 |
ໂອກາດນີ້, ທ່ານ ນາງ ລີປ່າເອ່ຍ ລີບົວປາວ ກໍໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການຈັດງານມະຫະກຳກິລາຄົນພິການແຫ່ງຊາດ ຄັ້ງທີ IV ຊຶ່ງມີທັງໝົດ 7 ກຳມະການຮັບຜິດຊອບລະດັບຊາດ ພ້ອມທັງລາຍງານຜົນສຳເລັດ ໃນການກະກຽມຈັດງານດັ່ງກ່າວ ໂດຍສະເພາະໄດ້ສຳເລັດການເປີດກອງປະຊຸມລະດັບຊາດ ຄັ້ງທີ I, ສໍາເລັດຂໍ້ຕົກລົງແຕ່ງຕັ້ງຄະນະກໍາມະການຕ່າງໆ, ສໍາເລັດການຜະລິດກາຈໍ້າ (ກາປະທັບ); ສຳເລັດການລົງກວດສະຖານທີ່ພັກຂອງນັກກິລາຄົນພິການ ທີ່ຈະໃຫ້ບັນດາແຂວງພັກຢູ່: ຊຶ່ງໂຮງຮຽນມັດທະຍົມສຶກສາສົມບູນສາທິດ ມີ 36 ຫ້ອງສາມາດນໍາໃຊ້ເປັນຫ້ອງນອນໄດ້ທັງໝົດ ສະເລ່ຍຈໍານວນຄົນເຂົ້າພັກໄດ້ ຫ້ອງລະ 10 ຄົນ ສາມາດຮອງຮັບໄດ້ 360 ຄົນ ແລະ ມີຫ້ອງນ້ໍາ 3 ຈຸດ ທີ່ຕ້ອງໄດ້ສ້ອມແປງໃໝ່ທັງໝົດ; ໂຮງຮຽນປະຖົມສົມບູນສາທິດ ມີ 15 ຫ້ອງສາມາດນໍາໃຊ້ເປັນຫ້ອງນອນໄດ້ທັງໝົດ ສະເລ່ຍຈໍານວນຄົນເຂົ້າພັກໄດ້ ຫ້ອງລະ 10 ຄົນ ສາມາດຮອງຮັບໄດ້ 150 ຄົນ ແລະ ມີຫ້ອງນ້ໍາ 3 ຈຸດ ທີ່ຕ້ອງໄດ້ສ້ອມແປງໃໝ່ທັງໝົດ. ນອກຈາກນັ້ນ, ກໍຍັງສຳເລັດ ຮ່າງຂໍ້ຕົກລົງວ່າດ້ວຍການຄຸ້ມຄອງງົບປະມານ, ສຳເລັດ ຮ່າງຂໍ້ຕົກລົງວ່າດ້ວຍການຮັບຮອງໂລໂກ້, ສັດນຳໂຊກ, ຄຳຂວັນ, ຫຼຽນລາງວັນ, ບັດຄ້ອງຄໍ; ໄດ້ຈັດສັນຫ້ອງການເຮັດວຽກໃຫ້ກອງເລຂາຄະນະຮັບຜິດຊອບ ປະຈຳການຢູ່ສູນກິລາບຶງຂະຫຍອງ ເພື່ອກະກຽມງານ; ສຳເລັດຮ່າງແຜນດໍາເນີນງານ ການກະກຽມຈັດການແຂ່ງຂັນ.
ທ່ານ ນາງ ລີປ່າເອ່ຍ ລີບົວປາວ ໃຫ້ຮູ້ອີກວ່າ: ສ່ວນວຽກງານເຕັກນິກ-ຈັດການແຂ່ງຂັນ ກໍໄດ້ສຳເລັດການລົງກວດສະໜາມແຂ່ງຂັນກິລາ ຄົນພິການ ໃນຄັ້ງວັນທີ 1-3 ກໍລະກົດ 2025; ສຳເລັດການລົງຕິດຕາມ, ປັບປຸງ ແລະ ສ້ອມແປງ ສະໜາມແຂ່ງຂັນກິລາຄົນພິການ ໃນຄັ້ງວັນທີ 13 ຕຸລາ 2025; ສໍາເລັດ ກອງປະຊຸມເຕັກນິກ-ຈັດການແຂ່ງຂັນຮ່ວມກັບ 10 ສະຫະພັນກິລາຄົນພິການແຫ່ງຊາດ (ຄັ້ງທີ I); ສຳເລັດ ຮ່າງຂໍ້ກໍານົດວ່າດ້ວຍການຈັດງານມະຫະກໍາກິລາຄົນພິການແຫ່ງຊາດ ຄັ້ງທີ IV; ສໍາເລັດ ຮ່າງກົດລະບຽບການແຂ່ງຂັນ 10 ປະເພດກິລາ; ສຳເລັດຮ່າງຕາຕະລາງກຳນົດວັນ, ເວລາ ແລະ ສະຖານທີ່ແຂ່ງຂັນ ແລະ ພິທີເປີດ-ປິດ; ສຳເລັດຮ່າງຕາຕະລາງກຳນົດລາຍການແຂ່ງຂັນ ແລະ ການຈັດແບ່ງຄວາມເປັນພິການຂອງນັກກິລາ; ສໍາເລັດຮ່າງຕາຕະລາງກຳນົດຈຳນວນຫຼຽນ-ລາງວັນ; ສຳເລັດປຶ້ມຄູ່ມືການຈັດແບ່ງຄວາມເປັນພິການຂອງນັກກິລາຄົນພິການ (classification of disabilities).
 |
ໃນການແຂ່ງຂັນຄັ້ງນີ້ ກໍໄດ້ມີການກຳນົດປະເພດກິລາຄົນພິການ ທີ່ຈະເຂົ້າແຂ່ງຂັນມີທັງໝົດ 10 ປະເພດກິລາ ຄື: ຍົກນໍ້າໜັກ ຄົນພິການ (ຊາຍ-ຍິງ), ແລ່ນ-ລານ ຄົນພິການ (ຊາຍ-ຍິງ); ລອຍນໍ້າ ຄົນພິການ (ຊາຍ-ຍິງ); ເຕະບານ 5 ຄົນພິການຕາ (ຊາຍ); ບານບ້ວງລໍ້ເລື່ອນ ຄົນພິການ (ຊາຍ-ຍິງ); ໂກນບານ ຄົນພິການ (ຊາຍ-ຍິງ); ບັອດເຊຍ ຄົນພິການ (ຊາຍ-ຍິງ); ດອກປີກໄກ່ ຄົນພິການ (ຊາຍ-ຍິງ); ກະຕໍ້ ຄົນພິການ (ຊາຍ) ແລະ ກິລາຟັນດາບ ຄົນພິການ (ຊາຍ-ຍິງ). ພ້ອມກັນນັ້ນ, ກໍໄດ້ມີການກຳນົດສະໜາມແຂ່ງຂັນກິລາຄົນພິການ ຢູ່ 5 ຈຸດຄື: ມະຫາວິທະຍາໄລແຫ່ງຊາດ, ສະໜາມກິລາແຫ່ງຊາດ (ຫຼັກ 16), ສະໜາມກິລາ ບຶງຂະຫຍອງ, ສະໜາມກິລາບານສົ່ງກະຊວງປ້ອງກັນປະເທດ (ຫຼັກ 5) ແລະ ສະໜາມເຕະບານ ເບສະຫວັນ.
ຂະນະທີ່ວຽກພິທີເປີດ-ປິດ ແລະ ໂຄສະນາປະຊາສຳພັນ, ວຽກພິທີເປີດ-ປິດ ໂດຍພື້ນຖານແມ່ນນໍາໃຊ້ບຸກຄະລາກອນຈາກງານມະຫະກຳກິລາແຫ່ງຊາດ ເປັນຕົ້ນແມ່ນກ້ອນກຳລັງສວນສະໜາມ, ນາງສາວຖືປ້າຍ; ການສະແດງແມ່ນນຳໃຊ້ນັກຮຽນສຶກສາຄົນພິການນະຄອນຫຼວງວຽງຈັນ, ນັກຮຽນຈາກໂຮງຮຽນວິຊາຊີບຄົນພິການ ສີເກີດ, ຄົນພິການ ພາຍໃນນະຄອນຫຼວງວຽງຈັນ ສ່ວນສະຖານທີ່ ພິທີເປີດ-ປິດ ຄະນະກອງເລຂາ ໄດ້ຄົ້ນຄວ້າໂດຍພື້ນຖານ ກໍານົດສະໜາມກິລາໃຫຍ່ມະຫາວິທະຍາໄລແຫ່ງຊາດ ສ່ວນພິທີປິດຈະຈັດຢູ່ສະໂມສອນໃນຮົ່ມມະຫາວິທະຍາໄລແຫ່ງຊາດ.
ແຜນການກະກຽມໃນຕໍ່ໜ້າ ຈະປະກອບບຸກຄະລາກອນໃສ່ຮ່າງຂໍ້ຕົກລົງອະນຸກຳມະການຝ່າຍຕ່າງໆ; ກະກຽມ ຈັດກອງປະຊຸມ ຜ່ານຮ່າງຂໍ້ຕົກລົງວ່າດ້ວຍການຄຸ້ມຄອງງົບປະມານ ງານມະຫະກຳກິລາຄົນພິການແຫ່ງຊາດ ຄັ້ງທີ IV ນະຄອນຫຼວງວຽງຈັນ; ກະກຽມ ຈັດກອງປະຊຸມເຕັກນິກຈັດການແຂ່ງຂັນທົ່ວປະເທດ ຄັ້ງທີ I ເພື່ອຜ່ານຂໍ້ກຳນົດ, ກົດລະບຽບການແຂ່ງຂັນຂອງກິລາທຸກປະເພດທີ່ບັນຈຸເຂົ້າໃນການແຂ່ງຂັນ ແລະ ລະບຽບໃນການລົງທະບຽນນັກກິລາ. ຄາດວ່າຈະຈັດໃນວັນທີ 13 ພະຈິກ 2025 ແລະ ກໍາມະການຝ່າຍຕ່າງໆວາງແຜນວຽກຂອງຕົນ.
(ຂ່າວ-ພາບ: ສົງການ ພັນແພງດີ)
ຄໍາເຫັນ