ຮອງປະທານຄະນະກວດກາສູນກາງພັກຕິດຕາມວຽກງານກວດກາຢູ່ແຂວງຜົ້ງສາລີ

ວັນທີ24ຕຸລານີ້, ທ່ານໄຊຄໍາອຸ່ນມີໄຊຮອງປະທານຄະນະກວດກາສູນກາງພັກຮອງປະທານອົງການກວດກາແຫ່ງລັດທັງເປັນຮອງຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງພ້ອມດ້ວຍຄະນະໄດ້ລົງເຄື່ອນໄຫວພົບປະ, ຢ້ຽມຢາມ, ຕິດຕາມແລະຊຸກຍູ້ວຽກງານກວດກາຢູ່ແຂວງຜົ້ງສາລີໂດຍການຕ້ອນຮັບຂອງທ່ານບຸນທະວີສໍສຸກັນກຳມະການປະຈຳພັກແຂວງປະທານກວດກາພັກ-ລັດແຂວງ, ມີບັນດາທ່ານຫົວໜ້າ-ຮອງຫົວໜ້າພະແນກການຕ່າງໆ, ຜູ້ເຮັດວຽກງານກວດກາອ້ອມຂ້າງແຂວງ, ພ້ອມດ້ວຍຄະນະແລະພະນັກງານ-ລັດຖະກອນພາຍໃນຄະນະກວດກາພັກ-ລັດແຂວງ.
ໂອກາດນີ້, ທ່ານບຸນທະວີສໍສຸກັນປະທານກວດກາພັກ-ລັດແຂວງໄດ້ລາຍງານສະພາບການຈັດຕັ້ງປະຕິບັດການເຄື່ອນໄຫວວຽກງານກວດກາຕະຫຼອດໄລຍະກາງສະໄໝແລະທິດທາງແຜນການທ້າຍສະໄໝຮອດປີ2025ຊຶ່ງຕະຫຼອດໄລຍະການເຄື່ອນໄຫວຈັດຕັ້ງປະຕິບັດວຽກງານກວດກາພັກ-ລັດໃນກາງສະໄໝຜ່ານມາແມ່ນໄດ້ດໍາເນີນໃນເງື່ອນໄຂທີ່ທຸກພາກສ່ວນສຸມໃສ່ຈັດຕັ້ງຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີXI ຂອງພັກແລະມະຕິກອງປະຊຸມໃຫຍ່ຄັ້ງທີXI ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມຂອງແຂວງ5ປີຄັ້ງທີIX, 2ວາລະແຫ່ງຊາດຊຶ່ງຄະນະພັກ, ຄະນະກວດກາແຕ່ລະຂັ້ນໄດ້ເອົາໃຈໃສ່ກໍ່ສ້າງ-ປັບປຸງແລະຂະຫຍາຍພັກຊຶ່ງຮອດປັດຈຸບັນມີໜ່ວຍພັກທັງໝົດ866ໜ່ວຍພັກໄດ້ຕີລາຄາຈັດແບ່ງປະເພດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ503ໜ່ວຍພັກ, ກາງ343ໜ່ວຍພັກ, ອ່ອນ12ໜ່ວຍພັກ, ໄດ້ລົງຊຸກຍູ້, ຕິດຕາມ, ກວດກາປົກະຕິໃນການເຄື່ອນໄຫວຂອງພະແນກການ, ບັນດາດ່ານແລະເມືອງຕາມມະຕິຂອງສະພາປະຊາຊົນແຂວງໄດ້ທັງໝົດຈໍານວນ11ພະແນກການ, 3ດ່ານແລະ7ເມືອງ. ຜ່ານການເຄື່ອນໄຫວສາມາດຕີລາຄາການຈັດຕັ້ງປະຕິບັດພາລະບົດບາດ, ສິດແລະໜ້າທີ່ຂອງຕົນໃນການຕິດຕາມ, ກວດກາແລະຊຸກຍູ້ຂອງບັນດາຂະແໜງການອ້ອມຂ້າງແຂວງແລະເມືອງຍັງບໍ່ທັນໄດ້ຈັດຕັ້ງປະຕິບັດ, ການຕິດຕາມ, ຊຸກຍູ້ແລະແກ້ໄຂຕາມຜົນການກວດສອບຂອງບາງຂະແໜງການຍັງເຮັດບໍ່ທັນເປັນປົກກະຕິ. ໄດ້ລົງຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີຈໍານວນ2ໂຄງການລວມມູນຄ່າສັນຍາ: 449ຕື້ກ່ວາກີບ; ຜ່ານການກວດກາພົບເຫັນການຈັດຕັ້ງປະຕິບັດໂຄງການຈໍານວນໜຶ່ງຍັງບໍ່ປະຕິບັດຄົບຖ້ວນຕາມກົດໝາຍແລະລະບຽບການທີ່ກໍານົດໄວ້ເຊັ່ນ: ການດັດແກ້ແບບແຕ້ມແລະບັນດາມູນຄ່າທີ່ສະພາຮັບຮອງບໍ່ຖືກຕາມໂຕເລກຕາມການປະມູນຈັດຊື້-ຈັດຈ້າງ; ກວດກາໂຄງການລົງທຶນຂອງລັດທີ່ມີມູນຄ່າ10ຕື້ກີບລົງມາມີ168ໂຄງການ;ແມ່ນສໍາເລັດ100%. ໄດ້ເນີນການສືບສວນ-ສອບສວນຄະດີທີ່ກ່ຽວຂ້ອງກັບການສໍ້ລາດບັງຫຼວງໃນຂອບເຂດທົ່ວແຂວງທັງໝົດ1ລາຍຄະດີ, ເປົ້າໝາຍພົວພັນທັງໝົດ1ຄົນ (ພະນັກງານລັດ)ປັດຈຸບັນກໍາລັງສະຫຼຸບສໍານວນຄະດີສົ່ງໃຫ້ອົງການໄອຍະການແຂວງພົບເຫັນຜົນເສຍຫາຍທັງໝົດ2,283ຕື້ກີບ, ເກັບກູ້ຄືນໄດ້ໃນເບື້ອງຕົ້ນຈໍານວນ136ລ້ານກີບ, ຍັງຄ້າງເກັບກູ້ຄືນ2,147ຕື້ກີບ.
ໂອກາດດັ່ງກ່າວ,ທ່ານໄຊຄຳອຸ່ນມີໄຊໄດ້ມີຄຳເຫັນໂອ້ລົມພ້ອມໃຫ້ທິດຊີ້ນຳໃນບາງດ້ານຊຶ່ງກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ຄະນະກວດກາແຂວງຜົ້ງສາລີຍາດມາໄດ້ໃນໄລຍະຜ່ານມາພ້ອມກັນນັ້ນທ່ານໄດ້ເນັ້ນໃຫ້ຄະນະກວດກາແຂວງຜົ້ງສາລີເພີ່ມທະວີຈັດຕັ້ງປະຕິບັດບົດບາດຂອງວຽກງານກວດກາຂອງພັກຕາມເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີXI ຂອງພັກເພື່ອສ້າງໃຫ້ການເຄື່ອນໄຫວວຽກງານຮອບດ້ານທຸກຂະແໜງການໄດ້ຮັບປະສິດທິພາບແລະປະສິດທິຜົນ; ຄະນະພັກແຕ່ລະຂັ້ນຕ້ອງມີຄວາມຮັບຜິດຊອບຕໍ່ວຽກງານຕິດຕາມ, ກວດກາຢ່າງແຂງແຮງແລະສ້າງເງື່ອນໄຂເຮັດໃຫ້ວຽກງານຕິດຕາມ, ກວດກາພັກມີຄວາມເຂັ້ມແຂງແລະໄດ້ຮັບການຈັດຕັ້ງປະຕິບັດຢ່າງຖືກຕ້ອງ. ຕ້ອງໄດ້ເອົາໃຈໃສ່ບາງບັນຫາເປັນຕົ້ນແມ່ນໜ້າທີ່ຄວາມຮັບຜິດຊອບທາງດ້ານການເມືອງ, ເຊື່ອມຊຶມນິຕິກຳຕ່າງໆທີ່ກ່ຽວຂ້ອງກັບໜ້າທີ່ຄວາມຮັບຜິດຊອບຂອງຕົນໃຫ້ມີຄວາມຮັບຮູ້,ເຂົ້າໃຈຢ່າງຈະແຈ້ງ, ມີຈັນຍາບັນ, ຈັນຍາທຳ, ຢຶດຖືແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຈັດຕັ້ງປະຕິບັດວຽກງານໄປຕາມລະບຽບການ, ຂັ້ນຕອນ, ມີຄວາມຖືກຕ້ອງ,ໂປ່ງໃສແລະເຂັ້ມງວດ.
(ຂ່າວ-ພາບ: ແສງຄຳສາລີວັນ)