 |
ໃນພິທີ, ທ່ານ ຄູຊາກາເບະ ໂຢຊຸເກະ ໄດ້ກ່າວສະແດງຄວາມຍິນດີ ແລະ ຂອບໃຈມາຍັງທຸກພາກສ່ວນ ທີ່ໄດ້ໃຫ້ການຮ່ວມມືຢ່າງສະໜິດແໜ້ນ ໃນການພັດທະນາການສຶກສາພາສາຍີ່ປຸ່ນຢູ່ ສປປ ລາວ. ທ່ານໄດ້ເນັ້ນໜັກ ວ່າ: "ມູນນິທິຍີ່ປຸ່ນ ຍັງຄົງມຸ່ງໝັ້ນທີ່ຈະສືບຕໍ່ໃຫ້ການສະໜັບສະໜູນ ແລະ ປັບປຸງການຮຽນ-ການສອນພາສາຍີ່ປຸ່ນໃນທົ່ວໂລກ ກໍຄືຢູ່ ສປປ ລາວ ໃຫ້ມີຄຸນນະພາບດີຂຶ້ນເລື້ອຍໆ."
ໂຄງການສະໜັບສະໜູນການສຶກສາພາສາຍີ່ປຸ່ນ ໃນຊັ້ນມັດທະຍົມສຶກສາຂອງລາວ ໄດ້ເລີ່ມຕົ້ນມາຕັ້ງແຕ່ປີ 2015 ຊຶ່ງໃນປັດຈຸບັນແມ່ນກ້າວເຂົ້າສູ່ປີທີ 10 ແລະ ໄດ້ຮັບໝາກຜົນຢ່າງໜັກແໜ້ນ. ພາຍໃຕ້ການຮ່ວມມືຢ່າງໃກ້ຊິດກັບ ສວສ, ປຶ້ມແບບຮຽນ "ນິຮົງໂກະ" (Nihongo) ທັງໝົດ 7 ເຫຼັ້ມ ແມ່ນໄດ້ສຳເລັດການຮຽບຮຽງໃນປີ 2024. ຫຼັງຈາກນັ້ນ, ໃນເດືອນກັນຍາ ປີ 2025 ຜ່ານມາ, ໄດ້ມີໂຮງຮຽນໃໝ່ອີກ 6 ແຫ່ງໃນນະຄອນຫຼວງວຽງຈັນ ທີ່ໄດ້ນຳໃຊ້ປຶ້ມແບບຮຽນນີ້ ແລະ ເປີດການຮຽນ-ການສອນພາສາຍີ່ປຸ່ນຢ່າງເປັນທາງການ.
ນອກຈາກ ນວ ແລ້ວ, ໂຄງການຍັງໄດ້ຂະຫຍາຍຕົວໄປສູ່ທ້ອງຖິ່ນ ໂດຍສະເພາະຢູ່ແຂວງຫຼວງພະບາງ ໄດ້ມີການຈັດຝຶກອົບຮົມທຸກໆ ອາທິດໃຫ້ຄູ-ອາຈານ ຈາກ 3 ໂຮງຮຽນເປົ້າໝາຍ ຕັ້ງແຕ່ເດືອນມັງກອນ ປີ 2026 ເປັນຕົ້ນມາ ແລະ ຈະເລີ່ມເປີດການຮຽນ-ການສອນພາສາຍີ່ປຸ່ນຢ່າງເຕັມຮູບແບບ ໃນເດືອນກັນຍານີ້. ພ້ອມກັນນັ້ນ, ໂຮງຮຽນຮາກແກ້ວ ກໍເປັນອີກໜຶ່ງໂຮງຮຽນທີ່ໄດ້ຕົກລົງນຳໃຊ້ປຶ້ມແບບຮຽນ "ນິຮົງໂກະ" ເຂົ້າໃນຫຼັກສູດ ຕັ້ງແຕ່ສົກຮຽນໃໝ່ນີ້ເປັນຕົ້ນໄປ, ຊຶ່ງຄູ-ອາຈານຈາກໂຮງຮຽນດັ່ງກ່າວ, ກໍໄດ້ເຂົ້າຮ່ວມການຝຶກອົບຮົມໃນຄັ້ງນີ້ເຊັ່ນດຽວກັນ. ໃນປັດຈຸບັນ, ໂຮງຮຽນເປົ້າໝາຍທີ່ໄດ້ຮັບການສະໜັບສະໜູນການສຶກສາພາສາຍີ່ປຸ່ນເພີ່ມຂຶ້ນເປັນ 14 ແຫ່ງ, ໃນນັ້ນມີ 11 ແຫ່ງ ຢູ່ ນວ ແລະ 3 ແຫ່ງຢູ່ແຂວງຫຼວງພະບາງ.
ນອກຈາກການຝຶກອົບຮົມພັກແລ້ງ ແລະ ການຝຶກອົບຮົມປົກກະຕິແລ້ວ, ມູນນິທິຍີ່ປຸ່ນ ຍັງມີແຜນການທີ່ຈະສົ່ງຄູສອນພາສາຍີ່ປຸ່ນຈຳນວນ 10 ທ່ານ ເດີນທາງໄປເຂົ້າຮ່ວມການຝຶກອົບຮົມ ແລະ ທັດສະນະສຶກສາກ່ຽວກັບການດຳລົງຊີວິດຢູ່ປະເທດຍີ່ປຸ່ນໃນໄລຍະທ້າຍປີນີ້ ເພື່ອນຳເອົາຄວາມຮູ້ ແລະ ປະສົບການຕົວຈິງມາໝູນໃຊ້ເຂົ້າໃນການພັດທະນາການຮຽນ-ການສອນ ແລະ ສ້າງຊັບພະຍາກອນມະນຸດດ້ານພາສາຍີ່ປຸ່ນໃນລາວ ໃຫ້ມີຄຸນນະພາບສູງຂຶ້ນຢ່າງບໍ່ຢຸດຢັ້ງ.
ຂ່າວ: ສສກ
ຄໍາເຫັນ