ແອວນີໂຢ ເຮັດໃຫ້ອຸນຫະພູມໂລກ ໃນເດືອນມີນາ-ພຶດສະພາສູງກວ່າປົກກະຕິ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົງການອຸຕຸນິຍົມວິທະຍາໂລກ (WMO) ໄດ້ເປີດເຜີຍບົດລາຍງານໂດຍລະບຸວ່າ:ອົງການຊ່ຽວຊານພິເສດດ້ານສະພາບອາກາດຂອງອົງການສະຫະປະຊາຊາດກ່າວວ່າ: ປະກົດການແອວນີໂຢຈະເຮັດໃຫ້ອຸນຫະພູມໂລກສູງກວ່າປົກກະຕິໃນລະຫວ່າງເດືອນມີນາ - ພິຶດສະພານີ້.
    ເຖິງແມ່ນວ່າ ປະກົດການແອວນີໂຢໃນປັດຈຸບັນຈະກໍ່ຕົວຂຶ້ນມາຕັ້ງແຕ່ໄລຍະເດືອນມິຖຸນາ 2023 ທີ່ຜ່ານມາ ແລະ ອ່ອນກຳລັງລົງຢ່າງຕໍ່ເນື່ອງ ແຕ່ການແປປວນ ແລະ ຄວາມຮຸນແຮງຂອງສະພາບອາກາດທີ່ເກີດຂຶ້ນຖືວ່າໜັກໜ່ວງທີ່ສຸດເປັນອັນດັບທີ 5 ສຳລັບປະກົດການແອວນີໂຢ ຊຶ່ງເຄີຍເກີດຂຶ້ນໃນປະຫວັດສາດ ເນື່ອງຈາກສົ່ງຜົນໃຫ້ອຸນຫະພູມສະເລ່ຍຂອງຜິວນ້ຳທະເລໃນພາກພື້ນຕາເວັນອອກ ແລະ ພາກກາງຂອງປາຊີຟິກສູງກວ່າຄ່າສະເລ່ຍໃນລະຫວ່າງປີ 1991-2020 ປະມານ 2 ອົງສາ. ດັ່ງນັ້ນ,WMO ຄາດວ່າ ມີໂອກາດປະມານ 60% ທີ່ອິດທິພົນຂອງແອວນີໂຢຈະຍັງຄົງສົ່ງຜົນໃຫ້ພື້ນທີ່ເກືອບທຸກແຫ່ງໃນໂລກມີອຸນຫະພູມສູງກວ່າປົກກະຕິໃນລະຫວ່າງເດືອນມີນາຈົນເຖິງເດືອນພຶດສະພາ ແລະ ມີໂອກາດ 80% ທີ່ສະພາບອາກາດຄົງຕົວ ຫຼື ເປັນກາງ ຊຶ່ງຈະເກີດໃນລະຫວ່າງເດືອນເມສາຈົນເຖິງເດືອນມິຖຸນານີ້. ຫຼັງຈາກນັ້ນ, ມີຄວາມເປັນໄປໄດ້ທີ່ປະກົດການລານີຢາ ຊຶ່ງກົງກັນຂ້າມກັບແອວນີໂຢຈະກໍ່ຕົວຂຶ້ນ ແຕ່ທິດທາງຂອງຮູບແບບສະພາບອາກາດໃນເວລານັ້ນຍັງບໍ່ມີຄວາມຊັດເຈນ ໂດຍໂລກຢູ່ພາຍໃຕ້ອິດທິພົນຂອງລານີຢາຄັ້ງຫຼ້າສຸດລະຫວ່າງປີ 2020 ຈົນເຖິງຕົ້ນປີ 2023.
    ອີກຢ່າງໜຶ່ງ, ປະກົດການແອວນີໂຢຈະເກີດຂຶ້ນທຸກ 2 ຫຼື 7 ປີ ໂດຍໄລຍະເວລາຈະປະມານ 9-12 ເດືອນ ຂະນະທີ່ໂລກປະເຊີນກັບປະກົດການດັ່ງກ່າວໃນລະຫວ່າງປີ 2015-2016 ແລະ ແອວນີໂຢໃນຮອບປັດຈຸບັນມີຄວາມຮຸນແຮງທີ່ສຸດລະຫວ່າງເດືອນພະຈິກ-ມັງກອນຜ່ານມາ.