 |
ການແຂ່ງຂັນຄັ້ງນີ້, ລວມມີ 146 ທີມ ຈາກທົ່ວປະເທດເຂົ້າຮ່ວມ. ໂດຍແບ່ງການຄັດເລືອກເປັນ 3 ພາກໃຫຍ່ (ນະຄອນຫຼວງວຽງຈັນ, ພາກໃຕ້ ແລະ ພາກເໜືອ) ເພື່ອເລືອກເອົາ 8 ທີມຊາຍ ແລະ 4 ທີມຍິງ ເຂົ້າສູ່ຮອບຊີງຊະນະເລີດທົ່ວປະເທດ ຢູ່ນະຄອນຫຼວງວຽງຈັນ.
ການແຂ່ງຂັນຮອບຄັດເລືອກ 9 ຕົວເມືອງ ຂອງນະຄອນຫຼວງວຽງຈັນ ມີທັງໝົດ 123 ທີມ ນຳໃຊ້ 4 ສະໜາມໃນການແຂ່ງຂັນ ສະໜາມກິລາລ້ານຊ້າງສະເຕດ້ຽມໜອງໄຮ, ສະໜາມກິລາ ສະຖາບັນກິລາ - ກາຍະກຳ, ສະໜາມກິລາປົກຄອງເມືອງສັງທອງ ແລະ ສະໜາມກິລາປົກຄອງເມືອງປາກງື່ມ ເພື່ອຄັດເລືອກເອົາ 3 ທີມຊາຍ ແລະ 2 ທີມຍິງເຂົ້າສູ່ການແຂ່ງຂັນຮອບສຸດທ້າຍທົ່ວປະເທດ, ການແຂ່ງຂັນຮອບຄັດເລືອກ ພາກໃຕ້ຈັດຂຶ້ນທີ່ ແຂວງສາລະວັນ ທັງໝົດ 11 ທີມ ລວມມີ 7 ທີມຊາຍ ແລະ 4 ທີມຍິງ ຊຶ່ງຄັດເລືອກເອົາ 2 ທີມຊາຍ ແລະ 1 ທີມຍິງເຂົ້າສູ່ຮອບການແຂ່ງຂັນທົ່ວປະເທດ ທີ່ນະຄອນຫຼວງວຽງຈັນ, ການແຂ່ງຂັນຮອບຄັດເລືອກ ພາກເໜືອຈັດຂຶ້ນ ທີ່ແຂວງຫຼວງພະບາງ ທັງໝົດ 12 ທີມ ລວມມີ 8 ທີມຊາຍ ແລະ 4 ທີມຍິງ ຊຶ່ງຄັດເລືອກເອົາ 2 ທີມຊາຍ ແລະ 1 ທີມຍິງເຂົ້າສູ່ຮອບການແຂ່ງຂັນທົ່ວປະເທດ ທີ່ນະຄອນຫຼວງວຽງຈັນ ແລະ ພ້ອມໂຄຕ້າພິເສດທີມຊາຍອັນດັບ 3 ທີ່ດີທີ່ສຸດອີກ 1 ທີມ.
ການແຂ່ງຂັນຮອບຊີງຊະນະເລີດທົ່ວປະເທດ ແລະ ປິດການແຂ່ງຂັນໄດ້ຈັດຂຶ້ນໃນວັນທີ 27 ມີນາ ຜ່ານມາ ສະໜາມກິລາລ້ານຊ້າງສະເຕດ້ຽມໜອງໄຮ ເມືອງຫາດຊາຍຟອງ ທີ່ນະຄອນຫຼວງວຽງຈັນ. ປະເພດທີມຍິງເປັນການຊີງຊະນະເລີິດ ລະຫວ່າງ ທີມຕົວແທນນະຄອນຫຼວງວຽງຈັນ ໄດ້ແກ່ ມຕ ບໍ່ໂອ ພົບກັບທີມ ແຂວງຈໍາປາສັກ ຜົນການແຂ່ງຂັນຈໍາປາສັກສະແດງຄວາມສາມາດໄດ້ເໜືອກວ່າ ບໍ່ໂອ ສາມາດເອົາຊະນະ 5-1 ປະຕູ. ຄອງແຊັມ (ທີ 1) ລາຍການນີ້.
ປະເພດທີມຊາຍ ເປັນການພົບກັນ ລະຫວ່າງ ມສ ນາຊາຍທອງ (ຕົວແທນນະຄອນຫຼວງວຽງຈັນ) ພົບກັບ ແຂວງສາລະວັນ ຊຶ່ງຜົນການແຂ່ງຂັນແຂວງສາລະວັນສາມາດເອົາຊະນະ 2-1 ປະຕູ. ຄອງແຊັມລາຍນີ້ເຊັ່ນກັນ.
ລາງວັນລວມມູມຄ່າທັງໝົດ 130,000,000 ກີບ, ລາຍລະອຽດ ຄື: ລາງວັນທີ 1: ໄດ້ຮັບຂັນໜຶ່ງໜ່ວຍ, ຫຼຽນລາງວັນ 27 ຫຼຽນ ພ້ອມເງິນສົດ 50,000,000 ກີບ, ມີຜະລິດຕະພັນອື່ນໆ 20,000,000 ກີບ ລວມມູນຄ່າທັງໝົດ 70,000,000 ກີບ, ລາງວັນທີ 2 ໄດ້ຮັບຫຼຽນລາງວັນ 27 ຫຼຽນ ພ້ອມເງິນສົດ 30,000,000 ກີບ, ຜະລິດຕະພັນອື່ນໆ 10,000,000 ກີບ ລວມມູນຄ່າທັງໝົດ 40,000,000 ກີບ, ລາງວັນທີ 3 ໄດ້ຮັບຫຼຽນລາງວັນ 27 ຫຼຽນ ພ້ອມເງິນສົດ 15,000,000 ກີບ, ມີຜະລິດຕະພັນອື່ນໆ 5,000,000 ກີບ ລວມມູນຄ່າທັງໝົດ 20,000,000 ກີບ. ການແຂ່ງຂັນ COPA COCA COLA LAOS 2026 ບໍ່ແມ່ນພຽງແຕ່ການແຂ່ງຂັນກິລາເທົ່ານັ້ນ, ແຕ່ຄືຄວາມມຸ່ງໝັ້ນຮ່ວມກັນຂອງພາກລັດ ແລະ ເອກະຊົນ ໃນການສ້າງອະນາຄົດທີ່ສົດໃສໃຫ້ແກ່ເຍົາວະຊົນລາວ ພາຍໃຕ້ຈິດວິນຍານແຫ່ງ "ນ້ຳໃຈນັກກິລາ" ຢ່າງແທ້ຈິງ.
 |
ການແຂ່ງຂັນໃນຄັ້ງນີ້, ໄດ້ຮັບການສະໜັບສະໜູນຈາກ ບໍລິສັດ ລາວໂຄຄາ-ໂຄລາ ບ໊ອຕຕລິງ ຈຳກັດ, ຖືເປັນອົງກອນຕົວຢ່າງທີ່ມີຄວາມຮັບຜິດຊອບຕໍ່ສັງຄົມສູງ ແລະ ໄດ້ໃຫ້ຄວາມສຳຄັນຢ່າງສະເໝີຕົ້ນສະເໝີປາຍ ໃນການຮ່ວມສ້າງບຸກຄະລາກອນກິລາໃຫ້ແກ່ປະເທດຊາດ ແລະ ໄດ້ສະໜັບສະໜູນມາຍາວນານເຖິງ 10 ປີເຕັມ ໄດ້ສະທ້ອນໃຫ້ເຫັນເຖິງເຈດຈຳນົງອັນແຮງກ້າຂອງບໍລິສັດ ໃນການເປັນແຮງຍູ້ດັນ ໃຫ້ເຍົາວະຊົນລາວໄດ້ມີເວທີສະແດງຄວາມສາມາດ ເພື່ອພັດທະນາຕົນເອງໃຫ້ກາຍເປັນນັກກິລາອາຊີບທີ່ມີຄຸນນະພາບ. ໃຫ້ກຽດມອບຂັນລາງວັນ ໂດຍທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ພະສິນ ປັນດີ ຜູ້ຈັດການໃຫຍ່ ບໍລິສັດ ລາວໂຄຄາ-ໂຄລາ ບອ໊ຕຕລິງ ຈຳກັດ ພ້ອມດ້ວຍຄະນະຮັບຜິດຊອບຈັດການແຂ່ງຂັນເຂົ້າຮ່ວມ.
(ຂ່າວ:ຕຸໄລເພັດ)
ຄໍາເຫັນ