 |
ທ່ານ ໄຊບັນດິດ ຣາຊະພົນ ເລຂາທິການສະຫະພັນກິລາດອກປີກໄກ່ແຫ່ງຊາດລາວໄດ້ກ່າວວ່າ: ການແຂ່ງຂັນກິລາດອກປີກໄກ່ຊີງແຊັມທົ່ວປະເທດ ຄັ້ງທີ 25 ປະຈຳປີ 2026 ຕະຫຼອດ ໄລຍະເວລາຫຼາຍກວ່າ 25 ປີ ທີ່ຜ່ານມາ, ບໍລິສັດ ເບຍລາວ ຈຳກັດ ໄດ້ຄຽງຄູ່ ແລະ ເປັນຜູ້ສະໜັບສະໜູນຫຼັກ ທີ່ໃຫ້ການອຸ້ມຊູຍົກຍໍວົງການກິລາດອກປີກໄກ່ລາວມາໂດຍຕະຫຼອດ. ການສະໜັບສະໜູນໃນຄັ້ງນີ້ ຈຶ່ງບໍ່ແມ່ນພຽງແຕ່ການສະໜັບສະໜູນທາງດ້ານງົບປະມານເທົ່ານັ້ນ, ແຕ່ແມ່ນ “ການຮ່ວມສ້າງອະນາຄົດ” ແລະ ຍົກລະດັບມາດຕະຖານກິລາດອກປີກໄກ່ໃນ ສປປ ລາວ ໃຫ້ກ້າວໄປອີກຂັ້ນໜຶ່ງຢ່າງມີທິດທາງ ແລະ ຍືນຍົງ. ສະຫະພັນກິລາດອກປີກໄກ່ແຫ່ງຊາດລາວ ໄດ້ສໍາເລັດການສ້າງຖານຂໍ້ມູນຢ່າງເປັນລະບົບ ໂດຍມີ 26 ສະໂມສອນທົ່ວປະເທດ ທີ່ໄດ້ລົງທະບຽນເປັນສະມາຊິກຢ່າງເປັນທາງການ ແລະ ມີນັກກິລາໃນລະບົບຫຼາຍກວ່າ 500 ຄົນ. ນີ້ແມ່ນການຢັ້ງຢືນເຖິງຄວາມເຂັ້ມແຂງ ດ້ານການບໍລິຫານຈັດການ, ການມີໂຄງສ້າງສະໂມສອນທີ່ຊັດເຈນ ແລະ ຄວາມພ້ອມທີ່ຈະຂັບເຄື່ອນກິດຈະກຳກິລາລະດັບຊາດໄດ້.
 |
ການແຂ່ງຂັນຈະຈັດຂຶ້ນ ໃນລະຫວ່າງ ວັນທີ 27-30 ສິງຫາ 2026 ຢູ່ທີ່ເດີ່ນດອກປີກໄກ່ ມິດຕະພາບລາວ-ໄທ (ບຶງຂະຫຍອງ). ການແຂ່ງຂັນໃນຄັ້ງນີ້ມີທັງໝົດ 21 ລາຍການ ເກັບກຳຄະແນນສະສົມ (National Ranking) ດັ່ງນີ້: ຮຸ່ນເຍົາວະຊົນ ມີ 4 ລາຍການ U13 U15 U17 U19 ແລະ ເພີ່ມອີກ 4 ລາຍການ ສໍາລັບມືສະໝັກຫຼິ້ນ ຊຶ່ງນັກກິລາໄດ້ລົງທະບຽນເຂົ້າຮ່ວມ ທັງໝົດ 197 ຄູ່ BG/S-73 ຜ່ານແລ້ວ 32 ຄູ່ ເຕັມ, S-S 62 ຄູ່ ຜ່ານແລ້ວ 32 ເຕັມ, SN 37 ຄູ່ ຜ່ານແລ້ວ 32 ຄູ່ ເຕັມ ແລະ NP-25 ຄູ່ ຜ່ານແລ້ວ 22 ຄູ່
ສໍາລັບດອກປີກໄກ່ ທີ່ຈະໃຊ້ໃນການແຂ່ງຂັນນັ້ນ ແມ່ນ ຍີ່ຫໍ້ "GXS 76" ກະຕິກາ ແລະ ລະບຽບການແຂ່ງຂັນ ກໍໄດ້ເຜີຍແຜ່ໄປແລ້ວ. ກຳມະການຕັດສິນແມ່ນຈະນໍາໃຊ້ຄົນພາຍໃນຜູ້ທີ່ມີປະສົບການຫຼາກຫຼາຍ ແລະ ກໍຈະມີການຝຶກອົບຮົມເອົາຜູ້ໃໝ່ດ້ວຍ.
ທ່ານ ຈັນສະໝອນ ຜ່ອງຈັນທາ ໄດ້ກ່າວວ່າ: ສໍາລັບປີນີ້ ບໍລິສັດ ເບຍລາວ ຈຳກັດ ສະໜັບສະໜູນ ລວມມູນຄ່າ ເປັນຈຳນວນ 770 ລ້ານກີບ ຊຶ່ງໃນນັ້ນມີທັງຜະລິດຕະພັນ ແລະ ເງິນສົດ.
ຂ່າວ-ພາບ: ບຸນຕອມ.
ຄໍາເຫັນ