 |
ປະທານ ສນຊ ໄດ້ຫວນຄືນມູນເຊື້ອແຫ່ງການກຳເນີດ, ເຕີບໃຫຍ່ຂະຫຍາຍຕົວ ຂອງແນວລາວສ້າງຊາດ ຕະຫຼອດໄລຍະ 75 ປີ ທີ່ຜ່ານມາໂດຍຫຍໍ້ວ່າ: ເພື່ອຕອບສະ ໜອງຕາມຄວາມຮຽກຮ້ອງຕ້ອງການຂອງປະເທດຊາດ, ເປີດກວ້າງການເຕົ້າໂຮມກຳລັງການປະຕິວັດ, ເປີດກວ້າງກຳລັງມະຫາສາມັກຄີທົ່ວວົງຄະນາຍາດແຫ່ງຊາດ ແນວລາວອິດສະຫຼະ ຈຶ່ງໄດ້ຮັບການສ້າງຕັ້ງຂຶ້ນ ໃນວັນທີ 13 ສິງຫາ 1950 ໂດຍຜ່ານ 3 ໄລຍະປະຫວັດສາດຄື: ໄລຍະທີ 1 ເອີ້ນຊື່ວ່າ ແນວລາວອິດສະຫຼະ ແຕ່ປີ 1950-1956 ຊຶ່ງເປັນໄລຍະຕໍ່ສູ້ກູ້ຊາດ ຕ້ານຈັກກະພັດລ່າເມືອງຂຶ້ນແບບເກົ່າ; ໄລຍະທີ 2 ແຕ່ປີ 1956-1979 ປ່ຽນຊື່ເອີ້ນ ຈາກແນວລາວອິດສະຫຼະມາເປັນ ແນວລາວຮັກຊາດ, ໄລຍະນີ້ແມ່ນຕໍ່ສູ້ຕ້ານຈັກກະພັດລ່າເມືອງຂຶ້ນແບບໃໝ່ ທີ່ມີກໍາລັງພົນໃຫຍ່ໂຕ ມີອາວຸດຍຸດໂທປະກອນທັນສະໄໝ ແລະ ໄລຍະທີ 3 ແຕ່ປີ 1979 - ປັດຈຸບັນ ເອີ້ນວ່າ ແນວລາວສ້າງຊາດ; ຕະຫຼອດໄລຍະ ດັ່ງກ່າວ ແນວລາວສ້າງຊາດໄດ້ ສໍາເລັດກອງປະຊຸມໃຫຍ່ຜູ້ແທນທົ່ວປະເທດ 11 ຄັ້ງແລ້ວ ແລະ ຜົນງານຕະຫຼອດ 75 ປີຜ່ານມາ ພົ້ນເດັ່ນແຕ່ລະໄລຍະແນວລາວສ້າງຊາດໄດ້ປະຕິບັດບົດບາດເປັນຄັນທຸງເຕົ້າໂຮມຄວາມສາມັກຄີ, ປຸກລະດົມກໍາລັງແຮງຈາກປະຊາຊົນລາວບັນດາເຜົ່າແຕ່ເໜືອເຖິງໃຕ້ ຊັ້ນຄົນ ສາສະໜາ ເພດ-ໄວ ໃຫ້ເປັນໜຶ່ງດຽວ ລຸກຂຶ້ນຕໍ່ສູ້ຕ້ານສັດຕູ ທັງແບບເກົ່າ ແລະ ແບບໃໝ່ ຈົນໄດ້ຮັບໄຊຊະຈາກບັ້ນຮົບນ້ອຍ-ໃຫຍ່ ເປັນກ້າວໆມາ ຮອດວັນທີ 2 ທັນວາ 1975 ປະເທດຊາດໄດ້ຮັບການປົດປ່ອຍຢ່າງສົມບູນ, ຈາກນັ້ນມາ ແນວລາວສ້າງຊາດ ແຕ່ລະຂັ້ນທົ່ວປະເທດ ກໍສືບຕໍ່ປະຕິບັດບົດບາດເຕົ້າໂຮມຄວາມສາມັກຄີ, ສຶກສາອົບຮົມປະຊາຊົນບັນດາເຜົ່າ, ສາສະໜາ, ຊັ້ນຄົນຕ່າງໆ ນັບທັງພີ່ນ້ອງເຊື້ອສາຍລາວທີ່ດໍາລົງຊີວິດຢູ່ຕ່າງປະເທດ ພ້ອມກັນປະກອບສ່ວນຢ່າງຕັ້ງໜ້າເຂົ້າໃນສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ ຢ່າງຮອບດ້ານຕາມແນວທາງນະໂຍບາຍຂອງພັກແຕ່ລະໄລຍະ ເຮັດໃຫ້ປະເທດຊາດໄດ້ຮັບການພັດທະນາເປັນກ້າວໆມາ ຊີວິດການເປັນຢູ່ຂອງປະຊາຊົນຄ່ອຍດີຂຶ້ນ, ຫຼັງຈາກນັ້ນ, ທ່ານຍັງໄດ້ແຈ້ງໃຫ້ຮູ້ກ່ຽວກັບຜົນສຳເລັດໃນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ແລະ ເຜີຍແຜ່ບາງເນື້ອໃນທີ່ສຳຄັນຂອງບົດສູນທອນພົດທີ່ທ່ານປະທານປະເທດກ່າວຕໍ່ພິທີໂຮມຊຸມນຸມໃຫຍ່ 75 ປີ ຂອງແນວລາວສ້າງຊາດ ພ້ອມທັງໄດ້ຮຽກຮ້ອງຕື່ມວ່າ ໃຫ້ນັກຮຽນຈົ່ງເອົາໃຈໃສ່ສຶກສາຮ່ຳຮຽນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ໝັ່ນຮຽນ-ໝັ່ນຊອກຫາຄວາມຮູ້ດ້ານວິຊາສະເພາະຕ່າງໆ ແລະ ໃຫ້ຮູ້ເຖິງຜົນຮ້າຍຂອງສິ່ງເສບຕິດ ເພື່ອພ້ອມກັນຕ້ານສະກັດກັ້ນປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ.
 |
ພ້ອມກັນນີ້, ທ່ານປະທານ ສນຊ ພ້ອມດ້ວຍຄະນະ ໄດ້ມອບຄອມພິວເຕີ 4 ໜ່ວຍ, ໂປຣເຈັກເຕີ 4 ໜ່ວຍ, ຈັກຕັດຫຍ້າ 3 ເຄື່ອງ ແລະ ໂຕະ-ຕັ່ງໃນຫ້ອງຮຽນ ຈຳນວນ 200 ຊຸດ ລວມເປັນມູນຄ່າທັງໝົດ 300 ລ້ານກີບ ໃຫ້ໂຮງຮຽນ ເພື່ອນຳໄປໝູນໃຊ້ເຂົ້າໃນການສອນ-ການຮຽນ ແລະ ໄປຢ້ຽມຢາມການພັດທະນາພື້ນຖານໂຄງລ່າງຂອງໂຮງຮຽນ ຕື່ມອີກ.
ຂ່າວ+ພາບ: ເຢ
ຄໍາເຫັນ