ການເງິນຄຳມ່ວນ ເຜີຍແຜ່ດຳລັດວ່າດ້ວຍການຄຸ້ມຄອງໃບເກັບເງິນ, ເລກປະຈຳຕົວຜູ້ເສຍອາກອນແລະນິຕິກຳທີ່ກ່ຽວຂ້ອງ

ພະແນກການເງິນແຂວງຄຳມ່ວນ ໄດ້ຈັດກອງປະຊຸມເຜີຍແຜ່ດຳລັດວ່າດ້ວຍການຄຸ້ມຄອງໃບເກັບເງິນ, ດຳລັດວ່າດ້ວຍເລກປະຈຳຕົວຜູ້ເສຍອາກອນ ແລະ ນິຕິກຳທີ່ກ່ຽວຂ້ອງຂຶ້ນໃນວັນທີ 23 ຕຸລານີ້ທີ່ສະໂມສອນ ຫຼັກ 4 ໂດຍການເປັນປະທານຂອງທ່ານ ຄຳສິງ ໄຊສິດທິເດດ ຫົວໜ້າພະແນກການເງິນແຂວງ, ມີຕາງໜ້າຈາກກົມສ່ວຍສາອາກອນກະຊວງການເງິນ, ພະແນກການຂັ້ນແຂວງ, ຂະແໜງການກ່ຽວຂ້ອງຂັ້ນເມືອງ ແລະ ຜູ້ຮັບຜິດຊອບວຽກງານການເງິນບໍລິສັດຕ່າງໆເຂົ້າຮ່ວມ.
    ທ່ານ ຄຳສິງ ໄຊສິດທິເດດ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອເຜີຍແຜ່ດຳລັດວ່າດ້ວຍການຄຸ້ມຄອງໃບເກັບເງິນ, ດຳລັດວ່າດ້ວຍເລກປະຈຳຕົວຜູ້ເສຍອາກອນແລະນິຕິກຳທີ່ກ່ຽວຂ້ອງຈຳນວນໜຶ່ງ ຊຶ່ງດຳລັດດັ່ງກ່າວໄດ້ຖືກຮັບຮອງຈາກລັດຖະບານຕັ້ງແຕ່ປີ2006ເປັນຕົ້ນມາ, ການເຜີຍແຜ່ເພື່ອຊຸກຍູ້ສົ່ງເສີມການ
ດຳເນີນທຸລະກິດຂອງຜູ້ປະກອບການໃຫ້ຂະຫຍາຍຕົວຢ່າງຕໍ່ເນື່ອງແລະຍືນຍົງບົນພື້ນຖານກົດໝາຍແລະລະບຽບການທັງເປັນການປະຕິບັດພັນທະອາກອນໃຫ້ຖືກຕ້ອງ, ຄົບຖ້ວນຕາມກົດໝາຍ, ໃບເກັບເງິນແມ່ນໜຶ່ງໃນປັດໄຈຕົ້ນຕໍສຳຄັນທີ່ເຮັດໜ້າທີ່ໃນການຢັ້ງຢືນການຊື້-ຂາຍສິນຄ້າແລະການບໍລິການ, ເປັນເອກະສານຫຼັກຖານໃນການລົງບັນຊີລາຍຮັບ, ລາຍຈ່າຍ, ການຫັກ, ການຂໍຄືນເງິນອາກອນຂອງບັນດາຫົວໜ່ວຍທຸລະກິດ.     ສຳລັບບັນດາຂະແໜງການຂອງລັດໃບເກັບເງິນມີບົດບາດສຳຄັນໃນການຄຸ້ມຄອງ, ຕິດຕາມການເກັບ
ຄ່າທຳນຽມແລະຄ່າບໍລິການເຂົ້າງົບປະມານແລະເປັນເອກະສານຢັ້ງຢືນລາຍຮັບ, ລາຍຈ່າຍທີ່ຕິດພັນກັບຮ່ວງເງິນບໍລິຫານ ທັງນີ້ເພື່ອເຮັດໃຫ້ບັນດາຜູ້ຮັບຜິດຊອບວຽກງານການເງິນຂອງພະແນກການ, ຂະແໜງການ ທັງພາກລັດ, ເອກະຊົນ, ບໍລິສັດຕ່າງໆໄດ້ຮັບຮູ້,ເຂົ້າໃຈຢ່າງເລິກເຊິ່ງຂຶ້ນຕື່ມເພື່ອຮັບປະກັນການຈັດຕັ້ງປະ
ຕິບັດມີຄວາມເປັນເອກະພາບໃນຂອບເຂດທົ່ວປະເທດ.
ຂ່າວ-ພາບ: ກອງຄຳ