 |
ໂອກາດດັ່ງກ່າວ ສະຫາຍ ບົວແກ້ວ ວົງຄໍາຈັນ ໄດ້ລາຍງານວ່າ: ເມືອງຕຸ້ມລານ ນອນຢູ່ໃນໂຄງການລຶບລ້າງຄວາມທຸກຍາກ ຂອງແຂວງສາລະວັນ ປະກອບມີ 37 ບ້ານ, ມີພົນລະເມືອງ 34,937 ຄົນ, ຍິງ 16,905 ຄົນ, ມີ 7,261 ຄອບຄົວ 4,448 ຫຼັງຄາເຮືອນ, ປະກອບມີ 3 ຊົນເຜົ່າ ຄື: ຊົນເຜົ່າກະຕາງກວມເອົາ 97%, ຊົນເຜົ່າລາວກວມເອົາ 1%, ເຜົ່າຕະໂອ້ຍ ກວມເອົາ 2% ພົນລະເມືອງ, ດໍາລົງຊີວິດທຳມາຫາກິນດ້ວຍຫຼາຍວີທີເປັນຕົ້ນ ແມ່ນເຮັດການຜະລິດກະສິກຳ, ປູກເຂົ້າ, ລ້ຽງສັດ, ປູກພືດ ແລະ ຕໍ່າແຜນແພ ເປັນອາຊີບຕົ້ນຕໍກວມເອົາ 90%, ຄ້າຂາຍ ແລະ ອື່ນໆ ກວມເອົາ 10%.
ຜ່ານມາຄະນະພັກແຕ່ລະຂັ້ນໄດ້ເອົາໃຈໃສ່ບູລະນະປັບປຸງກົງຈັກການຈັດຕັ້ງແຕ່ລະຂັ້ນ ຕາມຄໍາສັ່ງ 190/ຄບສພ, ມະຕິ 03/ຈບສພ, ຂອງສູນກາງພັກໃຫ້ມີຄວາມກະທັດຮັດ, ໂລ່ງລຽນ, ມີປະສິດທິພາບ ແລະ ເຂັ້ມແຂງ, ຕິດພັນກັບການປັບປຸງພາລະບົດບາດ, ກຳນົດຕຳແໜ່ງງານ, ບັນຈຸສັບຊ້ອນບຸກຄະລາກອນ ໃຫ້ສົມຄູ່ກັບໜ້າທີ່ການເມືອງໃນໄລຍະໃໝ່ ສຸມໃສ່ການສ້າງຕັ້ງຕາແສງ; ໄດ້ເອົາໃຈໃສ່ປັບປຸງ, ກໍ່ສ້າງພັກດ້ານການຈັດຕັ້ງ ໃຫ້ມີຄວາມໜັກແໜ້ນເຂັ້ມແຂງສາມາດ ປະຕິບັດບົດບາດເປັນແກນນໍາໃນລະບົບການເມືອງຢູ່ແຕ່ລະຂັ້ນ, ຂະຫຍາຍສະມາຊິກພັກ ແລະ ການຈັດຕັ້ງພັກຕິດພັນ ກັບການປັບປຸງກົງຈັກການຈັດຕັ້ງບໍລິຫານ, ປັບປຸງພາລະບົດບາດ, ສັບຊ້ອນຈັດວາງຄະນະພັກ ຂັ້ນຕ່າງໆໃຫ້ມີຄວາມເຂັ້ມແຂງ ແລະ ສອດຄ່ອງກັບຄວາມເປັນຈິງ, ທົ່ວເມືອງມີທັງໝົດ 68 ໜ່ວຍພັກ (1 ອົງຄະນະນະພັກເມືອງ ແລະ ມີ 2 ຮາກຖາກພັກ) ມີສະມາຊິກພັກທັງໝົດ 946 ສະຫາຍ, ຍິງ 151 ສະຫາຍ; ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໄດ້ເພີ່ມທະວີເອົາໃຈໃສ່ ໃນການນໍາພາ-ຊີ້ນໍາຕໍ່ກັບວຽກ ງານຢ່າງຕັ້ງໜ້າ ສາມາດສ້າງຄອບຄົວພົ້ນທຸກ ຕາມແຜນການ 5 ປີ ປະຕິບັດໄດ້ 5,338 ຄອບຄົວ, ກວມ ເອົາ 70.84% ຂອງແຜນການ; ສ້າງບ້ານພົ້ນທຸກ ໄດ້ 23 ບ້ານ, ກວມເອົາ 45.38% ຂອງແຜນການ, ປັດຈຸບັນມີ ບ້ານທຸກຍາກ 16 ບ້ານ, ກວມເອົາ 37.83% ຂອງຈໍານວນ 37 ບ້ານໃນທົ່ວເມືອງ; ສ້າງຄອບຄົວພັດທະນາ ໄດ້ 23.05%; ສ້າງບ້ານພັດທະນາ ໄດ້ 2 ບ້ານ, ກວມ 5.4% ເຊີ່ງເມືອງ ສາມາດປະຕິໄດ້ຄົບ 16 ມາດຖານ.
ສ່ວນວຽກງານ 3 ສ້າງ ໄດ້ປະເມີນການສ້າງເມືອງເປັນຫົວໜ່ວຍພັດທະນາເຂັ້ມແຂງຮອບດ້ານມີ 5 ດ້ານ, 47 ຕົວຊີ້ບອກ ຈໍານວນດ້ານທີ່ບັນລຸຕົວຊີ້ບອກ 80% ຂຶ້ນໄປ; ການກໍ່ສ້າງພັກ-ພະນັກງານລວມມີ 8 ຕົວຊີ້ບອກຜ່ານການປະເມີນເຫັນວ່າບັນລຸ 7 ຕົວຊີ້ບອກ ຍັງບໍ່ບັນລຸຕົວຊີ້ບອກທີ 2 (ຄິດໄລ່ສ່ວນຮ້ອຍເທົ່າ 87.5%) ພ້ອມກັບບາງມາດຖານອື່ນໆ ທີ່ຕ້ອງໄດ້ສືບຕໍ່ສຸມໃສ່ປັບປຸງ.
ສະຫາຍ ນາງ ບຸນທະວີ ດວງລາສີ ໄດ້ກ່າວສະແດງຄວາມຍ້ອງຍໍຊົມເຊີຍຢ່າງຈິງໃຈ ຕໍ່ຄວາມເອົາໃຈໃສ່, ຄວາມບຸກບືນ ແລະ ຄວາມພະຍາຍາມ ສູ້ຊົນຂອງຄະນະພັກ, ຄະນະນໍາ ເມືອງຕຸ້ມລານ ທີ່ໄດ້ສຸມສະຕິປັນຍາເຂົ້າໃນການຊີ້ນໍາ-ນໍາພາ ພັດທະນາທ້ອງຖິ່ນໃນໄລຍະຜ່ານມາ. ພ້ອມທັງເນັ້ນໜັກ ໃຫ້ຄະນະນໍາຂອງເມືອງຕຸ້ມລານ ສືບຕໍ່ເອົາໃຈໃສ່ຮັກສາມູນເຊື້ອຄວາມສາມັກຄີປອງດອງເປັນເອກະພາບພາຍໃນໃຫ້ໜັກແໜ້ນ, ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ ເພື່ອສືບຕໍ່ນໍາພາປະຊາຊົນບັນດາເຜົ່າ ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງພັກແຕ່ລະຂັ້ນໃຫ້ປະກົດຜົນເປັນຈິງ, ແນໃສ່ເຮັດໃຫ້ ເມືອງຕຸ້ມລານ ຫຼຸດພົ້ນອອກຈາກ ຄວາມທຸກຍາກໄປເທື່ອລະກ້າວ ແລະ ກ້າວຂຶ້ນສູ່ການພັດທະນາ ທີ່ເຂັ້ມແຂງຮອບດ້ານ.
ພາບ-ຂ່າວ: ສ.ພະຈັນ
ຄໍາເຫັນ