 |
ທ່ານ ສຸກວິໄລ ພອນສາຣະແສນ ຮອງຫົວໜ້າພະກະສິກຳ ແລະ ສິ່ງແວດລ້ອມແຂວງ, ຜູ້ຊີ້ນໍ້າໂຄງການ ໄດ້ກ່າວມີຄໍາເຫັນວ່າ: ໂຄງການຄຸ້ມຄອງ ແລະ ປົກປັກຮັກສາອະນຸລັກແຫຼ່ງນໍ້າ ແລະ ສິ່ງແວດລ້ອມທຳມະຊາດ ຮ່ວມ ກັບຊຸມຊົນເຂດໜອງຟ້າ ເມືອງຊານໄຊ ໄດ້ລິເລີ່ມມາແຕ່ ປີ 2021, ເຊິ່ງໄລຍະຜ່ານມາໄດ້ມີຫຼາຍກິດຈະກຳທີ່ຈັດຕັ້ງປະຕິບັດສໍາເລັດ ເປັນຕົ້ນ ມີການຕິດຕາມກວດກາຄຸນນະພາບນໍ້າພາກສະໜາມ ແລະ ຈາກຫ້ອງທົດລອງ ໃນແຕ່ລະ ປີ (2022, 2023, 2024 ແລະ 2025) ເຫັນວ່າ: ຄຸນນະພາບນໍ້າໃນແຕ່ລະຈຸດ ແມ່ນຢູ່ໃນເກນມາດຕະຖານສິ່ງແວດລ້ອມແຫ່ງຊາດ, ໄດ້ຝຶກອົບຮົມສົ່ງເສີມສີມືແຮງງານ ແລະ ພູມປັນຍາຂອງຊຸມຊົນທ້ອງຖິ່ນ ໃນບ້ານເປົ້າໝາຍ ຂອງໂຄງການ 6 ບ້ານ ຄື: ບ້ານຢຽງດາກ, ບ້ານວັງຕັດໃຫຍ່, ບ້ານວັງຕັດນ້ອຍ, ບ້ານໜອງຟ້າ, ບ້ານດາກບອກ ແລະ ບ້ານໜອງໄກ່ໂອກ ໃນການລ້ຽງສັດໃຫ້ແກ່ປະຊາຊົນ ແລະ ເຮັດກິດຈະກຳການອະນຸລັກປ່ອຍລູກປາລົງສູ່ແຫຼງນໍ້າທໍາມະຊາດເຂດໜອງຟ້າ, ສະໜອງເບ້ຍໄມ້ (ເບ້ຍກະເຟ ແລະ ເບ້ຍໝາກມ່ວງຫິມາພານ), ພ້ອມທັງຕິດປ້າຍຊີ້ບອກ ຂອບເຂດຄຸ້ມຄອງໜອງຟ້າ.
ແນວໃດກໍດີປັດຈຸບັນເຫັນວ່າ ທີວທັດທຳມະຊາດທີ່ສວຍງາມດັ່ງກ່າວ ເລີ່ມມີການເຊື່ອມໂຊມ, ຊັບພະຍາກອນປ່າໄມ້ອ້ອມຮອບ ໜອງຟ້າຖືກບຸກລຸກຢ່າງໜັກ ເຊິ່ງເປັນສາເຫດທີ່ເຮັດໃຫ້ ຊັບພະຍາກອນທຳມະຊາດເຊື່ອມໂຊມຢ່າງໄວວາ ອາດເກີດມາຈາກຫຼາຍປັດໃຈໃນຫຼາຍໆດ້ານ ບໍ່ວ່າຈະເປັນການ ພັດທະນາເສດຖະກິດ-ສັງຄົມ ແລະ ການດໍາລົງຊີວິດຂອງປະຊາຊົນທີ່ຕິດພັນກັບທຳມະຊາດ ໂດຍສະເພາະ ແມ່ນການຖາງປ່າ, ການດໍາລົງຊີວິດຂອງປະຊາຊົນ ສ່ວນຫຼາຍຕິດພັນກັບທຳມະຊາດ ຈຶ່ງມີຜົນກະທົບທີ່ນໍາມາ ຄື: ການລັກລອບຕັດໄມ້ ແລະ ເຄື່ອງປ່າຂອງດົງ,ການລ່າສັດແບບດັບສູນ, ການພັດທະນາພື້ນຖານໂຄງລ່າງ ແລະ ອື່ນໆ ທີ່ສົ່ງຜົນກະທົບຄື: ປ່າໄມ້ຫຼຸດໜ້ອຍລົງຢ່າງໄວ, ແຫຼ່ງນໍ້າບົກແຫ້ງ ແລະ ຄຸນນະພາບນໍ້າເຊື່ອມໂຊມລົງເລື້ອຍໆ, ດັ່ງນັ້ນ ປະທານຄະນະກຳມະການປົກຄອງເມືອງຊານໄຊ ໄດ້ອອກຮ່າງລະບຽບ ວ່າດ້ວຍການຄຸ້ມຄອງ ແລະ ປົກປັກຮັກສາອະນຸລັກແຫຼງນໍ້າ ແລະ ສິ່ງແວດລ້ອມທຳມະຊາດຮ່ວມກັບຊຸມຊົນເຂດໜອງຟ້າ, ມີທັງໝົດ IV ພາກ, 17 ມາດຕາ ລະບຽບການຄຸ້ມຄອງ.
 |
ໂອກາດດຽວກັນໃນກອງປະຊຸມຜູ້ເຂົ້າຮ່ວມຍັງໄດ້ປຶກສາຫາລືແລກປ່ຽນຄໍາຄິດເຫັນ ໃສ່ຮ່າງລະບຽບການຄຸ້ມຄອງ ເປັນຕົ້ນ ຂໍ້ຫ້າມໃນເຂດທີ່ດິນບໍລິເວນນໍ້າ ແລະ ທີ່ດີນປ່າໄມ້, ມາດຕາການຕໍ່ຜູ້ລະເມີດ, ການລ່າສັດ ແລະ ຫາປາ, ການຊື້ ແລະ ຂາຍສັດນໍ້າ-ສັດປ່າ, ການເກັບເຄື່ອງປ່າຂອງດົງ, ການໃຊ້ເຄື່ອງລ່າສັດແບບທໍາລາຍ, ການຄອບຄອງອາວຸດ, ແຮ້ວ ແລະ ເຄື່ອງກັບດັກ, ປະເພດການປັບໃໝຕ່າງໆ ແລະ ຂັ້ນຕອນການດໍາເນີນປະຕິບັດຕໍ່ຜູ້ລະເມີດ.
ທັງນີ້ ກໍເພື່ອເປັນການກຳນົດ ຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງບົກປັກຮັກສາ ແຫຼ່ງນໍ້າ, ຊັບພະຍາກອນທຳມະຊາດ ແລະ ສິ່ງແວດລ້ອມ ອ້ອມຮອບໜອງຟ້າ ແບບມີສ່ວນຮ່ວມຂອງຊຸມຊົນ ເພື່ອກຳນົດເງື່ອນໄຂ ມາດຕະການ ເຮັດໃຫ້ວຽກງານດັ່ງກ່າວ ຈັດຕັ້ງປະຕິບັດໄດ້ຢ່າງຖືກຕ້ອງ ເຮັດໃຫ້ຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຮັບການປັບປຸງ ຟື້ນຟູ ຂະຫຍາຍຕົວຢ່າງມີປະສິດທິດຜົນ, ລວມທັງການຄຸ້ມຄອງປົກປັກຮັກສາ ໃຫ້ສອດຄ່ອງຕາມແຜນພັດທະນາເສດຖະກິດຂອງເມືອງຊານໄຊ.
ຂ່າວ: ທິດປະສົງ
ຄໍາເຫັນ