ກອງປະຊຸມເຜີຍແຜ່ນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະ ຈາຍແຫຼ່ງທຶນສູ່ທ້ອງຖິ່ນໄດ້ຈັດຂຶ້ນໃນວັນທີ 28 ກັນຍາຜ່ານມາ, ທີ່ສະໂມສອນເມືອງຫົງສາ ແຂວງໄຊຍະບູລີ ໂດຍການເປັນປະທານຂອງທ່ານ ຄໍາຫຼ້າ ຜີວວັນນາ ເຈົ້າເມືອງໆຫົງສາ, ມີທ່ານ ວາລະສິນ ດາລາພອນ ຮອງຫົວໜ້າສາຂາທະນາຄານແຫ່ງ ສປປລາວ ພາກເໜືອແຂວງຫຼວງພະບາງ ພ້ອມດ້ວຍພາກສ່ວນກ່ຽວ ຂ້ອງເຂົ້າຮ່ວມ.
ທ່ານ ຄໍາຫຼ້າ ຜີວວັນນາ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອເຜີຍແຜ່ນະໂຍບາຍສິນເຊື່ອ ເພື່ອກະຕຸ້ນເສດຖະກິດ ເພື່ອຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມສະພາແຫ່ງຊາດ ສະບັບເລກທີ 56/ສພຊ, ທິດຊີ້ນໍາຂອງລັດຖະບານເພື່ອສົ່ງເສີມ ແລະ ສະໜອງສິນເຊື່ອໃຫ້ໂຄງການລົງທຶນພັດທະນາເສດຖະກິດ-ສັງຄົມ ແລະ ທຸລະກິດພາຍໃນໃຫ້ເຂັ້ມແຂງ ແລະ ມີການຂະຫຍາຍຕົວ. ນະໂຍບາຍສິນເຊື່ອເພື່ອກະຕຸ້ນເສດຖະກິດ ເປົ້າໝາຍສຸມໃສ່ຂະແໜງການຜະລິດ, ການຄ້າ ແລະ ການບໍລິການທີ່ເປັນປາຍແຫຼມ ເພື່ອທົດແທນການນໍາເຂົ້າ- ສົ່ງເສີມການສົ່ງອອກສິນຄ້າ, ການສ້າງວຽກເຮັດງານທໍາ ປະກອບສ່ວນເຂົ້າໃນການຮັກສາສະຖຽນລະພາບດ້ານການເງິນ-ເງິນຕາໃຫ້ເຂັ້ມແຂງ ແລະ ການພັດທະນາເສດຖະກິດໃຫ້ມີການຂະຫຍາຍຕົວແບບຍືນຍົງ ແນ່ໃສ່ສ້າງເງື່ອນໄຂໃຫ້ຫົວໜ່ວຍທຸລະກິດ ໃນຂະແໜງບູລິມະສິດຂອງລັດ ສາມາດເຂົ້າເຖີງແຫຼ່ງທຶນທີ່ເໝາະສົມ. ນະໂຍບາຍສິນເຊື່ອ ເພື່ອກະຕຸ້ນເສດຖະກິດແບ່ງອອກເປັນ 2 ນະໂຍບາຍຍ່ອຍຄື: ນະໂຍບາຍເພື່ອກະຕຸ້ນເສດຖະກິດ ແລະ ນະໂຍບາຍເພື່ອກະຈາຍແຫຼ່ງທຶນສູ່ທ້ອງຖິ່ນ. ພ້ອມນັ້ນຜູ້ເຂົ້າຮ່ວມໄດ້ແລກປ່ຽນຄໍາຄິດຄໍາເຫັນເພື່ອໃຫ້ເຂົ້າໃຈເນື້ອໃນຕ່າງໆຂອງ 2 ນະໂຍບາຍດັ່ງກ່າວ ລວມທັງຂັ້ນຕອນໃນການຈັດຕັ້ງປະຕິບັດຢ່າງເລິກເຊີ່ງ ເພື່ອນໍາໄປຈັດຕັ້ງປະຕິບັດຢ່າງມີປະສິດທິຜົນ.
ຂ່າວ-ພາບ: ບຸນປອນ ສຸກສົມບັດ
ຄໍາເຫັນ