ຮອງເລຂາພັກແຂວງ ລົງເບິ່ງສະຖານທີ່ຈະກໍ່ສ້າງອ່າງເກັບນ້ຳ-ຝາຍນໍ້າລົ້ນ ເມືອງຊົນນະບູລີ

ໃນວັນທີ 17-18 ຕຸລາ ຜ່ານມາ, ທ່ານ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນໍາວຽກງານການເມືອງ-ແນວຄິດ, ວຽກພັກ-ພະນັກງານ ພ້ອມດ້ວຍທີມງານຂອງແຂວງສະຫວັນນະເຂດ ໄດ້ລົງເຄື່ອນໄຫວເບິ່ງສະຖານທີ່ທີ່ມີແຜນການຈະກໍ່ສ້າງຊົນລະປະທານອ່າງເກັບນ້ຳຫ້ວຍຫີນລາດ ບ້ານຄໍາປ່າແໜ ແລະ ຝາຍນໍ້າລົ້ນແກ້ງລໍາທວາຍ ເຂດຈຸດສຸມຕັງຫວາຍ-ລໍາທວາຍ ເມືອງຊົນນະບູລີ. ໂດຍການນຳພາທາງຂອງ ທ່ານ ສຸວິໄລ ຫຼວງຊະລາດ ກໍາມະການພັກແຂວງ ເລຂາພັກເມືອງ ເຈົ້າເມືອງຊົນນະບູລີ ພ້ອມດ້ວຍຄະນະ. 
ໂອກາດນີ້, ກໍໄດ້ຮັບຟັງການລາຍງານຜົນການອອກແບບໂຄງການຊົນລະປະທານໂຄງການອ່າງເກັບນໍ້າຫ້ວຍຫີນລາດ ແລະ ຝາຍນໍ້າລົ້ນແກ້ງລໍາທວາຍ ຈາກຂະແໜງຊົນລະປະທານແຂວງ ໂດຍໃຫ້ຮູ້ວ່າ: ດ້ານໂຄງສ້າງກິດຈະການໂຄງການອ່າງເກັບນໍ້າຫ້ວຍຫີນລາດ ມີລວງຍາວຕົວເຂື່ອນ 390 ແມັດ, ລວງກວ້າງສັນເຂື່ອນ 5 ແມັດ, ລວງສູງສະເລ່ຍເຂື່ອນ 6 ແມັດ, ປະຕູເອົານໍ້າຫົວງານ 1 Unit, ທາງລະບາຍນໍ້ານອງ 1 Unit, ລະບົບສົ່ງນໍ້າດ້ວຍທໍ່ PVC 640 ແມັດ, ອ່າງໂຕ່ງ 5,5 ກິໂລຕາແມັດ, ເນື້ອທີ່ໜ້ານໍ້າ 48,8 ເຮັກຕາ, ບໍລິມາດນໍ້າທັງໝົດ 976.000 ແມັດກ້ອນ, ບໍລິມາດນໍ້າໃຊ້ 585.600 ແມັດກ້ອນ, ສະ                    ໜອງນໍ້າຕ້ານແລ້ງນາປີ 80 ເຮັກຕາ, ນາແຊງ 33 ເຮັກຕາ, ພືດລະດູແລ້ງ 25 ເຮັກຕາ, ສໍາລັບຝາຍນໍ້າລົ້ນແກ້ງລໍາທວາຍ (ເຊກົງກາມ) ດ້ານໂຄງສ້າງກິດຈະການ, ເປັນປະເພດເບຕົງຫີນຖິ້ມ, ໂຄງສ້າງເບຕົງເສີມເຫຼັກ, ລວງກວ້າງຝາຍ 6,8 ແມັດ, ລວງຍາວຝາຍ 17,2 ແມັດ, ລວງກວ້າງສັນຝາຍ 3,2 ແມັດ, ປະຕູລະບາຍຊາຍ 3 Unit ທໍ່ຄູ່ 1.000 ແມັດ, ທາງລົງເບື້ອງຊ້າຍເບຕົງເສີມເຫຼັກ 30 ແມັດ, ທາງລົງເບື້ອງຂວາເບຕົງເສີມເຫຼັກ 30 ແມັດ, ອ່າງໂຕ່ງນໍ້າ 447,6 ກິໂລຕາແມັດ, ເນື້ອທີ່ໜ້ານໍ້າ 49,24 ເຮັກຕາ, ບໍລິມາດນໍ້າເກັບກັກ 192.000 ແມັດກ້ອນ, ສາມາດສະໜອງນໍ້າໃນການຫົດເນື້ອທີ່ການຜະລິດໄດ້ 79 ເຮັກຕາ, ຖ້າຫາກວ່າ 2 ໂຄງການດັ່ງກ່າວນີ້ ສ້າງສໍາເລັດຈະເຮັດໃຫ້ປະຊາຊົນພາຍໃນຂອບເຂດໄດ້ຮັບຜົນປະໂຫຍດສູງສຸດ ຊີວິດການເປັນຢູ່ກໍຈະໄດ້ຮັບການພັດທະນາດີຂຶ້ນເລື້ອຍໆ.
    ຈາກນັ້ນ, ທ່ານຮອງເລຂາພັກແຂວງ ພ້ອມດ້ວຍການນໍາຂອງເມືອງ ກໍໄດ້ເດີນທາງໄປເບິ່ງເສັ້ນທາງແຕ່ບ້ານລໍາທວາຍ ຫາບ້ານນາຈານໃຫຍ່ທີ່ມີຄວາມຍາວ 15 ກິໂລແມັດ ທີ່ເປັນເສັ້ນທາງທຽວໄດ້ລະດູດຽວ ເຮັດໃຫ້ການສັນຈອນຂອງປະຊາຊົນພົບຄວາມຫຍຸ້ງຍາກຫຼາຍ ແລະ ໃນຕໍ່ໜ້າເສັ້ນທາງດັ່ງກ່າວນີ້ ແມ່ນຈະໄດ້ຮັບການກໍ່ສ້າງປັບປຸງຄືນໃໝ່. 
(ຂ່າວ-ພາບ: ສະຫວັນນະເຂດ)