ທ່ານ ແກ້ວອຸດອນ ບຸດສິງຂອນຮອງປະທານສະພາປະຊາຊົນແຂວງຄໍາມ່ວນ (ຜູ້ປະຈໍາການ) ທີ່ໄດ້ລາຍງານໂດຍຍົກໃຫ້ເຫັນຜົນງານໃນແຕ່ລະດ້ານຕະຫຼອດເຖິງດ້ານດີ, ດ້ານຄົງຄ້າງ ແລະ ບົດຮຽນທີ່ຖອດຖອນໄດ້, ໂດຍສະເພາະ ພາຍຫຼັງສໍາເລັດ ກອງປະຊຸມຄັ້ງປະຖົມມະລືກຂອງສະພາປະຊາຊົນແຂວງ ຊຸດທີ V ໄດ້ສັບຊ້ອນປະທານ, ຮອງປະທານຄະນະກໍາມະການ ທີ່ເປັນກົງຈັກຂອງສະພາປະຊາຊົນແຂວງ, ສັບຊ້ອນສະມາຊິກສະພາປະຊາຊົນແຂວງ ສັງກັດເຂົ້າໃນກໍາມະການຂອງຄະນະກໍາມະການສະພາປະຊາຊົນແຂວງ ແບ່ງຄວາມຮັບຜິດຊອບພາຍໃນຄະນະປະທານສະພາປະຊາຊົນແຂວງ ແລະ ສ້າງແຜນດໍາເນີນງານຂອງຕົນ. ໃນຂະນະດຽວກັນກໍກໍາລັງ ປະຕິບັດແຜນດໍາເນີນງານ ການຕິດຕາມ ກວດກາຕາມເນື້ອໃນທີ່ໄດ້ກໍານົດໄວ້ ໃນມະຕິກອງປະຊຸມສະໄໝວິສາມັນ ຂອງສະມາຊິກສະພາແຫ່ງຊາດ ແລະ ມະຕິກອງປະຊຸມຄັ້ງປະຖົມມະລືກ ຂອງສະພາປະຊາຊົນແຂວງ ແລະ ໄດ້ຂຸ້ນຂ້ຽວ ປະສານສົມທົບກັບສະພາແຫ່ງຊາດ ເພື່ອປັບປຸງ ບັນດານິຕິກໍາຕ່າງໆ ເປັນຕົ້ນແມ່ນມະຕິວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄະນະປະຈໍາສະພາປະຊາຊົນແຂວງ, ຄະນະກໍາມະການ, ຫ້ອງວ່າການ, ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ແລະ ຫ້ອງການຊ່ວຍວຽກ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ.
ທ່ານ ບຸນຈັນ ສີວົງພັນ ໄດ້ສະເໜີໃຫ້ບັນດາທ່ານ ທີ່ເຂົ້າຮ່ວມ, ຈົ່ງພ້ອມກັນມີຄວາມຈິງໃຈລາຍງານ ແລະ ແລກປ່ຽນບົດຮຽນເຊິ່ງກັນ ແລະ ກັນ ຢ່າງກົງໄປກົງມາ, ລວມເຖິງບັນຫາອື່ນໆ ທີ່ພົວພັນເຖິງການປະຕິບັດພາລະບົດບາດ,ສິດ,ໜ້າທີ່ ຂອງຫ້ອງວ່າການສະພາໃຫ້ສະເໜີແລກປ່ຽນຮ່ວມກັນ.
ການລົງມາເຄື່ອນໄຫວເຮັດວຽກຂອງຄະນະໃນຄັ້ງນີ້ ແມ່ນປະຕິບັດຕາມມະຕິ ຂອງຄະນະປະຈຳສະພາແຫ່ງຊາດ ແລະ ແຜນການເຄື່ອນໄຫວວຽກງານ ຂອງຫ້ອງວ່າການສະພາແຫ່ງຊາດ ໃນການລົງມາຢ້ຽມຢາມ, ພົບປະ, ຕິດຕາມ, ຊຸກຍູ້, ເກັບກຳຂໍ້ມູນ ແລະ ແລກປ່ຽນບົດຮຽນ ກ່ຽວກັບການປະຕິບັດພາລະບົດບາດ,ສິດ,ໜ້າທີ່ ຂອງສະພາປະຊາຊົນຂັ້ນແຂວງ ຕາມກົດໝາຍ ວ່າດ້ວຍສະພາປະຊາຊົນຂັ້ນແຂວງ, ໂດຍສະເພາະ ແມ່ນດ້ານດີ, ຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ, ບັນຫາຄົງຄ້າງ ແລະ ທິດທາງ ແຜນການວຽກງານຈຸດສຸມໃນຕໍ່ໜ້າ ຂອງຫ້ອງວ່າການສະພາປະຊາຊົນແຂວງ. ທັງນີ້ກໍເພື່ອແນໃສ່ເຮັດໃຫ້ການເຄື່ອນໄຫວວຽກງານຂອງຫ້ອງວ່າການສະພາ ເຮັດສຳເລັດໜ້າທີ່ການເມືອງ ຂອງຕົນທີ່ໄດ້ຮັບມອບໝາຍໃຫ້ມີປະສິດທິຜົນ.
ໂອກາດດັ່ງກ່າວທ່ານ ບຸນຈັນ ສີວົງພັນ ໄດ້ມອບຄອມພິວເຕີຕັ້ງໂຕະ ພ້ອມເຄື່ອງພິມ (Printer) 1 ຊຸດ ໃຫ້ແກ່ສະພາປະຊາຊົນແຂວງຄຳມ່ວນອີກດ້ວຍ.
ຂ່າວ: ຄຳມ່ວນ
ຄໍາເຫັນ