນເຊື້ອໄຟລາວ 50 ລ້ານກີບ ແລະ ຫໍພິພິຕະພັນສິລະປະລາວ 40 ລ້ານກີບ.
(ຂ່າວ: ຕຸໄລເພັດ, ແຫຼງຂ່າວ ຂປລ)
ຄໍາເຫັນ