ຂຶ້ນໃນວັນທີ 22 ມັງກອນນີ້ ທີ່ໂຮງຮຽນພູນສະຫວັດ ບ້ານນາທົ່ມ ເມືອງໄຊທານີ ນວໂດຍມີທ່ານນາງ ພູນສະຫວັດ ພົງສະຫວັດ ຜູ້ອຳນວຍການໂຮງຮຽນພູນສະຫວັດ, ທ່ານນາງ ວີຄຳ ແກ້ວວີໄຊ ຜູ້ອຳນວຍການໂຮງຮຽນມັດທະຍົມສຶກສາສົມບູນສີສະຫວັດ, ໃຫ້ກຽດເຂົ້າຮ່ວມຂອງທ່ານນາງ ດຳດວນ ຈັນທະວົງ ຮອງເຈົ້າເມືອງໄຊທານີ, ທ່ານ ຂັນໄຊ ແສງສຸລີ ຮອງຫົວໜ້າພະແນກສຶກສາທິການ ແລະ ກິລາ ນວ, ມີຫົວໜ້າຫ້ອງການສຶກສາທິການ ແລະ ກິລາເມືອງໄຊທານີ ພ້ອມດ້ວຍຄະນະອຳນວຍການໂຮງຮຽນຕົວແບບຄຸນນະພາບຈາກ 11 ໂຮງຮຽນ, ຄູ-ອາຈານ, ນັກຮຽນເຂົ້າຮ່ວມ.
ທ່ານນາງ ພູນສະຫວັດ ພົງສະຫວັດ ໄດ້ໃຫ້ກຽດລາຍງານຫຍໍ້ຜົນງານການສ້າງໂຮງຮຽນຕົວແບບຄຸນນະພາບ ໂດຍປະຕິບັດຕາມຄຳຂວັນຂອງໂຮງຮຽນຄື: ການແຂ່ງຂັນ, ພາກພຽນຮຽນຮູ້, ຄຽງຄູ່ມາລະຍາດ, ຮັກຄວາມສະອາດ, ຂາດຈາກຢາເສບຕິດແລະ ຜັນຂະຫຍາຍມາເປັນ9ຂໍ້ຄື: ຝຶກສະໝອງ, ຝຶກທັກສະ, ຮຽນຮູ້ສິ່ງໃໝ່ໆ, ໂຄສະນາເຜີຍແຜ່ວຽກງານການສຶກສາ, ນໍາໃຊ້ສື່ອອນລາຍ, ສະໜັບສະໜູນສັງຄົມ, ວຽກບໍລິການ, ສົ່ງເສີມບຸກຄະລາກອນ, ສົ່ງເສີມນັກຮຽນ ຊຶ່ງມີພະນັກງານລວມທັງໝົດ 110 ຄົນ, ຄູສອນ 88 ຄົນ, ມີການຕິດຕາມ ແລະ ປະເມີນຜົນງານຂອງຄູຢ່າງເປັນລະບົບໂດຍມີຫົວໜ້າແຖວ, ຫົວໜ້າພາກ, ຄະນະບໍລິຫານ ແລະ ຄະນະອຳນວຍການ, ໜ່ວຍການກວດສອບ, ໃນສົກຮຽນ 2024-2025 ມີນັກຮຽນທັງໝົດ 1,714 ຄົນ, ລ້ຽງເດັກ 101 ຄົນ, ອະນຸບານ 549 ຄົນ, ປະຖົມ 1,064 ຄົນ, ມີ 52 ຫ້ອງຮຽນ, ລ້ຽງເດັກ 3 ຫ້ອງ, ອະນຸບານ 19 ຫ້ອງ, ປະຖົມ 30 ຫ້ອງ. ຄະນະອຳນວຍການ, ຄູ-ອາຈານ ແລະ ພະນັກງານທຸກຄົນ ຈະສືບຕໍ່ໃຫ້ຄຳໝັ້ນສັນຍາປະຕິບັດຕາມ 6 ດ້ານ 42 ຕົວຊີ້ວັດໃນຕໍ່ໜ້າດ້ວຍຄວາມເອົາໃຈໃສ່ໃຫ້ສົມກັບນາມມະຍົດໂຮງຮຽນຂຽວສະອາດ ແລະ ມີຄຸນນະພາບດີ ເພື່ອໃຫ້ສົມກັບນາມມະຍົດໂຮງຮຽນຕົວແບບຄຸນນະພາບຂອງ ນວ ຊຶ່ງໄດ້ວາງວິໃສທັດນັກຮຽນມາລະຍາດງາມ ຄູສອນນິໃສດີ ພິຖີພິຖັນເລື່ອງການສອນ ນອນໃນ 5 ຫຼັກມູນ ເພີ່ມພູນຄຸນນະພາບ ຄຽງຄູ່ວິຊາການ ວຽກງານບໍລິການຢ່າງຮອບດ້ານ ບວກລົບຄູນຫານ ອ່ານອອກຂຽນໄດ້ ຄິດໄລ່ກໍເປັນ ເນັ້ນມີຄວາມສຸກ ບຸກທະລຸກທຸກເປົ້າໝາຍ ກາຍເປັນໂຮງຮຽນຕົວແບບຄຸນນະພາບ.ຈາກນັ້ນ, ທ່ານນາງ ວີຄຳ ແກ້ວວີໄຊ ໄດ້ຂຶ້ນລາຍງານຫຍໍ້ຜົນງານການສ້າງໂຮງຮຽນຕົວແບບຄຸນນະພາບມັດທະຍົມສຶກສາສົມບູນສີສະຫວັດ.
ໃນພິທີ, ທ່ານ ບຸນນໍາ ສີສຸທຳມະວົງ ຫົວໜ້າຂະແໜງສຶກສາ ພະແນກສຶກສາທິການ ແລະ ກິລາ ນວ ຂຶ້ນຜ່ານຂໍ້ຕົກລົງວ່າດ້ວຍການອະນຸມັດເປັນໂຮງຮຽນຕົວແບບຄຸນນະພາບຂອງ ນວ ແລະ ມອບໃບຢັ້ງຢືນໂຮງຮຽນຕົວແບບຄຸນນະພາບ ຊຶ່ງພະແນກສຶກສາທິການ ແລະ ກິລາ ນວ ໄດ້ຕົກລົງເຫັນດີອອກໃບຢັ້ງຢືນໂຮງຮຽນຕົວແບບຄຸນນະພາບຈຳນວນ 13 ແຫ່ງ ຊຶ່ງໃນນີ້ມີໂຮງຮຽນປະຖົມພູນສະຫວັດ ແລະ ໂຮງຮຽນມັດທະຍົມສຶກສາສົມບູນສີສະຫວັດ ແລະ ຂໍ້ຕົກລົງຂອງເຈົ້າຄອງ ນວ ເຫັນດີມອບໃບຍ້ອງຍໍໃຫ້2 ໂຮງຮຽນດັ່ງກ່າວ.
ໃນພິທີໄດ້ມອບໃບຢັ້ງຢືນໂຮງຮຽນຕົວແບບຄຸນນະພາບຂອງ ນວ ແລະ ມອບໃບຍ້ອງຍໍໃຫ້ 2 ໂຮງຮຽນໂດຍໃຫ້ກຽດມອບຂອງທ່ານ ຂັນໄຊ ແສງສຸລີ, ທ່ານນາງ ດຳດວນ ຈັນທະວົງ ແລະ ໃຫ້ກຽດກ່າວຮັບໂດຍທ່ານນາງ ພູນສະຫວັດ ພົງສະຫວັດ ແລະ ທ່ານນາງ ວີຄຳ ແກ້ວວີໄຊ. ຈາກນັ້ນ, ຄະນະປະທານໄດ້ໃຫ້ກຽດຕັດແຖບຜ້າ, ເປີດປ້າຍ, ລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ໂຮງຮຽນຕື່ມອີກ.
ຂ່າວ: ພູວັນ, ພາບ: ບຸນຕອມ
ຄໍາເຫັນ