 |
ທ່ານ ອຳນວຍ ເຮືອງວົງສາ ລາຍງານໃຫ້ຮູ້ກ່ຽວກັບວຽກງານກໍ່ສ້າງຮາກຖານການເມືອງ, ວຽກງານພັດທະນາ ຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ໄລຍະ 5 ປີ 2021-2025 ຜ່ານມາຊຶ່ງເຮັດໃຫ້ລະບົບການເມືອງຢູ່ຂັ້ນຮາກຖານມີຄວາມເຂັ້ມແຂງ, ປະຊາຊົນບັນດາເຜົ່າຮັບຮູ້ເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ຕື່ນຕົວເຂົ້າຮ່ວມປົກປັກຮັກສາ ແລະ ພັດທະນາຊຸມຊົນ ເຮັດໃຫ້ບ້ານມີຄວາມສະຫງົບ ປອດໄພໂດຍພື້ນຖານ ແລະ ຊີວິດການເປັນຢູ່ ຂອງປະຊາຊົນນັບມື້ດີຂຶ້ນ; ໄດ້ຈັດຕັ້ງປະຕິບັດກອງທຶນພັດທະນາບ້ານ (ກພບ) ທັງໝົດ 35 ກອງທຶນ ມີສະມາຊິກທັງໝົດ 2,824 ຄົນ, ມີທຶນ 3 ຕື້ກວ່າກີບ; ການປະເມີນດໍາລັດ 348 ຂອງລັດຖະບານ ມີຄອບຄົວພົ້ນທຸກ ຈໍານວນ 11,216 ຄອບຄົວ ກວມ 97.71%, ບ້ານພົ້ນທຸກໄດ້ 100% ແລະ ຄອບຄົວພັດທະນາມີ 10,405 ຄອບຄົວ ກວມ 90.64%, ສ້າງບ້ານພັດທະນາໄດ້ 97.8%, ບ້ານໃຫຍ່ເປັນຕົວເມືອງນ້ອຍໃນຊົນນະບົດມີ 2 ບ້ານ, ມີ 9 ກຸ່ມການຜະລິດ, 1 ສະຫະກອນເກັບຊື້ຜົນຜະລິດ, 1 ສະຫະກອນສີນເຊື່ອ.
ໃນ 2023 ໄດ້ປະກາດຮັບຮອງ ບ້ານພັດທະນາ ແກ້ງເກ່ຍ ເປັນບ້ານພັດທະນາ ປະຊາຊົນຢູ່ດີ ກິນດີ ແລະ ປະກາດຮັບຮອງເມືອງບາຈຽງ ຈະເລີນສຸກ ເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ.
ໃນປີ 2026 ເມືອງບາຈຽງໄດ້ສຳເລັດການປະກາດສ້າງຕັ້ງ ຕາແສງ 100% ຊຶ່ງທົ່ວເມືອງບາຈຽງມີ 4 ຕາແສງ ຄື: ຕາແສງແກ້ງເກ່ຍ, ຕາແສງໜອງໃສ, ຕາແສງຫ້ວຍແຮ່ ແລະ ຕາແສງຫົວແຊ.
ທ່ານ ບຸນຍົງ ສູນທອນ ຮອງຫົວໜ້າຫ້ອງວ່າການແຂວງ, ຜູ້ຊີ້ນວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານສາມສ້າງ ໄດ້ເຜີຍແຜ່ມະຕິກົມການເມືອງສູນກາງພັກ ສະບັບເລກທີ 62/ຄບສພ ລົງວັນທີ 9 ກໍລະກົດ 2026 ວ່າດ້ວຍການເພີ່ມທະວີຂອງພັກຕໍ່ ວຽກງານກໍ່ສ້າງຮາກຖານການເມືອງ ວຽກງານພັດທະນາຊົນນະບົດ ແກ້ໄຂຄວາມທຸກຍາກ ແລະ ວຽກງານສາມສ້າງໃນໄລຍະໄໃໝ່.
ທ່ານ ສຸພາບ ທຳມະຮັກສາ ໄດ້ມີຄຳເຫັນຊີ້ນຳ ຕໍ່ວຽກກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານສາມສ້າງ ເພື່ອໃຫ້ວຽກງານດັ່ງກ່າວ ຢູ່ເມືອງບາຈຽງຈະເລີນສຸກມີການພັດທະນາກ້າວຂຶ້ນ, ສ້າງບັນດາຈຸດສຸມພັດທະນາ ແລະ ເປົ້າໝາຍບ້ານໃຫຍ່ກາຍເປັນຕົວເມືອງນ້ອຍຢູ່ຊົນນະບົດ ໃຫ້ມີຄວາມແທດເໝາະ, ມີປະສິດທິພາບ ແລະ ຖືກຕ້ອງ ສອດຄ່ອງກັບນິຕິກໍາຂອງພັກ ກໍຄື ແຜນການທີ່ວາງໄວ້.
ຂ່າວ,ພາບ:ເກດສະໜາ
ຄໍາເຫັນ