ຂໍ້ມູນຫຼ້າສຸດຂອງ WTO ສະແດງໃຫ້ເຫັນວ່າ: ປະລິມານການຄ້າທົ່ວໂລກໃນໄຕມາດທີ 1 ຂະຫຍາຍຕົວ 5.3% ເມື່ອທຽບໃສ່ປີກາຍໃນ ແລະ ຂະຫຍາຍຕົວ 3.6% ເມື່ອທຽບເປັນລາຍໄຕມາດ, ໂດຍໄດ້ຮັບແຮງໜູນສ່ວນໃຫຍ່ຈາກການນໍາເຂົ້າທີ່ເພີ່ມຂຶ້ນໃນອາເມຣິກາເໜືອ.
ເຖິງຢ່າງໃດກໍຕາມ, ນັກເສດຖະສາດຂອງ WTO ຄາດວ່າການເຕີບໂຕຂອງປະລິມານການຄ້າທົ່ວໂລກຈະອ່ອນແອລົງໃນຫຼາຍເດືອນຂ້າງໜ້າ ເນື່ອງຈາກອັດຕາພາສີຂອງ ສະຫະລັດ ອາເມຣິກາ ສ້າງຄວາມດັນຕໍ່ຄວາມຕ້ອງການນຳເຂົ້າສິນຄ້າ.
ຂ່າວລະບຸວ່າ: WTO ໄດ້ລະບຸໃນບົດລາຍງານການຄາດຄະເນການຄ້າໂລກ ແລະ ສະຖິຕິ ທີ່ເຜີຍແຜ່ໃນເດືອນເມສາ ຜ່ານມາວ່າ: ປະລິມານການຄ້າທົ່ວໂລກໃນປີ 2025 ຈະຫຼຸດລົງ 0.2%, ໂດຍກ່າວເຕືອນເຖິງຜົນກະທົບຈາກການປະກາດຂອງລັດຖະບານ ສະຫະລັດ ອາເມຣິກາ ກ່ຽວກັບອັດຕາພາສີຊຶ່ງກັນ ແລະ ກັນ ແລະ ລວມທັງຄວາມບໍ່ແນ່ນອນດ້ານນະໂຍບາຍການຄ້າ.
ສຳລັບຂໍ້ມູນທີ່ WTO ເປີດເຜີຍໃນວັນທີ 15 ກໍລະກົດ ຜ່ານມາ ສະແດງໃຫ້ເຫັນວ່າ: ປະລິມານການຄ້າໃນພາກພື້ນມີການປ່ຽນແປງຢ່າງຫຼວງຫຼາຍໃນໄຕມາດທໍາອິດ, ໂດຍສະເພາະດ້ານການນໍາເຂົ້າ. ໂດຍອາເມຣິກາເໜືຶອມີການເຕີບໂຕຂອງການນໍາເຂົ້າທີ່ເຂັ້ມແຂງທີ່ສຸດຢູ່ທີ່ 13.4%, ຮອງລົງມາແມ່ນອາ ຟຣິກາ ຢູ່ທີ່ 5.1%.
ໃນຂະນະທີ່ຕາເວັນອອກກາງນຳໜ້າດ້ານການສົ່ງອອກ, ໂດຍມີການເຕີບໂຕຢູ່ທີ່ 6.3%, ຮອງລົງມາແມ່ນອາຊີ 5.6%.
ເພື່ອພິຈາລະນາຕາມປະເພດສິນຄ້າພົບວ່າ: ການຄ້າອຸປະກອນຫ້ອງການ ແລະ ໂທລະຄົມມະນາຄົມ ເພີ່ມຂຶ້ນ 16%, ຮອງລົງມາແມ່ນສານເຄມີ 12% ແລະ ເຄື່ອງນຸ່ງຫົ່ມ 7%. ໃນທາງກົງກັນຂ້າມ, ການຄ້າ ໃນຜະລິດຕະພັນລົດ, ນໍ້າມັນເຊື້ອໄຟ ແລະ ຜະລິດຕະພັນຂຸດຄົ້ນບໍ່ແຮ່, ທາດເຫຼັກ ແລະ ເຫຼັກກ້າຫຼຸດລົງ.
ຄໍາເຫັນ