ຄຳແນະນໍາຂອງຄະນະເລຂາທິການສູນກາງພັກຂຶ້ນໃນວັນທີ16ສິງຫານີ້ທີ່ ກະຊວງດັ່ງກ່າວ, ໂດຍການເປັນປະທານຂອງສະຫາຍນາງໃບຄຳ ຂັດທິຍະເລຂາຄະນະພັກລັດຖະມົນຕີກະຊວງຮສສ, ມີບັນດາສະຫາຍຮອງລັດຖະມົນຕີ, ຫົວໜ້າກົມ-ຮອງກົມ, ບັນດາສະຫາຍສະມາຊິກພັກ-ພະນັກງານກະຊວງຮສສເຂົ້າຮ່ວມຮັບຟັງ.
ການເຜີຍແຜ່ເຊື່ອມຊຶມໃນຄັ້ງນີ້, ສະຫາຍນາງໃບຄຳ ຂັດທິຍະໄດ້ຍົກໃຫ້ເຫັນມະຕິກອງປະຊຸມ ດັ່ງກ່າວ 6 ຫົວຂໍ້ສຳຄັນຄື: ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນປີແລະທິດທາງແຜນການ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນແລະວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ. ໃນນີ້, ໄດ້ໃຫ້ຮູ້ເຖິງ 9 ວຽກງານຈຸດສຸມໃນ 6 ເດືອນທ້າຍປີ 2024; ການປະຕິຮູບລັດວິສາຫະກິດໄດ້ມີການຕີລາຄາຢ່າງກົງໄປກົງມາຕໍ່ສະພາບການດຳເນີນທຸລະກິດຂອງລັດວິສາຫະກິດໃນໄລຍະຜ່ານມາພ້ອມທັງໃຫ້ທັດສະນະຕ້ອງສືບຕໍ່ຢຶດໝັ້ນແນວທາງການສ້າງເສດຖະກິດລັດກໍຄືສ້າງລັດວິສາຫະກິດໃຫ້ມີຄວາມເຂັ້ມແຂງເປັນເຈົ້າພາທາງໃນລະບົບເສດຖະກິດແຫ່ງຊາດແລະເປັນເອກະພາບກຳນົດ 5 ຈຸດສຸມປະຕິຮູບລັດວິສາຫະກິດໃຫ້ເຂັ້ມແຂງໃນຕໍ່ໜ້າ; ໄດ້ຕີລາຄາກ່ຽວກັບການຍົກສູງຄຸນນະພາບການດຳເນີນຄະດີຕາມຂະບວນຍຸຕິທໍາ, ຕາມມະຕິເລກທີ 112/ກມສພ, ລົງວັນທີ 2 ມິຖຸນາ 2020 ຂອງກົມການເມືອງສູນກາງພັກຊຶ່ງມະຕິກອງປະຊຸມແມ່ນໄດ້ເປັນເອກະພາບຕີລາຄາສູງຕໍ່ບັນດາຜົນສຳເລັດທີ່ອົງການຮັບຜິດຊອບດຳເນີນຄະດີຕາມຂະບວນຍຸຕິທໍາຍາດມາໄດ້ພ້ອມດຽວກັນກໍໃຫ້ 7 ທິດຊີ້ນໍາບັນຫາຈໍານວນໜຶ່ງ; ກ່ຽວກັບການປັບປຸງຄຸນນະພາບການສຶກສາແລະແກ້ໄຂບັນຫາການປະລະການຮຽນ, ການຂາດແຄນຄູສອນຊຶ່ງມະຕິກອງປະຊຸມໄດ້ເນັ້ນໜັກໃຫ້ເອົາໃຈໃສ່ 3 ບັນຫາສຳຄັນ; ການກະກຽມເອກະສານຕົ້ນຕໍຂອງກອງປະຊຸມໃຫຍ່ຄັ້ງທີ XII ຂອງພັກແລະບັນດາວຽກຈຸດສຸມການຈັດຕັ້ງປະຕິບັດແຕ່ນີ້ຮອດກອງປະຊຸມຄົບຄະນະຄັ້ງທີ 9 ໃນທ້າຍປີ 2024.ການເຜີຍແຜ່ເຊື່ອມຊຶມໃນຄັ້ງນີ້, ເພື່ອໃຫ້ຜູ້ເຂົ້າຮ່ວມກຳແໜ້ນ ໄດ້ເນື້ອໃນພ້ອມກັນສຸມໃສ່ສ້າງຄວາມຮັບຮູ້, ເຂົ້າໃຈ ທັງເປັນການເພີ່ມທະວີຄວາມຮັບຜິດຊອບ ເພື່ອຈັດ ຕັ້ງປະຕິບັດໜ້າທີການເມືອງໃຫ້ມີຄວາມສຳເລັດ ທັງມີປະສິດທິພາບ ແລະ ປະສິດທິຜົນ.
ຂ່າວ-ພາບ: ວັນເພັງ
ຄໍາເຫັນ