ເນື່ອງໃນໂອກາດວັນເດັກນ້ອຍສາກົນວັນທີ 1 ມິຖຸນາທີ່ຈະມາເຖິງນີ້, ທ່ານນາງ ພຸດດາລົມ ເພັງນາມມະຈັກຜູ້ອຳນວຍການໂຮງຮຽນລ້ຽງເດັກ-ອະນຸບານ-ປະຖົມສຶກສາປັນຍາມະນີ ໄດ້ກ່າວສະແດງຄວາມຮູ້ສຶກຜ່ານສື່ມວນຊົນໃນວັນທີ 29ພຶດສະພານີ້ວ່າ: ວັນເດັກນ້ອຍສາກົນຖືເປັນວັນບຸນໃຫຍ່ສຳລັບເດັກ ເປັນວັນທີ່ມີຄວາມໝາຍສຳຄັນຕິດພັນກັບປະຫວັດສາດຂອງຊາດ ຊຶ່ງກິດຈະກຳວັນເດັກປີນີ້ທາງໂຮງຮຽນປັນຍາມະນີຈະໄດ້ຈັດຂຶ້ນໃນວັນທີ 3ມິຖຸນາ 2025 ນັບຈາກຊັ້ນລ້ຽງເດັກ ຫາ ຊັ້ນປະຖົມສຶກສາ. ໃນນັ້ນຈະໄດ້ຫວນຄືນມູນເຊື້ອປະຫວັດຄວາມເປັນມາ ການກຳເນີດເຕີບໃຫຍ່ຂະຫຍາຍຕົວຂອງວັນເດັກນ້ອຍສາກົນເພື່ອໃຫ້ເຂົາເຈົ້າຮູ້ເຖິງຄວາມໝາຍ ແລະ ຄວາມສຳຄັນຂອງເຂົາເຈົ້າພ້ອມທັງປູກຈິດສຳນຶກໃຫ້ເຂົາເຈົ້າຮູ້ຮັກສະຖາບັນຄອບຄົວ ແລະ ຮັກປະເທດຊາດຂອງຕົນ. ນອກນີ້ຍັງມີການສະແດງຂອງນ້ອງໆແຕ່ລະຊັ້ນ ບໍ່ວ່າຈະເປັນກິດຈະກຳຮັກໂລກເຊັ່ນ: ການເດີນແບບຊຸດທີ່ເຮັດຈາກສິ່ງເສດເຫຼືອ, ການປູກຕົ້ນໄມ້, ວິທີການຮັກສາຕົ້ນໄມ້, ການລະບາຍສີໃສ່ແຜ່ນເຈ້ຍ, ການສ້າງເມືອງຈຳລອງທີ່ເອີ້ນວ່າເມືອງສີຂຽວ, ກິດຈະກຳຖາມ-ຕອບວິທະຍາສາດກ່ຽວກັບສິ່ງອ້ອມຕົວ ແລະ ກິດຈະກຳມ່ວນຊື່ນອື່ນໆເປັນຕົ້ນ.
ທ່ານນາງ ພຸດດາລົມ ເພັງນາມມະຈັກ ກ່າວໃຫ້ຮູ້ອີກວ່າ: ໃນສົກຮຽນປີ 2024-2025 ນີ້, ທາງໂຮງຮຽນໄດ້ໃຫ້ການສະໜັບສະໜູນຊ່ວຍເຫຼືອ ແລະ ຮ່ວມກິດຈະກຳຫຼາກຫຼາຍກັບໂຮງຮຽນພາກລັດ ບໍ່ວ່າຈະເປັນກິດຈະກຳການຕັ້ງຄ້າຍ, ການມອບອຸປະກອນການຮຽນເປັນຕົ້ນ. ນອກຈາກນີ້, ໄດ້ຈັດໂຄງການລິເລີ່ມເພື່ອປູກຈິດສຳນຶກໃຫ້ນັກຮຽນໄດ້ຮູ້ຈັກການແຍກຂີ້ເຫຍື້ອ, ການປູກຝັງລ້ຽງສັດຈຳລອງ, ກິດຈະກຳແຂ່ງຂັນການຄິດໄລ່ຄະນິດສາດ ແລະ ກິດຈະກຳທີ່ພົວພັນເຖິງຂະນົບທຳນຽມປະເພນີວັດທະນະທຳອັນດີງາມຂອງຊາດລາວເຮົາ. ທາງໂຮງຮຽນພ້ອມສົ່ງເສີມພັດທະນານັກຮຽນທີ່ຮຽນດີ-ຮຽນເກັ່ງດ້ວຍການມອບທຶນການສຶກສາໃຫ້ນ້ອງໆທີ່ມີຜົນການຮຽນພົ້ນເດັ່ນປະຈຳປີພາຍໃຕ້ຄຳຂວັນທີ່ວ່າ “ ສອນດີ ມີວິໃນ ໃສ່ໃຈຄຸນນະພາບ” ເຂົ້າໃນວຽກງານການພັດທະນາພະນັກງານຄູ ແລະ ນັກຮຽນໃຫ້ມີເຕັກນິກການສອນທີ່ຫຼາກຫຼາຍເນັ້ນເອົານັກຮຽນເປັນຈຸດໃຈກາງໃນການສອນ, ໃຫ້ນັກຮຽນມີການຮຽນທີ່ພົ້ນເດັ່ນ, ການສະແດງອອກທີ່ກ້າຫານ ແລະ ມີຄວາມສາມາດຮອບດ້ານ. ປັດຈຸບັນພວກເຮົາມີນັກຮຽນທັງໝົດ 190 ຄົນ, ພະນັກງານຄູ 14 ຄົນ, ພະນັກງານອື່ນໆ 6 ຄົນລວມເປັນ 20 ຄົນ.
ທ່ານນາງ ພຸດດາລົມ ເພັງນາມມະຈັກ ກ່າວເນັ້ນຕື່ມອີກວ່າ: ໃນສົກຮຽນປີ 2025-2026 ທີ່ຈະມາເຖິງນີ້, ທາງໂຮງຮຽນຈະເປີດຮັບເອົານັກຮຽນໃໝ່ນັບແຕ່ເດືອນມິຖຸນາເປັນຕົ້ນໄປ ເພື່ອຮອງຮັບເອົານັກຮຽນທີ່ຮອດເກນອາຍຸເຂົ້າຮຽນ ແລະຈະນຳໃຊ້ອາຄານຮຽນຫຼັງໃໝ່ທີ່ຈະສຳເລັດການກໍ່ສ້າງໃນທ້າຍເດືອນສິງຫາ 2025 ແລະ ແຜນການຈະປັບປຸງອາຄານຫຼັງເກົ່າໃຫ້ມີຫ້ອງຮຽນທີ່ທັນສະໃໝໄປພ້ອມກັນ, ນຳເອົາໂປຣແກຣມການຮຽນກ່ຽວກັບການຄິດໄລ່ເລກໄວເຂົ້າໃນການຮຽນ-ການສອນ ແລະ ການຮຽນຄອມພິວເຕີນັບແຕ່ຊັ້ນອະນຸບານ 3 ຈົນເຖິງຊັ້ນປະຖົມສຶກສາເພື່ອພັດທະນາເດັກນ້ອຍລາວໃຫ້ເຕີບໃຫຍ່ຢ່າງມີຄຸນນະພາບປະກອບສ່ວນເຂົ້າໃນການສ້າງສາພັດທະນາປະເທດ.
ຄໍາເຫັນ