 |
ສະຫາຍ ຄໍາເຂືອງ ໄຊຍະເສນ ຮອງຫົວໜ້າໂຮງຮຽນການເມືອງ-ການປົກຄອງແຂວງ ໃຫ້ຮູ້ວ່າ: ການຈັດຕັ້ງປະຕິບັດຫຼັກສູດການຮຽນ-ການສອນທິດສະດີການເມືອງ ຂັ້ນກາງ ຮຸ່ນທີ V ແລະ ຂັ້ນຕົ້ນ ຮຸ່ນທີ VIlI ຂອງໂຮງຮຽນການເມືອງ-ການປົກຄອງແຂວງເຊກອງ ໄດ້ສຸມໃສ່ຈັດຕັ້ງປະຕິບັດ ແລະ ເຮັດສໍາເລັດໜ້າທີ່ຕາມການມອບໝາຍ ໃນການຂຶ້ນຫ້ອງສິດສອນ ແລະ ນັກສຶກສາ ກໍໄດ້ເອົາໃຈໃສ່ຄົ້ນຄວ້າຮ່ຳຮຽນ, ຝຶກຝົນຫຼໍ່ຫຼອມຕົນເອງ ໃນດ້ານທິດສະດີມາກ-ເລນິນ, ແນວຄິດ ໄກສອນ ພົມວິຫານ ແລະ ການປະຕິບັດລະບຽບນັກສຶກສາ ຕາມໂຮງຮຽນວາງອອກຢ່າງເຂັ້ມງວດ ໂດຍຊຸດຮຽນທິດສະດີການເມືອງ ຂັ້ນກາງ ຮຸ່ນທີ V ຄັ້ງນີ້, ມີນັກສຶກສາທັງໝົດ 47 ສະຫາຍ ຍິງ 9 ສະຫາຍ, ໄດ້ຈັດຕັ້ງປະຕິບັດຫຼັກສູດການຮຽນ-ການສອນ 8 ກຸ່ມວິຊາ, ມີຈໍານວນ 14 ວິຊາ, ນໍາໃຊ້ເວລາທັງໝົດ 678 ຊົ່ວໂມງ. ສ່ວນຊຸດຮຽນທິດສະດີການເມືອງ ຂັ້ນຕົ້ນ ຮຸ່ນທີ VIlI ມີນັກສຶກສາທັງໝົດ 37 ສະຫາຍ ຍິງ 9 ສະຫາຍ, ໄດ້ຈັດຕັ້ງປະຕິບັດຫຼັກສູດການຮຽນ-ການສອນ ຈໍານວນ 11 ວິຊາ, ນໍາໃຊ້ເວລາທັງໝົດ 344 ຊົ່ວໂມງ. ໃນໂອກາດນີ້, ກໍໄດ້ເປີດຊຸດຮຽນທິດສະດີການເມືອງ ຂັ້ນຕົ້ນ ຮຸ່ນທີ lX ປະຈຳປີ 2026.
 |
ໂອກາດເຂົ້າຮ່ວມ, ສະຫາຍ ດາວສະຫວັນ ເຄືອງມີໄຊ ໄດ້ມີຄໍາເຫັນຍ້ອງຍໍຊົມເຊີຍຄູ-ອາຈານ ໃນການເຮັດໜ້າທີ່ການເມືອງ ມີຜົນສຳເລັດຕາມການມອບໝາຍ ແລະ ນັກສຶກສາ ກໍໄດ້ເອົາໃຈໃສ່ຄົ້ນຄວ້າຮໍ່າຮຽນ ດ້ວຍຄວາມອົດທົນ ພ້ອມທັງຮຽກຮ້ອງໃຫ້ບັນດານັກສຶກສາ ຈົ່ງນຳເອົາທິດສະດີ ແລະ ແນວທາງທີ່ຮຽນມາ ໄປນໍາໃຊ້ໃນພຶດຕິກໍາຕົວຈິງ ຕາມພາລະບົດບາດ ແລະ ໜ້າທີ່ຂອງຕົນ ເພື່ອປະກອບສ່ວນເຂົ້າໃນການພັດທະນາວຽກງານ ໃນກົມກອງທີ່ຕົນສັງກັດຢູ່ ກໍຄືການພັດທະນາແຂວງເຊກອງ.
(ຂ່າວ-ພາບ: ອັດສະວິນ)
ຄໍາເຫັນ