ໂອກາດນີ້, ທ່ານ ນາງ ດາລາວອນ ກິດຕິພັນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມຂອງຄະນະຜູ້ແທນໃນຄັ້ງນີ້ ຊຶ່ງເປັນການຮັດແໜ້ນສາຍພົວພັນມິດຕະພາບ ແລະ ການຮ່ວມມືດ້ານການສຶກສາ, ໂດຍສະເພາະແມ່ນການພັດທະນາອາຊີວະສຶກສາ ລະຫວ່າງ ສປປ ລາວ ແລະ ວິທະຍາໄລວິຊາຊີບເມືອງຫຼິວໂຈວ ສປ ຈີນ ໃຫ້ມີຜົນສໍາເລັດຍິ່ງຂຶ້ນ.
ໃນການພົບປະຄັ້ງນີ້, ທັງສອງຝ່າຍໄດ້ແລກປ່ຽນຄຳຄິດຄຳເຫັນ ແລະ ທົບທວນຄືນໝາກຜົນຂອງການຮ່ວມມືໃນໄລຍະຜ່ານມາ. ພ້ອມກັນນັ້ນ, ທ່ານຮອງລັດຖະມົນຕີ ໄດ້ເນັ້ນໜັກເຖິງເນື້ອໃນ ແລະ ທິດທາງແຜນການຮ່ວມມືທີ່ສຳຄັນໃນຕໍ່ໜ້າ. ເປັນຕົ້ນ ແມ່ນການຍົກລະດັບຄຸນນະພາບອາຊີວະສຶກສາ ໂດຍເນັ້ນໃສ່ການພັດທະນາຫຼັກສູດການຮຽນ-ການສອນ ແລະ ການຝຶກອົບຮົມວິຊາຊີບ ໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານໃນປັດຈຸບັນ; ສໍາລັບການພັດທະນາບຸກຄະລາກອນ ແມ່ນສືບຕໍ່ຊຸກຍູ້ການແລກປ່ຽນຄູ-ອາຈານ, ການຍົກລະ ດັບສະມັດຖະພາບການສອນ ແລະ ການສະໜອງທຶນການສຶກສາໃຫ້ນັກສຶກສາລາວໄປສຶກສາຕໍ່ທີ່ວິທະຍາໄລວິຊາຊີບເມືອງຫຼິວໂຈວ. ສ່ວນການຮ່ວມມືດ້ານເຕັກນິກ ແລະ ເຕັກໂນໂລຊີ ແມ່ນການຖ່າຍທອດຄວາມຮູ້ ແລະ ບົດ ຮຽນຕົວຈິງຈາກ ສປ ຈີນ ເພື່ອພັດທະນາສູນຝຶກອົບຮົມວິຊາຊີບຢູ່ລາວໃຫ້ມີຄວາມທັນສະໄໝ.
ໃນຕອນທ້າຍ, ທ່ານ ເຫວີຍ ຫາຍຈິ້ນ ກໍໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານຮອງລັດຖະມົນຕີ ທີ່ໄດ້ສະຫຼະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ພ້ອມທັງຢືນຢັນວ່າ: ວິທະຍາໄລວິຊາຊີບເມືອງຫຼິວໂຈວ ຈະສືບຕໍ່ໃຫ້ການຮ່ວມມືສະໜັບສະໜູນ ແລະ ຈັດຕັ້ງຜັນຂະຫຍາຍບັນດາກິດຈະກຳຮ່ວມມືຕ່າງໆ ໃຫ້ປະກົດຜົນເປັນຈິງ ເພື່ອຮ່ວມກັນພັດທະນາຊັບພະຍາກອນມະນຸດຂອງ ສປປ ລາວ ໃຫ້ມີຄຸນນະພາບສູງຂຶ້ນໃນອະນາຄົດ.
ຂ່າວ-ພາບ: ບົວລະພາ
ຄໍາເຫັນ