ການນຳເມືອງມຸນລະປາໂມກ ມອບເຄື່ອງຊ່ວຍເຫຼືອແກ່ຜູ້ປະສົບໄພນ້ຳຖ້ວມຢູ່ຕາແສງນາດີ

ການລົງເຄື່ອນໄຫວຕິດຕາມໃນຄັ້ງນີ້ ຄະນະນໍາໃຫ້ການຊ່ວຍເຫຼືອໃນ 4 ບ້ານຢູ່ຕາແສງນາດີ ທີ່ໄດ້ຮັບຜົນກະທົບເຊັ່ນ: ບ້ານສະພັງເໜືອ, ບ້ານສະພັງໃຕ້, ບ້ານຫ້ວຍຍາງ ແລະ ບ້ານເວີນຍາງ.ນອກຈາກການເກັບກຳຂໍ້ມູນດ້ານເຮືອນຊານ, ເນື້ອທີ່ທຳການຜະລິດ ແລະ ພື້ນຖານໂຄ່ງລ່າງທີ່ໄດ້ຮັບຄວາມເສຍຫາຍແລ້ວ, ຄະນະກຳມະການຕ້ານໄພພິບັດຂັ້ນເມືອງ ຍັງໄດ້ມອບເຄື່ອງບັນເທົາທຸກທີ່ຈຳເປັນ ເພື່ອແກ້ໄຂຄວາມເດືອດຮ້ອນໃນເບື້ອງຕົ້ນ ແລະ ເປັນການສ້າງຂວັນກຳລັງໃຈໃຫ້ແກ່ປະຊາຊົນຜູ້ປະສົບໄພ.

ທ່ານ ສົມສັກ ເສົາວະລັດສະແດງຄວາມຫ່ວງໃຍຕໍ່ຊີວິດການເປັນຢູ່ຂອງປະຊາຊົນຜູ້ປະສົບໄພ, ພ້ອມທັງໄດ້ເນັ້ນໃຫ້ອົງການປົກຄອງຕາແສງນາດີ ພ້ອມດ້ວຍ 4 ບ້ານ ປະສານງານກັບກຳລັງປະຈຳການ ສືບຕໍ່ຕິດຕາມ ເຝົ້າລະວັງສະພາບລະດັບນ້ຳ ແລະ ການປ່ຽນແປງຂອງອາກາດຢ່າງໃກ້ຊິດ, ສັງລວມສະຖິຕິຄວາມເສຍຫາຍໃຫ້ຄົບຖ້ວນ, ລະອຽດ ແລະ ຖືກຕ້ອງ ເພື່ອລາຍງານໃຫ້ຂັ້ນເທິງໂດຍໄວ, ວາງແຜນມາດຕະການຊ່ວຍເຫຼືອ, ຟື້ນຟູຊີວິດຄວາມເປັນຢູ່, ສຸຂະອະນາໄມ ແລະ ການຜະລິດຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ.

ຂ່າວ: ເມືອງມຸນ