ພາຍໃຕ້ການເປັນປະທານຂອງທ່ານ ພົນເອກ ຈັນສະໝອນ ຈັນຍາລາດຮອງປະທານຜູ້ປະຈໍາການ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບສູນກາງຮອງນາຍົກລັດຖະມົນຕີ; ມີບັນດາທ່ານ ປະທານ ແລະ ຄະນະກໍາມະການປ້ອງກັນຊາດ-ປ້ອງກັນຄວາມສະຫງົບຂັ້ນແຂວງຂອງບັນດາແຂວງດັ່ງກ່າວ ພ້ອມດ້ວຍຄະນະບັນຊາກອງພົນທະຫານຮາບທີ 3 ເຂົ້າຮ່ວມ.
ໃນໂອກາດນີ້, ທ່ານ ບຸນຄົງ ຫຼ້າຈຽມພອນເຈົ້າແຂວງອຸດົມໄຊ ປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ມີຄຳເຫັນກ່າວຕ້ອນຮັບບັນດາການນຳຈາກສູນກາງ ແລະ ທ້ອງຖິ່ນ, ພ້ອມທັງ ແຈ້ງໃຫ້ຊາບຈຸດປະສົງຂອງຈັດກອງປະຊຸມໃນຄັ້ງນີ້. ຫຼັງຈາກນັ້ນ ກໍໄດ້ຕາງໜ້າໃຫ້ການນຳບັນດາແຂວງ ແລະ ກອງພົນທະຫານຮາບທີ 3ລາຍງານໃຫ້ຊາບກ່ຽວກັບຜົນການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃນຂອບເຂດຄວາມຮັບຜິດຊອບ ແຂວງອຸດົມໄຊ, ບໍ່ແກ້ວ, ຫຼວງນໍ້າທາ, ຜົ້ງສາລີ ແລະ ກອງພົນທະຫານຮາບທີ 3 ໄລຍະ 1 ປີຜ່ານມາ ເຫັນວ່າ ທຸກພາກສ່ວນໄດ້ຕັ້ງໜ້າເປັນເຈົ້າການເຄື່ອນໄຫວປະຕິບັດໜ້າທີ່ສະກັດກັ້ນ ບັນດາປະກົດການຫຍໍ້ທໍ້ໃນສັງຄົມ, ເຮັດໜ້າທີ່ເຄື່ອນໄຫວປ້ອງກັນເວນຍາມໃຫ້ມີຄວາມເປັນລະບຽບ ແລະ ມີຄວາມສະຫງົບ, ປະກອບສ່ວນສຳຄັນເຂົ້າໃນແຜນພັດທະນາເສດຖະກິດ-ສັງຄົມ ເຮັດໃຫ້ 4 ແຂວງ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍ. ສຳລັບທິດທາງແຜນວຽກຈຸດສຸມປີ 2025ແມ່ນສືບຕໍ່ເກັບກຳສະພາບການທີ່ເກີດຂຶ້ນຢູ່ສາກົນ ແລະ ພາກພື້ນ, ຕິດຕາມການເຄື່ອນໄຫວຂອງກຳລັງອິດທິປໍລະປັກ, ກຸ່ມຄົນບໍ່ດີທີ່ເຄື່ອນໄຫວຢູ່ພາຍໃນ ແລະ ຕ່າງປະເທດ ເພື່ອສືບຕໍ່ຮັບປະກັນຮັກສາໄດ້ຄວາມສະຫງົບປອດໄພ, ສັງຄົມມີສະຖຽນລະພາບຢ່າງໜັກແໜ້ນ, ຕັ້ງໜ້າແກ້ໄຂຢ່າງເດັດຂາດ ຕໍ່ບັນດາໜໍ່ແໜງທີ່ພາໃຫ້ເກີດຄວາມບໍ່ສະຫງົບຢູ່ 4 ແຂວງ ຕົກໄປຢ່າງສິ້ນເຊີງ, ສືບຕໍ່ຫັນລົງກໍ່ສ້າງຮາກຖານການເມືອງຕາມ 4 ເນື້ອໃນ, 4 ຄາດໝາຍ, ປົກປັກຮັກສາຄວາມສະຫງົບຕາມຂອບເຂດຊາຍແດນ ແລະ ເພີ່ມທະວີການຊີ້ນໍາ-ນໍາພາ ຂອງຄະນະກຳມະການ ປກຊ-ປກສ ແຕ່ລະຂັ້ນ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ມີຄວາມຊື່ສັດ ແລະ ຈົງຮັກພັກດີຕໍ່ພັກ-ຕໍ່ປະເທດຊາດ. ໃນໂອກາດນີ້, ກອງປະຊຸມຍັງໄດ້ຮັບຟັງການປະກອບຄໍາຄິດ, ຄໍາເຫັນຈາກບັນດາທ່ານຜູ້ຕາງໜ້າຄະນະກໍາມະການ ປກຊ-ປກສ ບັນດາແຂວງ, ບັນດາອົງການຂອງ 2 ກະຊວງ ປກຊ-ປກສ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຊົມເຊີຍຕໍ່ຜົນສຳເລັດ ໃນການປະຕິບັດວຽກງານ ປ້ອງກັນຊາດ-ປ້ອງກັນຄວາມສະຫງົບ ໃນໄລຍະ 1 ປີຜ່ານມາ ຢູ່ 4 ແຂວງດັ່ງກ່າວ. ອັນສໍາຄັນ, ທ່ານຮອງນາຍົກລັດຖະມົນຕີ ໄດ້ມີຄຳເຫັນເນັ້ນໜັກໃຫ້ຄະນະປ້ອງກັນຊາດ-ປ້ອງກັນຄວາມສະຫງົບ 4 ແຂວງ ຈົ່ງພ້ອມກັນປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງໜັກແໜ້ນ, ກຳແໜ້ນວຽກງານຕ່າງໆ;ຕໍ່ຕ້ານ, ທັບມ້າງກົນອຸບາຍ ແລະ ຍຸດທະສາດເຄື່ອນໄຫວຂອງກໍາລັງອິດທິກຳລັງປໍລະປັກ, ກຸ່ມຄົນບໍ່ດີ;ຮັບປະກັນພື້ນທີ່ຂອບເຂດຂອງ 4 ແຂວງ ມີຄວາມສະຫງົບ, ມີສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ;ສຸມທຸກກໍາລັງແຮງເຂົ້າໃສ່ວຽກງານຮາກຖານການເມືອງ ໃຫ້ມີຄຸນນະພາບ; ເອົາໃຈໃສ່ພິເສດຕໍ່ບັນດາເມືອງ ແລະ ບ້ານ ທີ່ມີຄວາມຫຼໍ່ແຫຼມ;ສະກັດກັ້ນກຸ່ມຄົນບໍ່ດີ ທີ່ໂຄສະນາຊວນເຊື່ອ, ຍຸແຍ່ແກ່ດຶງປະຊາຊົນ ເຄື່ອນໄຫວໄປໃນທາງທີ່ບໍ່ຖືກຕ້ອງ, ແກ້ໄຂບັນຫາຄົນບໍ່ດີທີ່ລີ້ຊ່ອນຢູ່ຕາມບ້ານ ແລະ ພື້ນທີ່ຕ່າງໆ ດ້ວຍບັນດາມາດຕະການຢ່າງຄ່ອງແຄ້ວ ແລະ ເດັດຂາດ; ຕອບຕ້ານທຸກການລະເມີດລ່ວງລໍ້າເຊື່ອມຍຶດຊາຍແດນ;ປັບປຸງກໍ່ສ້າງພັກ ໃນກຳລັງປະກອບອາວຸດ ໃຫ້ໜັກແໜ້ນທາງດ້ານການເມືອງ-ແນວຄິດ, ສືບຕໍ່ຮັບປະກັນທາງດ້ານພະລາທິການ-ເຕັກນິກ ໃຫ້ບັນດາກົມກອງ ແລະ ທ້ອງຖິ່ນ; ເອົາໃຈໃສ່ພົວພັນ ແລະ ຮ່ວມມືກັບຕ່າງປະເທດ ໂດຍສະເພາະບັນດາປະເທດເພື່ອນມິດ ໃນການແລກປ່ຽນຂໍ້ມູນຂ່າວສານ, ການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມຊາຍແດນ, ຍາດແຍ່ງການຊ່ວຍເຫຼືອດ້ານຕ່າງໆ ເພື່ອປັບປຸງ ແລະ ພັດທະນາກໍາລັງ ປກຊ-ປກສ ໃຫ້ມີຄວາມໜັກແໜ້ນເຂັ້ມແຂງຂຶ້ນຢ່າງບໍ່ຢຸດຢັ້ງ.
(ຂ່າວ-ພາບ: ກົມປະຊາສຳພັນ, ຫສນຍ)
ຄໍາເຫັນ