ຄະນະບັນນາທິການຂອງບົດລາຍງານລະບຸວ່າ: ການຈັດອັນດັບປີ 2026 ປະກອບດ້ວຍປະເທດ ແລະ ພາກພື້ນ 147 ແຫ່ງ, ໂດຍພິຈາລະນາຈາກຫຼາຍປັດໃຈເຊັ່ນ: ລວມຍອດຜະລິດຕະພັນພາຍໃນປະເທດ (GDP) ຕໍ່ຫົວຄົນ, ການສະໜັບສະໜູນທາງສັງຄົມ, ສະຫວັດດີການສັງຄົມ, ອາຍຸຍືນສະເລ່ຍຂອງການທີ່ມີສຸຂະພາບດີ, ເສລີພາບ, ຄວາມເອື້ອເຟື້ອເຜື່ອແຜ່, ການຮັບຮູ້ເຖິງການສໍ້ລາດບັງຫຼວງ ແລະ ຄວາມອົດທົນທາງສັງຄົມ.
ແຟັງລັງ ແລະ ບັນດາປະເທດນໍດິກອື່ນໆຍັງຄົງຕິດອັນດັບປະເທດທີ່ມີຄວາມສຸກທີ່ສຸດອັນດັບຕົ້ນໆຍ້ອນຫຼາຍປັດໃຈເຊັ່ນ: ຄວາມຮັ່ງມີ, ການແຈກຢາຍລາຍຮັບທີ່ຂ້ອນຂ້າງເທົ່າທຽມກັນ, ລະບົບສະຫວັດດີການທີ່ຊ່ວຍປົກປ້ອງພົນລະເມືອງຈາກຜົນກະທົບທາງເສດຖະກິດ ແລະ ອາຍຸຍືນສະເລ່ຍຂອງການທີ່ມີສຸຂະພາບດີ.
ທ່ານ ແລຣີ ຮອກກາເນນ ນັກຄົ້ນຄວ້າວິທະຍາສາດສັງຄົມຈາກມະຫາວິທະຍາໄລຊິງກິ ໃຫ້ສຳພາດກັບສື່ມວນຊົນທ້ອງຖິ່ນວ່າ: ດັດຊະນີດັ່ງກ່າວວັດແທກຄວາມພໍໃຈໃນຊີວິດຫຼາຍກວ່າສະຫວັດດີພາບທາງດ້ານອາລົມ ຊຶ່ງເປັນການປະເມີນໂດຍລວມທາງດ້ານຄວາມຄິດກ່ຽວກັບຄວາມຮູ້ສຶກທີ່ມີຕໍ່ຊີວິດ ແລະ ບໍ່ຈຳເປັນຕ້ອງກ່ຽວຂ້ອງກັບອາລົມທີ່ຮຸນແຮງ.
ທ່ານ ຮອກກາເນນ ກ່າວວ່າ: ດັດຊະນີທີ່ເຂັ້ມແຂງຂອງບັນດາປະເທດນໍດິກໃນບົດລາຍງານນີ້ແມ່ນອີງໃສ່ສະຖຽນລະພາບທາງສັງຄົມ ແລະ ລະບົບສະຫວັດດີການທີ່ເຂັ້ມແຂງ ຊຶ່ງຊ່ວຍໃນການຟື້ນຕົວໃນຍາມທີ່ຫຍຸ້ງຍາກ. ທ່ານຍັງໄດ້ຊີ້ໃຫ້ເຫັນວ່າ: ສ່ວນໜຶ່ງທີ່ເຮັດໃຫ້ແຟັງລັງຢູ່ໃນອັນດັບທີ່ສູງຢ່າງຕໍ່ເນື່ອງແມ່ນຍ້ອນວັດທະນະທຳຂອງປະເທດທີ່ເນັ້ນໃສ່ "ຄວາມພໍດີ".
ທ່ານ ຮອກກາເນນ ເປີດເຜີຍວ່າ: ຄວາມບໍ່ສະເໝີພາບດ້ານລາຍຮັບທີ່ຂ້ອນຂ້າງນ້ອຍ, ລະດັບການສໍ້ລາດບັງຫຼວງທີ່ຕໍ່າ ແລະ ຄວາມໄວ້ວາງໃຈໃນສະຖາບັນຂອງລັດຖະບານ ລ້ວນແຕ່ເປັນປັດໄຈສຳຄັນທີ່ປະກອບສ່ວນເຂົ້າໃນສະຫວັດດີພາບຂອງປະຊາຊົນແຟັງລັງ.
ຄໍາເຫັນ