 |
ໂອກາດນີ້, ທ່ານ ນາງ ລີວົງ ລາວລີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານ ກົວຈ້ຽນຜິງ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຊຶ່ງເປັນຂີດໝາຍທີ່ສຳຄັນ ໃນການຫັນເອົາການພົວພັນຮ່ວມມືແບບຄູ່ຮ່ວມຊາຕາກຳລາວ-ຈີນ ເຂົ້າມາສູ່ການປະຕິບັດຕົວຈິງໃນຂົງເຂດການພັດທະນາຊັບພະຍາກອນມະນຸດ ແລະ ວິຊາການດ້ານກົດໝາຍ, ພ້ອມທັງສະແດງຄວາມເຊື່ອໝັ້ນຢ່າງໜັກແໜ້ນວ່າ ໝາກຜົນຂອງການພົບປະໃນຄັ້ງນີ້, ຈະເປັນແຮງຊຸກດັນອັນສຳຄັນ ໃນການຮັດແໜ້ນສາຍພົວພັນມິດຕະພາບ ແລະ ການເປັນຄູ່ຮ່ວມຊາຕາກຳ ລາວ-ຈີນ ໃຫ້ນັບມື້ແຕກດອກອອກຜົນ ແລະ ຍືນຍົງຕະຫຼອດໄປ. ພ້ອມນີ້, ທ່ານ ນາງ ລີວົງ ລາວລີ ຍັງໄດ້ຕີລາຄາສູງຕໍ່ໝາກຜົນແຫ່ງການຮ່ວມມືສອງຝ່າຍ ລະຫວ່າງ ອົງການໄອຍະການປະຊາຊົນສູງສຸດ ແລະ ມະຫາວິທະຍາໄລສ້າງຄູກວາງຊີ ຕະຫຼອດໄລຍະ 11 ປີທີ່ຜ່ານມາ ຊຶ່ງໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ຍາດໄດ້ຜົນສຳເລັດຢ່າງຈົບງາມ. ໝາກຜົນທີ່ກ່າວມານັ້ນ, ບໍ່ພຽງແຕ່ສະແດງເຖິງໂຕເລກຂອງຄວາມສຳເລັດເທົ່ານັ້ນ, ແຕ່ຍັງເປັນສິ່ງຢືນຢັນເຖິງຄວາມເປັນນ້ຳໜຶ່ງໃຈດຽວ ແລະ ຄວາມມຸ່ງໝັ້ນອັນແຮງກ້າຂອງພວກເຮົາ ໃນການຮ່ວມກັນພັດທະນາລະບົບຍຸຕິທຳ ໃຫ້ມີຄວາມເຂັ້ມແຂງ, ສັກສິດ ແລະ ທັນສະໄໝຂຶ້ນໄປເລື້ອຍໆ. ພ້ອມນີ້, ທ່ານ ຫົວໜ້າ ອອປສ ຍັງໄດ້ສະແດງຄວາມຂອບໃຈຕໍ່ມະຫາວິທະຍາໄລສ້າງຄູກວາງຊີ ທີ່ໄດ້ໃຫ້ການສະໜັບສະໜູນຊ່ວຍເຫຼືອສ້າງຊັບພະຍາກອນມະນຸດ ໃຫ້ ສປປ ລາວ ມາໂດຍຕະຫຼອດ. ພ້ອມທັງອວຍ ພອນໃຫ້ສາຍພົວພັນມິດຕະພາບ, ຄວາມສາມັກຄີຖານຄູ່ຮ່ວມຊາຕາກຳ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ໂດຍສະເພາະ ລະຫວ່າງອົງການໄອຍະການປະຊາຊົນສູງສຸດແຫ່ງ ສປປ ລາວ ກັບມະຫາວິທະຍາໄລສ້າງຄູກວາງຊີ ຈົ່ງໝັ້ນຄົງຂະໜົງແກ່ນຊົ່ວກາລະນານ.
 |
ທ່ານ ກົວຈ້ຽນຜິງ ກໍໄດ້ສະແດງຄວາມຂອບໃຈມາຍັງທ່ານ ນາງ ລີວົງ ລາວລີ ທີ່ໃຫ້ການຕ້ອນຮັບຢ່າງອົບອຸ່ນ, ພ້ອມທັງຕີລາຄາສູງ ແລະ ຍົກໃຫ້ເຫັນຜົນສຳເລັດຂອງການພົວພົວພັນຮ່ວມມືໃນດ້ານຕ່າງໆ ລະຫວ່າງມະຫາວິທະຍາໄລສ້າງຄູກວາງຊີ ແລະ ອົງການໄອຍະການປະຊາຊົນສູງສຸດໃນໄລຍະຜ່ານມາ ຊຶ່ງມີຜົນສຳເລັດຢ່າງເປັນຮູບປະທຳໃນຫຼາຍດ້ານ. ພ້ອມນີ້, ທ່ານຍັງໄດ້ສະແດງຄວາມຊົມເຊີຍທ່ານ ນາງ ລີວົງ ລາວລີ ທີ່ໄດ້ຮັບເລືອກຕັ້ງໃຫ້ມາເປັນຫົວໜ້າ ອອປສ ຄົນໃໝ່ ແລະ ໄດ້ສະແດງຄວາມເຊື່ອໝັ້ນວ່າ ພາຍໃຕ້ການນໍາພາຂອງທ່ານ ແລະ ການສະໜັບສະໜູນຈາກຄະນະນໍາຊຸດໃໝ່ ຈະເຮັດໃຫ້ ອອປສ ແຫ່ງ ສປປ ລາວ ເຕີບໃຫຍ່ຂະຫຍາຍຕົວ, ໝັ້ນຄົງຂະໜົງແກ່ນ ແລະ ກວ້າງຂວາງຂຶ້ນຕື່ມຢ່າງແນ່ນອນ.
ໂອກາດດຽວກັນນີ້, ຄະນະຜູ້ແທນ ສປ ຈີນ ຍັງໄດ້ຮ່ວມລົງນາມຕໍ່ອາຍຸສັນຍາ MOU ຮ່ວມກັບຄະນະນຳ ອອປສ ໂດຍການຮ່ວມລົງນາມລະຫວ່າງທ່ານ ບຸນມາ ດວງມາລາສິນ ຫົວໜ້າກົມຈັດຕັ້ງ ອອປສ ແລະ ທ່ານ ກົວຈ້ຽນຜິງ ຄະນະບໍດີຄະນະກົດໝາຍ ມະຫາວິທະຍາໄລສ້າງຄູກວາງຊີ ສປ ຈີນ ໂດຍມີພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.
ຂ່າວ-ພາບ: ທະນູທອງ
ຄໍາເຫັນ