ຮອງ​ເລ​ຂາ​ພັກ​ແຂວງ​ຈຳ​ປາ​ສັກຊຸກ​ຍູ້ວຽກງານກໍ່ສ້າງຮາກຖານການເມືອງ-ພັດທະນາຊົນນະບົດ

ສະຫາຍ ບຸນຍັງ ສູນທອນ ຮອງຫົວໜ້າຫ້ອງວ່າການແຂວງ ຮັບຜິດຊອບວຽກງານກໍ່ສ້າງຮາກຖານການເມືອງ, ແກ້ໄຂຄວາມທຸກຍາກ ແລະ ວຽກງານ 3 ສ້າງ ໄດ້ເຜີຍແຜ່ເອກະສານມະຕິກົມການເມືອງສູນກາງພັກ ສະບັບເລກທີ 62/ຄພສພ, ລົງວັນທີ 9 ກໍລະກົດ 2026 ວ່າດ້ວຍການເພີ່ມທະວີການຊີ້ນໍາຂອງພັກຕໍ່ວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ-ແກ້ໄຂຄວາມທຸກຍາກ ແລະ ວຽກງານ 3 ສ້າງ ໃນໄລຍະໃໝ່.

ສະຫາຍ ສົມສັກ ເສົາວະລັດ ໄດ້ຜ່ານບົດລາຍງານຫຍໍ້ກ່ຽວກັບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ- ແກ້ໄຂຄວາມທຸກຍາກ ແລະ ວຽກງານ 3 ສ້າງ ໄລຍະ 5 ປີ (2021-2025), ທິດທາງກໍານົດຈຸດສຸມພັດທະນາທີ່ເປັນບຸລິມະສິດ ລະຫວ່າງສູນກາງ ແລະ ທ້ອງຖິ່ນ, ພ້ອມທັງຈຸດສຸມການສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດ ໄລຍະ 2026-2030ເຊິ່ງໄລຍະຜ່ານມາຄະນະພັກທຸກຂັ້ນ ໄດ້ສຸມໃສ່ພັດທະນາຮາກຖານ ແລະ ແກ້ໄຂຄວາມທຸກຍາກ ຜ່ານການຍົກລະດັບການຜະລິດ, ໂຄງລ່າງການສຶກສາ, ສາທາລະນະສຸກ, ວັດທະນະທຳ-ທ່ອງທ່ຽວ ແລະ ວຽກງານປ້ອງກັນຊາດ-ຄວາມສະຫງົບ, ເປັນຕົ້ນດ້ານກະສິກຳ ຜະລິດເຂົ້າໄດ້ 228,820 ໂຕນ ບັນລຸ 99% ຂອງແຜນ, ມີເຂົ້າຂາຍເປັນສິນຄ້າ 132,550 ໂຕນ ແລະ ສ້າງກຸ່ມຜະລິດກະສິກຳ 8 ກຸ່ມ ແລະ ຫັດຖະກຳ 6 ກຸ່ມ.

ດ້ານໂຄງລ່າງ ພັດທະນາເສັ້ນທາງ ເຮັດໃຫ້ 36 ບ້ານ ມີທາງທຽວໄດ້ 2 ລະດູ ກວມ 100%, ໂດຍການລະດົມທຶນປະຊາຊົນສົມທົບກັນໃນການພັດທະນາ,ດ້ານວັດທະນຳທຳ-ສັງຄົມ ສ້າງບ້ານແບບຢ່າງສາທາລະນະສຸກ 36 ບ້ານ ກວມ 100%, ບ້ານວັດທະນະທຳ 100% ແລະ ມີແຫຼ່ງທ່ອງທ່ຽວ 8 ແຫ່ງ ສາມາດດຶງດູດນັກທ່ອງທ່ຽວ 22,652 ເທື່ອຄົນ, ສ້າງລາຍຮັບ 7.67 ຕື້ກີບ.

ສຳລັບວຽກງານແກ້ໄຂຄວາມທຸກຍາກ, ທົ່ວເມືອງມີຈຳນວນຄອບຄົວທັງໝົດ7,055 ຄອບຄົວ, ໃນນີ້ມີຄອບຄົວທຸກຍາກ 160 ຄອບຄົວ ກວມ 2.60%, ສ້າງບ້ານພົ້ນທຸກໄດ້36 ບ້ານ ກວມ 100% ແລະ ບ້ານພັດທະນາ 25 ບ້ານ,ດ້ານປ້ອງກັນຊາດ-ຄວາມສະຫງົບ ໄດ້ເສີມສ້າງກຳລັງ, ອົບຮົມພະນັກງານ, ຮັກສາຄວາມສະຫງົບ ແລະ ສຸມໃສ່ແກ້ໄຂບັນຫາຢາເສບຕິດ, ສາມາດກວດກາ ແລະ ເລີກຮື້ເປົ້າໝາຍຢາເສບຕິດ 74 ລາຍ ພ້ອມຢຶດຢາບ້າ 24,952 ເມັດ.

ສ່ວນວຽກງານ 3 ສ້າງ, ໄດ້ຮັບຮອງບ້ານເປັນຫົວໜ່ວຍພັດທະນາ 33 ບ້ານ ກວມ 91.6% ແລະ ສ້າງຕັ້ງ 4 ຕາແສງສຳເລັດ 100%.ພ້ອມທັງສົ່ງພະນັກງານ 56 ສະຫາຍ ລົງຮາກຖານ ເພື່ອຊຸກຍູ້ການພັດທະນາຮອບດ້ານ.ຜົນງານດັ່ງກ່າວສະທ້ອນໃຫ້ເຫັນວ່າ ການພັດທະນາຮາກຖານ ແລະ ແກ້ໄຂຄວາມທຸກຍາກຂອງປະຊາຊົນມີຄວາມຄືບໜ້າ ແລະ ປະຊາຊົນມີສ່ວນຮ່ວມຫຼາຍຂຶ້ນ.

ສະຫາຍ ສະພາບ ທຳມະຮັກສາ ໄດ້ເນັ້ນໜັກໃຫ້ຄະນະພັກ-ອົງການປົກຄອງເມືອງ ແລະ ທຸກຮາກຖານ ສືບຕໍ່ເອົາໃຈໃສ່ຈັດຕັ້ງປະຕິບັດບັນດາຈຸດສຸມພັດທະນາ ແລະ ມາດຕະຖານຕົວເມືອງນ້ອຍໃນຊົນນະບົດໃຫ້ເກີດຜົນເປັນຮູບປະທໍາ ຖືກຕ້ອງຕາມແຜນການທີ່ວາງໄວ້ຢ່າງມີປະສິດທິຜົນທັງດ້ານປະລິມານແລະຄຸນນະພາບ.

ພາບ-ຂ່າວ: ເມືອງມຸນລະປາໂມກ