 |
ໃນຕອນເຊົ້າຂອງວັນທີ 25 ສິງຫາ 2026 ທີ່ແຂວງຫຼວງນໍ້າທາ ໄດ້ຈັດຊຸດຝຶກອົບຮົມວຽກງານໂຄສະນາປາຖະກະຖາ ປະຈໍາປີ 2026ໂດຍການເປັນປະທານຮ່ວມຂອງສະຫາຍ ອ່ອນຈັນ ຄໍາພາວົງຄະນະປະຈໍາພັກແຂວງຮອງເລຂາພັກແຂວງ, ຜູ້ຊີ້ນໍາວຽກງານການເມືອງ-ແນວຄິດ, ສະຫາຍບົວໄລ ພານຸວົງ ກໍາມະການພັກຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ, ມີນັກຝຶກອົບຮົມເຂົ້າຮ່ວມ.
ສະຫາຍ ອ່ອນຈັນ ຄໍາພາວົງ ກ່າວວ່າ: ການຝຶກອົບຮົມໃນຄັ້ງນີ້ ມີຄວາມສໍາຄັນສໍາລັບພະນັກງານຜູ້ທີ່ເຮັດວຽກງານການເມືອງ-ແນວຄິດ ໂດຍສະເພາະແມ່ນພະນັກງານຫຼັກແຫຼ່ງຂອງແຂວງ ເຊິ່ງເປັນຜູ້ທີ່ຈະນໍາເອົາແນວທາງນະໂຍບາຍ, ມະຕິ, ຄໍາສັ່ງ ແລະ ລະບຽບການຕ່າງໆ ຂອງພັກ-ລັດ ໄປໂຄສະນາປາຖະກະຖາ ໃຫ້ປະຊາຊົນບັນດາເຜົ່າເຂົ້າໃຈຢ່າງເລິກເຊິ່ງ ທັງເປັນການຈັດຕັ້ງປະຕິບັດໜ້າທີ່ການເມືອງໃນໄລຍະໃໝ່ ຈໍາເປັນຕ້ອງໄດ້ຮັບການບໍາລຸງກ່ຽວກັບວຽກງານໂຄສະນາປະຖະກະຖາ.
 |
ສໍາລັບບົດຮຽນທີ່ນໍາມາຝຶກອົບຮົມໃນຄັ້ງນີ້ ມີຈໍານວນ 3 ບົດ ເຊິ່ງເປັນບົດຮຽນທີ່ສໍາຄັນ ໂດຍຈະເນັ້ນໃສ່ໃຫ້ຜູ້ຝຶກອົບຮົມ ໄດ້ຮຽນຮູ້ກ່ຽວກັບວິທີການ, ຫຼັກການຕ່າງໆຂອງວຽກງານໂຄສະນາປາຖະກະຖາ ເປັນຕົ້ນ ຄວາມຮູ້ພື້ນຖານກ່ຽວກັບວຽກງານໂຄສະນາ;ບົດບາດຄວາມສໍາຄັນຂອງນັກໂຄສະນາ,ນັກປາຖະກະຖາ; ທັກສະສິລະປະໃນການເວົ້າ, ການປາຖະກະຖາ ແລະ ຈະໄດ້ລົງເລິກປະຕິບັດຕົວຈິງ.
ສຳລັບວິທະຍາກອນທີ່ມາຂຶ້ນຫ້ອງບັນຍາຍໃຫ້ຄວາມຮູ້ ແມ່ນມາຈາກຄະນະໂຄສະນາອົບຮົມແຂວງຫຼວງນໍ້າທາ ແລະ ກົມໂຄສະນາ ຄະນະໂຄສະນາອົບຮົມສູນກາງພັກ, ໃນໂອກາດດັ່ງກ່າວທ່ານ ອ່ອນຈັນ ຄໍາພາວົງ ໄດ້ຮຽກຮ້ອງໃຫ້ນັກຝຶກອົບຮົມ ຈົ່ງພ້ອມກັນຍົກສູງຄວາມຮັບຜິດຊອບ ແລະ ເຂັ້ມງວດ ໃນການປະຕິບັດໂມງເວລາ ເພື່ອໃຫ້ການຮຽນປະສົບຜົນສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້.
ການຝຶກອົບຮົມໃນຄັ້ງນີ້ ຈະໄດ້ດໍາເນີນໄປແຕ່ວັນທີ 25-27 ສິງຫາ 2026 ຈຶ່ງຈະປິດລົງ.
( ພາບ-ຂ່າວ: ລຽນສີ )
ຄໍາເຫັນ