ກະຊວງ ປກສ ຊີ້ແຈງການປະຕິບັດກົດໝາຍຂອງອົງການສືບສວນ-ສອບສວນ

ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ (ປກສ) ໄດ້ຊີ້ແຈງໃຫ້ຄວາມກະຈ່າງແຈ້ງກ່ຽວກັບການປະຕິບັດກົດໝາຍຂອງອົງການສືບສວນ-ສອບສວນທີ່ຕິດພັນກັບອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດຕໍ່ສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IXໃນວັນທີ 9ພະຈິກນີ້, ໂດຍການເປັນປະທານຂອງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.
ທ່ານ ພົທ ກົງທອງ ພົງວິຈິດ ໄດ້ຊີ້ແຈງກ່ຽວກັບການປະຕິບັດກົດໝາຍຂອງອົງການສືບສວນ-ສອບສວນ ໃນການກັກຕົວຕາມມາດຕາ 138 ແລະ ການຈັບຕົວຕາມມາດຕາ 139, ການກັກຂັງພາງຕາມມາດຕາ 142, ສາເຫດທີ່ບໍ່ພາໃຫ້ເປີດການສືບສວນ-ສອບສວນຕາມມາດຕາ 92, ກໍານົດເວລາການສືບສວບ-ສອບສວນຕາມມາດຕາ 110ຂອງກົດໝາຍວ່າດ້ວຍການດໍາເນີນຄະດີອາຍາທີ່ຢູ່ໃນຂອບເຂດຄວາມຮັບຜິດຊອບຂອງກະຊວງ ປກສ ຊຶ່ງໃນໄລຍະຜ່ານມາໄດ້ເປັນເຈົ້າການຈັດຕັ້ງປະຕິບັດເຊື່ອມຊຶມ, ກໍາແໜ້ນ, ອອກນິຕິກໍາໃຕ້ກົດໝາຍ, ສ້າງປຶ້ມຄູ່ມື ແລະ ຫັນເປັນແຜນການ ແລະ ໂຄງການເພື່ອຍົກສູງຄວາມຮັບຜິດຊອບຕໍ່ໜ້າທີ່ການເມືອງຊຶ່ງມີບາງມາດຕະການດັ່ງນີ້:ມາດຕະການສະກັດກັ້ນ ແລະ ລະບຽບການທົ່ວໄປກ່ຽວກັບການສືບສວນ-ສອບສວນທີ່ກົດໝາຍກໍານົດລວມມີ: ການພາຕົວ, ການກັກຕົວ, ການຈັບຕົວ, ການກັກຂັງພາງ, ການປ່ອຍຕົວພາງ, ການຄຸມຕົວຢູ່ກັບທີ່, ການງົດໜ້າທີ່ ຫຼືຕໍາແໜ່ງ, ການພິຈາລະນາສາເຫດທີ່ບໍ່ພາໃຫ້ເປີດການສືບສວນ-ສອບສວນ ແລະ ກໍານົດເວລາການສືບສວບ-ສອບສວນ ຊຶ່ງຕະຫຼອດໄລຍະທີ່ຜ່ານມາ,ກະຊວງ ປກສ ໄດ້ເອົາໃຈໃສ່ ເປັນເຈົ້າການໃນການປະຕິບັດກົດໝາຍວ່າດ້ວຍການດໍາເນີນຄະດີອາຍາຢ່າງເຂັ້ມງວດ, ປະຕິບັດຕາມບົດບັນທຶກກອງປະຊຸມ 4 ພາກສ່ວນລະຫວ່າງກະຊວງ ປກສ, ກະຊວງຍຸຕິທຳ, ອົງການໄອຍະການປະຊາຊົນສູງສຸດ, ສານປະຊົນສູງສູດ ແລະ ມະຕິ, ຄຳສັ່ງ, ຄຳແນະນຳ ແລະ ບັນດານິຕິກຳອື່ນໆທີ່ກ່ຽວຂ້ອງໃນການດຳເນີນຄະດີ, ນໍາເອົານິຕິກໍາຕ່າງໆຂອງຂັ້ນເທິງທີ່ກ່ຽວຂ້ອງກັບການດໍາເນີນຄະດີມາສ້າງເປັນແຜນງານອັນລະອຽດເຂົ້າໃນຂົງເຂດວຽກງານການດຳເນີນຄະດີຂອງອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ ແລະ ປະຕິບັດໃຫ້ຖືກຕ້ອງສອດຄ່ອງກັບແນວທາງນະໂຍບາຍຂອງພັກ, ກົດໝາຍຂອງລັດ, ສິດ ແລະ ໜ້າທີ່ຂອງເຈົ້າໜ້າທີ່ສືບສວນ-ສອບສວນລວມທັງສິດ ແລະ ພັນທະຂອງຜູ້ເຂົ້າຮ່ວມໃນການດຳເນີນຄະດີ,ກະຊວງ ປກສໄດ້ສ້າງນິຕິກຳສະເພາະໃນການຄຸ້ມຄອງ, ຕິດຕາມ, ກວດກາ ການດຳເນີນຄະດີເປັນຕົ້ນຂໍ້ຕົກລົງວ່າດ້ວຍອົງການສືບສວນ-ສອບສວນເຈົ້າໜ້າຕຳຫຼວດ, ຄຳສັ່ງເລກທີ 630 ວ່າດ້ວຍການຊີ້ນຳ, ນໍາພາ, ຕິດຕາມ, ກວດກາ ແລະ ແນະນຳກຳລັງຕຳຫຼວດສືບສວນ-ສອບສວນໃນການດຳເນີນຄະດີ, ຂໍ້ຫ້າມຕໍ່ນາຍ ແລະ ພົນຕຳຫຼວດ ໃນການເຄື່ອນໄຫວເຮັດໜ້າທີ່ວິຊາສະເພາະສືບສວນ-ສອບສວນ; ໄດ້ອອກຄຳສັ່ງແນະນຳວ່າດ້ວຍການເພີ່ມທະວີເອົາໃຈໃສ່ໃນການສືບສວນ-ສອບສວນຄະດີຈຳນວນຫຼາຍສະບັບ; ໄດ້ສ້າງ ແລະ ພິມປຶ້ມຄູ່ມືວຽກງານສືບສວນ-ສອບສວນເພື່ອປະກອບໃຫ້ເຈົ້າໜ້າທີ່ຕໍາຫຼວດທີ່ເຮັດໜ້າທີ່ສືບສວນ-ສອບສວນດໍາເນີນຄະດີ. ນອກຈາກນີ້ໄດ້ສຸມໃສ່ສ້າງ ແລະ ຕິດຕັ້ງລະບົບຖານຂໍ້ມູນອາຊະຍາກຳໄລຍະທີ 1ຊຶ່ງລະບົບດັ່ງກ່າວສາມາດຕິດຕາມການດໍາເນີນຄະດີແຕ່ສູນກາງລົງຮອດທ້ອງຖິ່ນໃນຂອດເຂດທົ່ວປະເທດ ມາຮອດປັດຈຸບັນໄດ້ຕິດຕັ້ງແລ້ວ 12 ແຂວງ ພ້ອມນີ້ຍັງມີການປະຕິບັດບັນດາມາດຕະການອື່ນໆ. ຜ່ານການຈັດຕັ້ງປະຕິບັດການດໍາເນີນຄະດີຕາມຂະບວນຍຸຕິທໍາໃນປີ2023 ສາມາດດໍາເນີນຄະດີເກີດຂຶ້ນທັງໝົດ 6.637 ລາຍ, ສາມາດມ້າງໄດ້ 5.758 ລາຍ, ຜູ້ຖືກຫາ 8.615 ຄົນຍິງ  1.132 ຄົນ, ຕ່າງປະເທດ 184 ຄົນຍິງ 13 ຄົນ.
ເພື່ອຮັບປະກັນການຈັດຕັ້ງປະຕິບັດບັນດາມາດຕະການສະກັດກັ້ນ ຕາມກົດໝາຍວ່າດ້ວຍດໍາເນີນຄະດີອາຍາ ເຂົ້າສູ່ລວງເລິກ, ກວ້າງຂວາງ ແລະຖືກຕ້ອງຕາມກົດໝາຍ, ຕາມແນວທາງ ແລະ ຫຼັກການວິຊາສະເພາະ ກະຊວງປກສຈະສືບຕໍ່ເພີ່ມທະວີຍົກສູງວຽກງານສຶກສາອົບຮົມນໍາພາການເມືອງແນວຄິດໃຫ້ນາຍແລະ ພົນຕໍາຫຼວດ ເປັນກົກ, ເປັນຮາກຖານທີ່ສໍາຄັນ ເພື່ອເຮັດໃຫ້ນາຍ ແລະ ພົນຕໍາຫຼວດມີຄຸນທາດການເມືອງໜັກແໜ້ນ, ມີຄວາມຈົ່ງຮັກພັກດີຕໍ່ພັກ-ຕໍ່ລັດ, ມີຈັນຍາບັນ-ຈັນຍາທໍາ, ເປັນກໍາລັງຕໍາຫຼວດຂອງປະຊາຊົນ, ໂດຍປະຊາຊົນ ເພື່ອຜົນປະໂຫຍດອັນຊອບທໍາຂອງປະຊາຊົນ ແລະ ຮັບປະກັນເຮັດສໍາເລັດໜ້າທີ່ການເມືອງຂອງຕົນ, ຊີ້ນໍາ-ນໍາພາວຽກງານຂອງອົງການສືບສວນ-ສອບສວນ ໂດຍສະເພາະນໍາເອົາຕົວຜູ້ກະທໍາຜິດມາລົງໂທດຕາມລະບຽບກົດໝາຍຢາກເຮັດໄດ້ແນວນັ້ນ ຕ້ອງໄດ້ເພີ່ມທະວີການຊີ້ນໍາ-ນໍາພາທີ່ເດັດດ່ຽວເດັດຂາດ, ປັບປຸງນິຕິກໍາ, ປັບປຸງກົນໄກການບໍລິຫານຂອງອົງການສືບສວນ-ສອບສວນໃຫ້ເປັນມາດຕະຖານຕາມກົດໝາຍ ແລະ ຫຼັກການວິຊາສະເພາະເພື່ອກ້າວເຂົ້າສູ່ຄຸນນະພາບໃໝ່, ສືບຕໍ່ສ້າງຄວາມເຂັ້ມແຂງ ແລະບໍາລຸງ-ຍົກລະດັບເຈົ້າໜ້າທີ່ສືບສວນ-ສອບສວນໃຫ້ກໍາແໜ້ນກົດໝາຍແນວທາງ, ຫຼັກການວິຊາສະເພາະ ກາຍເປັນອົງການທີ່ມີເຂັ້ມແຂງທາງດ້ານການຈັດຕັ້ງ, ເກັ່ງທາງດ້ານວິຊາສະເພາະມີວິໃນ ແລະ ຫັນເປັນທັນສະໄໝ ແລະ ອື່ນໆ.
ຂ່າວ: ພູວັນ, ພາບ: ສຸກສະຫວັນ