ນັກວິເຄາະຊີ້ວ່າ ອະນາຄົດທາງເສດຖະກິດຂອງການາດາຂຶ້ນກັບວິທີການຈັດການ ແລະ ຄວາມສຳພັນກັບ ສປ ຈີນ ຢ່າງມີຍຸດທະສາດ. ການເດີນທາງມາປັກກິ່ງຂອງ ຄາເນ (Carney) ເຫັນວ່າເປັນການຕັດສິນໃຈຢ່າງແນ່ນອນ ເພື່ອຍອມຮັບຄວາມເປັນຈິງນັ້ນ ແທນທີ່ຈະຫຼີກເວັ້ນມັນ.

ສຳລັບການາດາ ຕະຫຼາດຈີນບໍ່ເປັນພຽງຕະຫຼາດ “ທາງເລືອກ” ແຕ່ເປັນປັດໃຈໂຄງສ້າງທີ່ສຳຄັນຕໍ່ແບບແຜນການເຕີບໂຕ ການກະຈາຍຕະຫຼາດ ແລະ ຄວາມສາມາດແຂ່ງຂັນໃນລະຍະຍາວ.

ນັກເສດຖະສາດທ່ານໜຶ່ງໄດ້ກ່າວວ່າ ຕະຫຼາດຂອງຈີນເປັນໜຶ່ງ ຕະຫຼາດໃນໂລກທີ່ສາມາດຮອງຮັບການສົ່ງອອກຈາກການາດາໃນປະລິມານຫຼາຍ ແລະ ໃນລາຄາທີ່ຊ່ວຍຮັກສາມາດຕະຖານຊີວິດທີ່ສູງ. ສິນຄ້າຕັ້ງແຕ່ນ້ຳມັນພືດ canola ແລະ ກຸ້ງລອບສເຕີ ໄປຈົນເຖິງ LNG ແລະ ແຮ່ທາດສຳຄັນ ຕ່າງກໍ່ມີຄວາມຕ້ອງການຈາກຈີນຫຼາຍຂຶ້ນ.

ຕາມລາຍງານຂອງ Reuters ພາຍໃນອາທິດຜ່ານມານີ້ການເດີນທາງ ຜູ້ນຳເຂົ້າສິນຄ້າ ສປ ຈີນໄດ້ຊື້ສິນຄ້າ canola ຈາກການາດາປະມານ 10 ລຳ ລວມປະມານ 650,000 ຕັນ. ຕົວເລກນີ້ຄິດເປັນເປີເຊັນແມ່ນຫຼາຍກວ່າ 10% ຂອງການນຳເຂົ້າ canola ຂອງຈີນໃນປີ 2024 ແລະ ປະມານ 26% ຂອງການນຳເຂົ້າໃນປີກ່ອນ.

ນອກຈາກນັ້ນ ຫຼັງຈາກການເດີນທາງໄປປັກກິ່ງ ຈີນຍັງໄດ້ເປີດຕະຫຼາດຊິ້ນງົວຄືນໃຫ້ກັບສະຖານປະກອບການຊິ້ນສັດຂອງການາດາ ຈຳນວນ 20 ແຫ່ງ ເຮັດໃຫ້ການາດາສາມາດເຂົ້າເຖິງຕະຫຼາດນຳເຂົ້າຊິ້ນສັດທີ່ໃຫຍ່ທີ່ສຸດໃນໂລກ. ກ່ອນທີ່ການສົ່ງອອກຈະຖືກຢຸດຕິໃນປີ 2021 ມູນຄ່າການສົ່ງອອກຊິ້ນງົວຂອງການາດາໄປຈີນມີປະມານ 200 ລ້ານໂດລາຕໍ່ປີ.

ທ່ານ ທາຍເລີ ຟູລທອນ (Tyler Fulton) ປະທານສະມາຄົມຜູ້ລ້ຽງງົວການາດາ ກ່າວວ່າ: “ພວກເຮົາດີໃຈທີ່ໄດ້ເຫັນການເຂົ້າສູ່ຕະຫຼາດຈີນອີກຄັ້ງ ເຊິ່ງເປັນໜຶ່ງໃນຕະຫຼາດສົ່ງອອກຊິ້ນງົວທີ່ໃຫຍ່ທີ່ສຸດ. ທຸກຕະຫຼາດມີຄວາມສຳຄັນຕໍ່ຊາວກະສິກອນ ແລະ ຜູ້ລ້ຽງງົວ ເພາະມັນຊ່ວຍສະໜັບສະໜູນຄວາມຟື້ນໂຕໄດ້ ແລະ ການເຕີບໂຕທາງດ້ານອຸດສາຫະກຳ.”

ສປ ຈີນ ຍັງໄດ້ຟື້ນຟູການເຂົ້າຕະຫຼາດສຳລັບຊິ້ນໝູຂອງ ການາດາ ແລະ ແນວພັນງົວຈາກສະຖານຜູ້ປະກອບການທີ່ໄດ້ຮັບການອະນຸມັດ ພ້ອມທັງໃຫ້ຄຳມັ່ນສັນຍາວ່າຈະເລັ່ງການເປີດຕະຫຼາດສຳລັບອາຫານຂອງສັດລ້ຽງຈາກການາດາອີກຄັ້ງ ໂດຍລວມມີທັງອາຫານສັດທີ່ຜ່ານການແປຮູບ ອາຫານກະປ໋ອງ ແລະ ຫົວອາຫານສັດ ມາດຕະການເຫຼົ່ານີ້ຊ່ວຍເສີມສ້າງຄວາມຕ້ອງການສິນຄ້າ ຊ່ວຍຮັກສາລາຄາໃຫ້ມີຄວາມສະຖຽນ ແລະ ສ້າງໂອກາດການຂາຍທີ່ໝັ້ນຄົງຫຼາຍຂຶ້ນ ໃຫ້ແກ່ຊາວກະສິກອນທົ່ວປະເທດ.

ທ່ານ ມານິນເດີ ສິດຮູ (Maninder Sidhu) ລັດຖະມົນຕີການຄ້າລະຫວ່າງປະເທດຂອງການາດາໄດ້ກ່າວວ່າ ຜ່ານແນວທາງການຮ່ວມມືຢ່າງປະຕິບັດໄດ້ຈິງກັບ ສປ ຈີນ ການາດາກຳລັງໄດ້ຮັບຜົນທີ່ດີທາງການຄ້າທີ່ເຫັນໄດ້ຊັດເຈນ. ທ່ານກ່າວອີກວ່າ ມາດຕະການເຫຼົ່ານີ້ໄດ້ເປີດຕະຫຼາດໃຫຍ່ໃຫ້ກັບຊາວກະສິກອນ ແລະ ຊາວປະມົງ ຂອງການາດາ ພ້ອມທັງສ້າງໂອກາດທາງທຸລະກິດໃໝ່ ແລະ ຊ່ວຍສົ່ງເສີມການຈ້າງງານໃນປະເທດ ພ້ອມທັງຮັກສາຄວາມສາມາດແຂ່ງຂັນຂອງການາດາໃນຕະຫຼາດໂລກອີກດ້ວຍ.

ໃນຂະນະດຽວກັນຍທ່ານ ມາກ ຄາເນ (Mark Carney) ກໍກຳລັງພະຍາຍາມກະຈາຍຕະຫຼາດສົ່ງອອກພະລັງງານຂອງການາດາ ໃຫ້ຫ່າງຈາກການເພິ່ງພາ ບາງປະເທດ. ໃນນີ້ ຄວາມຕ້ອງການຈາກຈີນຕໍ່ LNG ພະລັງງານທີ່ສະອາດ ແລະ ແຮ່ທາດສຳຄັນສຳລັບການຜະລິດແບັດເຕີຣີ ແລະ ລົດໄຟຟ້າ ຈະກາຍເປັນປັດໃຈສຳຄັນ. ຕາມລາຍງານຂອງ ບລູມເບີກ (Bloomberg) ການສົ່ງອອກນ້ຳມັນດິບຂອງການາດາໄປຈີນເພີ່ມຂຶ້ນ 84% ໃນໄລຍະພຽງ 1 ປີ ຫຼັງຈາກການເປີດໃຊ້ທໍ່ສົ່ງນ້ຳມັນ (Trans Mountain) ທີ່ຂະຫຍາຍໃໝ່ ແລະ ຈີນກາຍເປັນຜູ້ຊື້ນ້ຳມັນດິບຂອງການາດາຫຼາຍທີ່ສຸດ.

ນອກຈາກນັ້ນ ການລົງທຶນ ແລະ ການຮ່ວມມືດ້ານເທັກໂນໂລຊີຈາກ ສປ ຈີນ ອາດຊ່ວຍໃຫ້ໂຄງການແຮ່ທາດສຳຄັນຕ່າງໆ ຂອງການາດາຂະຫຍາຍຂະໜາດໄດ້. ທ່ານ ເມລານີ ໂຈລີ (Mélanie Joly) ລັດຖະມົນຕີອຸດສາຫະກຳຂອງການາດາ ກ່າວວ່າ ອຸດສາຫະກຳລົດຍົນເປັນເສົາຫຼັກຂອງພະລັງທາງເສດຖະກິດ ແລະ ການຜະລິດທີ່ທັນສະໄໝຂອງປະເທດ. ຂໍ້ຕົກລົງກັບຈີນຈະເປີດໂອກາດການຄ້າ ແລະ ການລົງທຶນໃໝ່ ພ້ອມທັງຊ່ວຍວາງຕຳແໜ່ງໃຫ້ການາດາເປັນພາກສ່ວນທີ່ໜ້າເຊື່ອຖືໃນການຜະລິດຍານພາຫະນະລຸ່ນໃໝ່.

ນັກວິເຄາະຍັງໄດ້ກ່າວອີກວ່າ; ການພັດທະນາຄວາມຮ່ວມມື ລະຫວ່າງ ການາດາ– ສປ ຈີນ ຢ່າງເລິກເຊິ່ງນີ້ ຈະຊ່ວຍກະຈາຍຕະຫຼາດສົ່ງອອກ ເພື່ອຫຼຸດຜົນກະທົບຈາກພາສີ ຫຼື ມາດຕະການການຄ້າຂອງປະເທດໃດໜຶ່ງ. ພ້ອມກັນນັ້ນ ຍັງຊ່ວຍດຶງດູດແຫຼ່ງທຶນລົງທຶນໃໝ່ ເພື່ອພັດທະນາໂຄງສ້າງພື້ນຖານ ອຸດສາຫະກຳ ແລະ ເຄືອຂ່າຍດິຈິຕອນ ພ້ອມທັງຊ່ວຍສົ່ງເສີມການປ່ຽນຜ່ານດ້ານພະລັງງານ.

ໃນໂລກທີ່ກຳລັງແຕກແຍກເປັນກຸ່ມກ້ອນ ປະເທດຂະໜາດກາງເຊັ່ນການາດາ ອາດຢູ່ລອດໄດ້ໂດຍບໍ່ຕ້ອງການເພິ່ງພາຈາກປະເທດມະຫາອຳນາດໃຫຍ່ພຽງຝ່າຍດຽວ ແຕ່ໂດຍການສ້າງເຄືອຂ່າຍຄວາມສຳພັນທາງເສດຖະກິດທີ່ກວ້າງຂວາງ ແລະ ສປ ຈີນ ເປັນປະເທດທີ່ໃຫຍ່ທີ່ບໍ່ຕ້ອງເມີນເສີຍໄດ້.