ການປັບປຸງກົດໝາຍວ່າດ້ວຍການກວດກາຕິດຕາມ ຂອງ ສພຊ ແລະ ສພຂ

ການດຳເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີIX. ໃນຕອນແລງຂອງວັນທີ  14 ພະຈິກ ນີ້ທີ່ສະພາແຫ່ງຊາດ,  ສະມາຊິກສະພາແຫ່ງຊາດແຕ່ລະເຂດເລືອກຕັ້ງ ໄດ້ຮັບຟັງການລາຍງານ ກົດໝາຍວ່າດ້ວຍການກວດກາຕິດຕາມ ຂອງສະພາແຫ່ງຊາດ(ສພຊ) ແລະ ສະພາປະຊາຊົນຂັ້ນແຂວງ(ສພຂ)ຂຶ້ນສະເໜີລາຍງານໂດຍ: ທ່ານ  ຄຳແພງ ວິລະພັນ ປະທານກຳມາທິການ ຍຸຕິທຳ ສພຊຊຶ່ງກົດໝາຍວ່າດ້ວຍການຕິດຕາມກວດກາ ຂອງ ສພຊ ສະບັບທຳອິດ ຖືກຮັບເອົາໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ V ປີ 2004 ແລະ ໄດ້ປັບປຸງກົດໝາຍວ່າດ້ວຍການຕິດຕາມກວດກາຂອງ ສພຊ ມາເປັນກົດໝາຍວ່າດ້ວຍການຕິດຕາມກວດກາຂອງ ສພຊ ແລະ ສພຂ ສະບັບເລກທີ 12/ສພຊ, ລົງວັນທີ 15 ພະຈິກ 2016 ທີ່ໄດ້ກຳນົດໄວ້ໃນມະຕິກອງປະຊຸມສະພາແຫ່ງຊາດ ສະບັບເລກທີ 02/ສພຊ, ລົງວັນທີ 28 ມັງກອນ 2016 ທີ່ໄດ້ກຳນົດໃຫ້ສ້າງຕັ້ງສະພາປະຊາຊົນຂັ້ນແຂວງຂຶ້ນ. 
ຜ່ານການຈັດຕັ້ງປະຕິບັດມາເປັນເວລາ 7 ປີ ເຫັນວ່າ ກົດໝາຍສະບັບດັ່ງກ່າວ ໄດ້ເປັນເຄື່ອງມືສຳຄັນ ໃຫ້ແກ່ສພຊແລະ ສພຂໃນການຕິດຕາມກວດກາ ການຈັດຕັ້ງປະຕິບັດລັດຖະທຳມະນູນ, ກົດໝາຍ, ມະຕິກອງປະຊຸມ ສພຊແລະ ສພຂ, ມະຕິຄະນະປະຈຳ ສພຊແລະ ສພຂ ຂອງບັນດາເປົ້າໝາຍທີ່ຖືກຕິດຕາມກວດກາ ໃຫ້ມີສະຕິຕື່ນຕົວ ໃນການເຄົາລົບ ແລະ ປະຕິບັດ ຢ່າງເຂັ້ມງວດ. ນອກຈາກດ້ານຕັ້ງໜ້າທີ່ໄດ້ກ່າວມານັ້ນ ກໍຍັງມີບາງດ້ານທີ່ການຈັດຕັ້ງປະຕິບັດຍັງມີຄວາມຫຍຸ້ງຍາກ, ເນື່ອງຈາກການກຳນົດເນື້ອໃນກົດໝາຍບໍ່ທັນສອດຄ່ອງກັບຕົວຈິງ ເປັນຕົ້ນປະເພດການກວດກາຕິດຕາມຍັງບໍ່ທັນຈະແຈ້ງ, ຍັງສ້າງຄວາມສັບສົນກັບການກວດກາຕິດຕາມຂອງຂະແໜງອື່ນ, ການແກ້ໄຂຜົນການກວດກາຕິດຕາມກວດກາກຳນົດແບບລວມໆ, ບໍ່ເຫັນວິທີການ ແລະ ຮູບການ ທີ່ເປັນບ່ອນອີງຈະແຈ້ງ; ການຊັກຖາມ, ການຊີ້ແຈງ ແລະ ການໃຫ້ຄະແນນຜ່ານມາຍັງບໍ່ເປັນລະບົບ, ບໍ່ໄດ້ຕາມຄາດໝາຍ ແລະ ການແກ້ໄຂຜົນ ຂອງການກວດກາຕິດຕາມ ບໍ່ທັນເດັດຂາດ; ບາງກົງຈັກ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ທີ່ກຳນົດໄວ້ໃນກົດໝາຍໄດ້ຖືກຍຸບເລີກ, ປ່ຽນແປງ ແລະ ບັນຫາອື່ນ ທີ່ເຫັນວ່າຍັງບໍ່ທັນສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ ໃນປັດຈຸບັນ.
ໃນການປັບປຸງກົດໝາຍວ່າດ້ວຍການກວດກາຕິດຕາມ ຂອງສພຊແລະ ສພຂ ມີຄືດັ່ງນີ້: ເພື່ອໃຫ້ສອດຄ່ອງກັບສະພາບການຂະຫຍາຍຕົວ ທາງດ້ານເສດຖະກິດ-ສັງຄົມ ໃນໄລຍະໃໝ່ ເວົ້າລວມ, ເວົ້າສະເພາະ ກໍຄື ສະພາບການປັບປຸງ, ປ່ຽນແປງ ດ້ານກົງຈັກ ແລະ ບຸກຄະລາກອນ ທີ່ສະພາແຫ່ງຊາດ,ສະພາປະຊາຊົນຂັ້ນແຂວງ ເລືອກຕັ້ງ, ແຕ່ງຕັ້ງ ແລະ ຮັບຮອງເອົາ;  ເພື່ອໃຫ້ເນື້ອໃນກົດໝາຍ ຈະແຈ້ງ, ຄົບຖ້ວນ, ເຮັດໃຫ້ການຕິດຕາມກວດກາມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທຳ ໂດຍສະເພາະການຊັກຖາມເປົ້າໝາຍຖືກກວດກາ, ການຊີ້ແຈງ,ການໃຫ້ຄະແນນ ແລະ ການແກ້ໄຂຜົນຂອງການກວດກາ; ເພື່ອສ້າງຄວາມຮັບຮູ້ ແລະ ເຂົ້າໃຈ ໃຫ້ພາກສ່ວນກ່ຽວຂ້ອງ ລວມທັງບຸກຄະລາກອນ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ສາມາດໄຈ້ແຍກໄດ້ລະຫວ່າງການຕິດຕາມ ກວດກາ ຂອງສພຊແລະ ສພຂ ແລະ ການຕິດຕາມກວດກາ ຂອງອົງການອື່ນ;ເພື່ອໃຫ້ສອດຄ່ອງກັບກົດໝາຍທີ່ນໍາໃຊ້ໃນປັດຈຸບັນຄື ກົດໝາຍວ່າດ້ວຍການແກ້ໄຂຄຳຮ້ອງທຸກ, ກົດໝາຍວ່າດ້ວຍການກວດກາລັດ ແລະ ກົດໝາຍທີ່ຈະປັບປຸງໃນຕໍ່ໜ້າ ຄື ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ; ໂຄງປະກອບ ແລະ ເນື້ອໃນຂອງຮ່າງກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສະບັບເລກທີ 12/ສພຊ, ລົງວັນທີ 15 ພະຈິກ 2016 ປະກອບດ້ວຍ VIII ພາກ, 10 ໝວດ 104 ມາດຕາ.ການຄົ້ນຄວ້າຂອງຄະນະຮັບຜິດຊອບ ໄດ້ເພີ່ມໃໝ່ 13 ມາດຕາ, ປັບປຸງ 61 ມາດຕາ, ຕັດອອກ 6ມາດຕາ ແລະ ຮັກສາເດີມ 37 ມາດຕາ. ຮ່າງກົດໝາຍວ່າດ້ວຍການຕິດຕາມກວດກາຂອງສພຊແລະ ສພຂ (ສະບັບປັບປຸງ) ປະກອບດ້ວຍ VIII ພາກ, 10 ໝວດ 111 ມາດຕາ. 
(ຂ່າວ: ພັດ ລໍວັນໄຊ, ພາບ: ສຸກສະຫວັນ)