 |
ທ່ານ ຄຳ ຂັນທະວີວອນ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງວຽງຈັນ ໄດ້ກ່າວວ່າ: ໃນໄລຍະຜ່ານມາ ພະແນກສຶກສາທິການ ແລະ ກິລາແຂວງໄດ້ສົ່ງເສີມອະນຸຊົນ ແລະ ເຍົາວະຊົນ ໃຫ້ມີຄຸນສົມບັດດີ, ມີຜົນການຮຽນດີ, ມີຄວາມປະພຶດດີ ແລະ ເປັນແບບຢ່າງທີ່ດີໃນໂຮງຮຽນ ແລະ ສັງຄົມ, ພ້ອມທັງໄດ້ຊຸກຍູ້ທຸກໂຮງຮຽນນັບແຕ່ຂັ້ນອະນຸບານ, ປະຖົມສຶກສາ ແລະ ມັດທະຍົມສຶກສາ ໄດ້ດຳເນີນການປູກພືດຜັກສວນຄົວ, ປູກກ້ວຍ ແລະ ປູກຕົ້ນໄມ້ຊະນິດຕ່າງໆ ທີ່ເໝາະສົມກັບສະພາບພື້ນທີ່ ໂດຍມຸ່ງໝັ້ນໃຫ້ນັກຮຽນແຕ່ລະຄົນໄດ້ມີສ່ວນຮ່ວມໃນການປູກ ແລະ ບຳລຸງຮັກສາຕົົ້ນໄມ້ຂອງຕົນເອງ.
ໃນໂອກາດດັ່ງກ່າວ, ທ່ານ ພູທະນູເພັດ ໄຊສົມບັດ ໄດ້ກ່າວໂອ້ລົມ ແລະ ສະແດງຄວາມຍິນດີຕໍ່ຫຼານນ້ອຍເນື່ອງໃນໂອກາດວັນເດັກນ້ອຍສາກົນ, ພ້ອມທັງເນັ້ນໜັກໃຫ້ທຸກພາກສ່ວນສືບຕໍ່ເອົາໃຈໃສ່ວຽກງານດູແລ, ສຶກສາອົບຮົມ ແລະ ສ້າງສະພາບແວດລ້ອມທີ່ດີໃຫ້ເດັກນ້ອຍ ເພື່ອໃຫ້ເຕີບໂຕເປັນພົນລະເມືອງທີ່ມີຄຸນນະພາບ ແລະ ເປັນກຳລັງສຳຄັນໃນການພັດທະນາປະເທດຊາດໃນອະນາຄົດ.
ພ້ອມກັນນັ້ນ, ທ່ານ ພູທະນູເພັດ ໄຊສົມບັດ ແລະ ຄະນະ ຍັງໄດ້ຮ່ວມກິດຈະກຳປູກຕົ້ນໄມ້ພາຍໃນບໍລິເວນໂຮງຮຽນ ເພື່ອສົ່ງເສີມຂະບວນການອະນຸລັກທຳມະຊາດ, ປົກປັກຮັກສາສິ່ງແວດລ້ອມ ແລະ ສ້າງຄວາມຂຽວງາມໃຫ້ແກ່ສະຖານສຶກສາ. ກິດຈະກຳດັ່ງກ່າວຍັງເປັນການປູກຝັງຈິດສຳນຶກໃຫ້ແກ່ນັກຮຽນ ໃຫ້ຮູ້ຈັກຮັກ ແລະ ຫວງແຫນທຳມະຊາດຕັ້ງແຕ່ຍັງນ້ອຍ.
ໃນຕອນທ້າຍຂອງພິທີ ຍັງໄດ້ມີການມອບຂອງຂວັນ ໃຫ້ນັກຮຽນ ແລະ ຜູ້ປົກຄອງທີ່ເຂົ້າຮ່ວມ, ພ້ອມທັງຮັບຊົມການສະແດງສີລະປະບົດຟ້ອນລວມໝູ່ ແລະ ຮ້ອງເພງ ຈາກຫນັກຮຽນ ແລະ ມອບໃບຍ້ອງຍໍໃຫ້ແກ່ນັກຮຽນດີເດັ່ນ ຊັ້ນອະນຸບານ ແລະ ຊັ້ນປະຖົມ ພາຍໃນແຂວງວຽງຈັນ ປະຈຳສົກຮຽນ 2025-2026.
ພິທີດັ່ງກ່າວໄດ້ດຳເນີນໄປທ່າມກາງບັນຍາກາດທີ່ເບີກບານມ່ວນຊື່ນ ແລະ ອົບອຸ່ນ ທີ່ເຕັມໄປດ້ວຍຄວາມສຸກຂອງຫຼານນ້ອຍ ຊຶ່ງສະທ້ອນໃຫ້ເຫັນເຖິງຄວາມສຳຄັນທີ່ພັກ-ລັດ ແລະ ສັງຄົມ ໄດ້ໃຫ້ຕໍ່ວຽກງານພັດທະນາເດັກນ້ອຍ ແລະ ການອະນຸລັກສິ່ງແວດລ້ອມ.ຂ່າວ: ບຸນມາ
ຄໍາເຫັນ