ໃນວັນທີ 22 ກັນຍາ ຜ່ານມານີ້, ຫ້ອງວ່າການສູນກາງພັກ ໄດ້ຈັດພິທີປິດຊຸດຝຶກອົບຮົມຫຼັກສູດການບໍລິການ-ຄຸ້ມຄອງລັດ ສຳລັບຜູ້ບໍລິຫານລະດັບສູງ ໃຫ້ແກ່ພະນັກງານ ນໍາພາ-ຄຸ້ມຄອງຂັ້ນກົມພາຍໃນຫ້ອງວ່າການສູນກາງພັກ ຊຶ່ງໄດ້ດໍາເນີນເປັນເວລາ 5 ວັນ ແຕ່ວັນທີ 18-22 ກັນຍາ 2023 ໂດຍການເປັນປະທານຮ່ວມຂອງ ສະຫາຍ ຄຳຜາ ພິມມະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ ແລະ ສະຫາຍ ນິສິດ ແກ້ວປັນຍາ ຮອງເລຂາຄະນະພັກ ຮອງລັດຖະມົນຕີກະຊວງພາຍໃນ ໂດຍມີພະນັກງານນໍາພາ-ຄຸ້ມຄອງຂັ້ນກົມ ພາຍໃນຫ້ອງວ່າການສູນກາງພັກ ເຂົ້າຮ່ວມຢ່າງພ້ອມພຽງ.
ການຝຶກອົບຮົມຄັ້ງນີ້ໄດ້ຮັບສຳເລັດຜົນຢ່າງຈົບງາມ, ບັນດາຄູອາຈານ-ນັກວິທະຍາກອນ ໄດ້ເອົາໃຈໃສ່ຖ່າຍທອດບົດຮຽນຢ່າງເລິກເຊິ່ງ, ທັງທາງດ້ານການເມືອງ, ເສດຖະກິດ, ວັດທະນະທຳ ແລະ ສັງຄົມ ໂດຍມີການແລກປ່ຽນ ແລະ ຖອດຖອນບົດຮຽນທີ່ຕິດພັນກັບພຶດຕິກຳໂຕຈິງໃນການນຳພາຄຸ້ມຄອງໃນໄລຍະຜ່ານມາ ຢູ່ພາຍໃນຫ້ອງວ່າການສູນກາງພັກ. ການຝຶກອົບຮົມໃນຄັ້ງນີ້, ໄດ້ຮັບຟັງການບັນຍາຍເອກກະສານ ພ້ອມທັງຖ່າຍທອດບົດຮຽນ, ປະສົບການ ແລະ ພຶດຕິກຳຕົວຈິງໃນການນຳພາ-ຄຸ້ມຄອງບໍລິຫານວຽກງານໃນໄລຍະຜ່ານມາຂອງອະດີດການນຳອາວຸໂສທີ່ມີປະສົບການເຊັ່ນ: ທ່ານ ນາງ ບຸນເພັງ ມູນໂພໄຊ ອະດີດກຳມະການສູນກາງພັກ ອະດີດລັດຖະມົນຕີກະຊວງພາຍໃນ ແລະ ທ່ານ ສີພຸກ ວົງພັກດີ ອະດີດຮອງລັດຖະມົນຕີກະຊວງພາຍໃນ ແລະ ການນຳຫຼາຍທ່ານ.
ໂອກາດນີ້, ສະຫາຍ ຄຳຜາ ພິມມະສອນ ໄດ້ສະແດງຄວາມຍ້ອງຍໍຊົມເຊີຍມາຍັງບັນດາວິທະຍາ ກອນ ແລະ ສຳມະນາກອນ ທີ່ໄດ້ມີຄວາມເອົາໃຈໃສ່ໃນການຄົ້ນຄວ້າ ແລະ ແລກປ່ຽນບົດຮຽນຊຶ່ງກັນ ແລະ ກັນ ເຮັດໃຫ້ການຝຶກອົບຮົມຄັ້ງນີ້, ໄດ້ຮັບຜົນສຳເລັດຢ່າງຈົບງາມ ພ້ອມນັ້ນໃຫ້ບັນດາສຳມະນາກອນ ນຳເອົາບົົດຮຽນໄປໝູນໃຊ້ເຂົ້າກັບວຽກງານຂອງຫ້ອງວ່າການສູນກາງພັກ ກໍຄືວຽກງານການເປັນເສນາທິການ,ວຽກງານການປະສານງານ ແລະ ວຽກງານບໍລິການຮັບໃຊ້ໃຫ້ແກ່ການນຳຂັ້ນສູງ; ເສີມຂະຫຍາຍເນື້ອໃນ ແລະ ບົດຮຽນ ເຂົ້າໃນການຈັດຕັ້ງປະຕິບັດວຽກງານຕົວຈິງຂອງຕົນຢ່າງປະດິດສ້າງ ແລະ ມີປະສິດທິຜົນສູງຂຶ້ນ, ສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ, ເພື່ອພັດທະນາກົມກອງຕົນເອງໃຫ້ສູງຂຶ້ນ, ໂດຍສະເພາະຍົກສູງຄວາມອາດສາມາດໃນການນຳພາ ຕໍ່ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນຢ່າງເປັນເຈົ້າການ ແລະ ຈັດຕັ້ງຜັນຂະຫຍາຍວຽກງານໃນຄວາມຮັບຜິດຊອບຂອງຕົນ, ເພື່ອເປັນກໍາລັງແຮງໃຫ້ແກ່ຄະນະພັກ, ຄະນະຫ້ອງວ່າການສູນກາງພັກ ໃນການຈັດຕັ້ງປະຕິບັດບັນດາຄາດໝາຍຂອງກອງປະຊຸມໃຫຍ່ອົງຄະນະພັກຫ້ອງວ່າການສູນກາງພັກ, ແຜນພັດທະນາຫ້ອງວ່າການສູນກາງພັກ ໃຫ້ບັນລຸຕາມຈຸດປະສົງຄາດໝາຍທີ່ວາງໄວ້; ສືບຕໍ່ເອົາໃຈໃສ່ວຽກງານສ້າງຄວາມເຂັ້ມແຂງທາງດ້ານການຈັດຕັ້ງ ແລະ ບຸກຄະລາກອນ ພາຍໃນຫ້ອງວ່າການສູນກາງພັກ ກໍຄືສ້າງເງື່ອນໄຂໃຫ້ພະນັກງານໄດ້ຮ່ຳຮຽນທາງດ້ານທິດສະດີ ແລະ ພຶດຕິກຳຕົວຈິງ ໃນການນຳພາ-ຄຸ້ມຄອງ ເພື່ອຍົກສູງຄວາມຮູ້ຂອງພະນັກງານ, ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ວຽກງານໃນໄລຍະໃໝ່, ແນໃສ່ກໍ່ສ້າງພະນັກງານສືບທອດປ່ຽນແທນແຕ່ລະຂັ້ນ ໃຫ້ນັບມື້ເຂັ້ມແຂງ ແລະ ມີຄຸນນະພາບ, ຄຽງຄູ່ກັນນັ້ນ ໃຫ້ເອົາໃຈໃສ່ສືບຕໍ່ການຄົ້ນຄວ້າ ແລະ ກຳນົດເປົ້າໝາຍຜູ້ທີ່ຈະຝຶກອົບຮົມແຕ່ລະຂັ້ນໃນຊຸດຕໍ່ໄປຢ່າງເໝາະສົມ, ເພີ່ມທະວີຄວາມເປັນເຈົ້າການ ແລະ ຍົກສູງຄວາມຮັບຜິດຊອບຂອງຕົນ ໃນການສ້າງແຜນຝຶກອົບຮົມໃນຫົວຂໍ້ຕ່າງໆ ກໍຄືແຜນບຳລຸງກໍ່ສ້າງ, ແຜນພັດທະນາບຸກຄະລາກອນພາຍໃນຫ້ອງວ່າການສູນກາງພັກ ໃຫ້ໄດ້ຮັບການຍົກລະດັບເປັນກ້າວໆ.
(ຂ່າວ: ຫ້ອງວ່າການສູນກາງພັກ; ພາບ: ພັດ ລໍວັນໄຊ)
ຄໍາເຫັນ