 |
ທ່ານ ສິນທະນູ ສຸວັນນະລາດ ຮອງເລຂາໜ່ວຍພັກ ຮອງຫົວໜ້າລັດວິສາຫະກິດໄຟຟ້າລາວ ສາຂາແຂວງອັດຕະປື ໄດ້ເປີດເຜິຍຕໍ່ສື່ມວນຊົນແຂວງອັດຕະປື ໃນວັນທີ 4 ສິງຫາ 2026 ນີ້ວ່າ: ການຈັດຕັ້ງປະຕິບັດໄດ້ຮັບການເອົາໃຈໃສ່ຈາກຄະນະນຳຂອງລັດວິສາຫະກິດໄຟຟ້າລາວ ສາຂາແຂວງອັດຕະປື, ມີການຊີ້ນຳ, ຕິດຕາມ ແລະ ຊຸກຍູ້ພະນັກງານໃຫ້ລົງເຄື່ອນໄຫວເກັບກູ້ໜີ້ສິນຢ່າງຕໍ່ເນື່ອງ, ຄວບຄູ່ກັບການປະຊາສຳພັນ ແລະ ສ້າງຄວາມເຂົ້າໃຈໃຫ້ຜູ້ນຳໃຊ້ໄຟຟ້າປະຕິບັດພັນທະການຊຳລະຄ່າໄຟຟ້າໃຫ້ຖືກຕ້ອງ ແລະ ກົງເວລາ, ເຮັດໃຫ້ເກັບກູ້ໜີ້ສິນ 8 ປະເພດ ສາມາດປະຕິບັດໄດ້ 100% ຂອງແຜນການ, ສ່ວນການເກັບກູ້ໜີ້ສິນ 10 ປະເພດ ປະຕິບັດໄດ້ 98.95% ຂອງແຜນການ, ເມື່ອທຽບໃສ່ຄາດໝາຍທີ່ວາງໄວ້ ຖືວ່າເປັນຜົນສຳເລັດທີ່ລື່ນແຜນ, ສະທ້ອນໃຫ້ເຫັນເຖິງຄວາມຮັບຜິດຊອບ, ຄວາມເອົາໃຈໃສ່ ແລະ ການປະສານງານຢ່າງໃກ້ຊິດລະຫວ່າງພາກສ່ວນທີ່ກ່ຽວຂ້ອງ. ນອກຈາກນັ້ນ, ຍັງສາມາດສ້າງເມືອງປອດໜີ້ສິນ 8 ປະເພດ ໄດ້ຈຳນວນ 5 ເມືອງ ແລະ ສ້າງເມືອງປອດໜີ້ສິນ 10 ປະເພດໄດ້ 1 ເມືອງ ຕາມມາດຖານທີ່ກຳນົດໄວ້. ຜົນສຳເລັດດັ່ງກ່າວ ເປັນພື້ນຖານສຳຄັນໃນການຍົກລະດັບວຽກງານຄຸ້ມຄອງໜີ້ສິນ, ຫຼຸດຜ່ອນໜີ້ຄ້າງຊຳລະ ແລະ ສ້າງວິໄນການຊຳລະຄ່າໄຟຟ້າໃນສັງຄົມໃຫ້ດີຂຶ້ນ.
ທ່ານ ສິນທະນູ ສຸວັນນະລາດ ຍັງໄດ້ກ່າວຕື່ມວ່າ: ສຳລັບທິດທາງໃນ 6 ເດືອນທ້າຍປີ 2026 ລັດວິສາຫະກິດໄຟຟ້າລາວ ສາຂາແຂວງອັດຕະປື ຈະສືບຕໍ່ປະຕິບັດມາດຕະການເກັບກູ້ໜີ້ສິນຢ່າງເຂັ້ມງວດ, ຕິດຕາມລູກຄ້າທີ່ຍັງຄ້າງຊຳລະ, ສົມທົບກັບອຳນາດການປົກຄອງທ້ອງຖິ່ນ ແລະ ພາກສ່ວນກ່ຽວຂ້ອງ ເພື່ອຊຸກຍູ້ການຊຳລະໜີ້ສິນໃຫ້ທັນເວລາ. ພ້ອມກັນນີ້, ຈະສູ້ຊົນເກັບກູ້ໜີ້ສິນ 8 ປະເພດໃຫ້ໄດ້ 100% ຂອງແຜນການ, ສ່ວນໜີ້ສິນ 10 ປະເພດ ຈະສູ້ຊົນໃຫ້ບັນລຸຕາມເປົ້າ ໝາຍທີ່ກຳນົດ. ຂະນະດຽວກັນ ຈະຮັກສາເມືອງປອດໜີ້ສິນ 8 ປະເພດ ໃຫ້ໄດ້ 5 ເມືອງ ແລະ ສູ້ຊົນສ້າງເມືອງປອດໜີ້ສິນ 10 ປະເພດ ໃຫ້ເພີ່ມເປັນ 2 ເມືອງ ຕາມແຜນການປະຈຳປີທີ່ວາງໄວ້, ເພື່ອປະກອບສ່ວນໃນການຍົກສູງປະສິດທິພາບການບໍລິຫານວຽກງານໄຟຟ້າ, ຮັບປະກັນລາຍຮັບ ແລະ ສ້າງຄວາມໝັ້ນຄົງໃຫ້ແກ່ການດຳເນີນງານຂອງລັດວິສາຫະກິດໄຟຟ້າລາວ ສາຂາແຂວງອັດຕະປື.
ຂ່າວ:ມະນີວອນ
ຄໍາເຫັນ