ກະຊວງ ຜທ ເປີດອົບຮົມມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກ      

ກະຊວງແຜນການແລະ ການລົງທຶນ(ຜທ)ໄດ້ຈັດພິທີເປີດຮຽນເອກະສານເພື່ອອົບຮົມມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກ ຈໍານວນ 23ສະຫາຍ ຍິງ 14 ສະຫາຍ, ໃນວັນທີ 27 ທັນວານີ້ ທີ່ກະຊວງຜທ,  ພາຍໃຕ້ການເປັນປະທານ ຂອງ ສະຫາຍ ນາງ ຄຳຈັນ ວົງແສນບູນ ຮອງເລຂາຄະນະບໍລິຫານງານພັກ ຮອງລັດຖະມົນຕີກະຊວງຜທ. ຜູ້ທີ່ເຂົ້າຮຽນເອກະສານອົບຮົມມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກປະຈຳປີ2023ແມ່ນໄດ້ຄັດເລືອກເອົາຜູ້ທີ່ມີມາດຖານເງື່ອນໄຂຄົບຖ້ວນຕາມກົດລະບຽບຂອງພັກວາງອອກ ຈາກບັນດາໜ່ວຍພັກ ພາຍໃນ ກະຊວງ ຜທ.
ໃນພິທີ ໄດ້ເຜີຍແຜ່ຄຳແນະນຳ ຂອງຄະນະໂຄສະນາອົບຮົມສູນກາງພັກ ສະບັບເລກທີ 16/ຄອສພ, ລົງວັນທີ 7/7/2021ກ່ຽວກັບການນຳໃຊ້ເອກະສານອົບຮົມມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກ ຈຳນວນ 13 ຫົວຂໍ້.
ພາຍຫຼັງເຊື່ອມຊຶມເອກະສານສຳເລັດແລ້ວ, ຍັງໄດ້ສືບຕໍ່ໃນການຄົ້ນຄວ້າຕອບຄຳຖາມຂໍ້ຂ້ອງໃຈ ຂອງຜູ້ເຂົ້າຮໍ່າຮຽນສະໜັບສະໜູນຢ່າງເປັນເອກະສັນ.ຫຼັງຈາກນັ້ນ, ສະຫາຍ ບຸນມີ ວິໄລຈິດ ກຳມະການຄະນະບໍລິຫານງານພັກ ກະຊວງ,ຫົວໜ້າກົມຈັດຕັ້ງ ແລະ ພະນັກງານ, ໄດ້ໃຫ້ກຽດຂຶ້ນສະຫຼຸບຕີລາຄາຜົນສຳເລັດການເຜີຍແຜ່ເອກະສານອົບຮົມມະຫາຊົນຜູ້ທີ່ຈະຂະຫຍາຍເຂົ້າເປັນສະມາຊິກພັກ, ພ້ອມທັງມອບໃບຢັ້ງຢືນໃຫ້ມະຫາຊົນກ້າວໜ້າ ແລະ ມີຄຳເຫັນໂອ້ລົມ ຊຶ່ງໄດ້ເນັ້ນໃຫ້ບັນດາສະຫາຍທີ່ຢູ່ໃນເປົ້າໝາຍທີ່ຈະຂະຫຍາຍເຂົ້າເປັນສະມາຊິກພັກ ເອົາໃຈໃສ່ຕື່ມ.
ຂ່າວ-ພາບ: ນາງແສງຈັນ