ກະຊວງ ສສກ ສະຫຼອງວັນຄູແຫ່ງຊາດ ແລະ ວັນວິທະຍາສາດແຫ່ງຊາດ

ທ່ານ ທອງສະລິດ ມັງໜໍ່ເມກ ລັດຖະມົນຕີກະຊວງ ສສກ ກ່າວວ່າ: ການສະເຫຼີມສະຫຼອງວັນຄູແຫ່ງຊາດ ວັນທີ 7 ຕຸລາ ຄົບຮອບ 31 ປີ ແລະ ວັນວິທະຍາສາດແຫ່ງຊາດ ວັນທີ 12 ຕຸລາ ຄົບຮອບ 38 ປີ ຊຶ່ງເປັນວັນທີ່ມີຄວາມໝາຍສຳຄັນ ເພື່ອປຸກລະດົມຈິດໃຈໃຫ້ທົ່ວສັງຄົມໄດ້ສະແດງອອກເຖິງການສົ່ງເສີມ, ເຊີດຊູບົດ ບາດ, ກຽດສັກສີຂອງຄູ-ອາຈານໃຫ້ສູງຂຶ້ນ. ຖືໂອກາດນີ້ເປັນການໂຄສະນາເຜີຍແຜ່ຜົນງານການປະດິດຄິດແຕ່ງ ແລະ ເສຍສະຫຼະເຫື່ອແຮງສະຕິປັນຍາຂອງຄູ-ອາຈານໃຫ້ທຸກຄົນໃນສັງຄົມໄດ້ຮັບຮູ້ເຖິງຜົນງານຂອງຄູ ພ້ອມທັງສະແດງອອກເຖິງຄວາມກະຕັນຍູຮູ້ບຸນຄຸນຕໍ່ຄູ-ອາຈານທີ່ໄດ້ສິດສອນໃຫ້ຄວາມຮູ້ແກ່ຕົນນັບແຕ່ອາດີດ ເຖິງປັດຈຸບັນ. ຕະຫຼອດໄລຍະທີ່ຜ່ານມາ ກະຊວງ ສສກ ແລະ ຜູ້ບໍລິຫານການສຶກສາທຸກຂັ້ນທັງພາກລັດ ແລະ ເອກະຊົນໄດ້ມີຄວາມພະຍາຍາມສູງໃນການເອົາໃຈໃສ່ພັດທະນາການສຶກສາທາງດ້ານປະລິມານ ແລະ ຄຸນນະ ພາບ, ໄດ້ຂະຫຍາຍຕາໜ່າງການສຶກສາໄປໃນທົ່ວທຸກທ້ອງຖິ່ນ ລວມທັງເຂດພູດອຍຫ່າງໄກສອກຫຼີກ, ປະຊາ ຊົນໄດ້ມີລະດັບຄວາມຮູ້ຈົບປະຖົມ ແລະ ມັດທະຍົມສຶກສາຕອນຕົ້ນບຳລຸງໂດຍທົ່ວໄປກວມຈຳນວນປະຊາກອນສ່ວນຫຼາຍ, ຄຸນນະພາບຂອງການສຶກສາກໍໄດ້ຮັບການພັດທະນາດີຂຶ້ນເທື່ອລະກ້າວ.

ພ້ອມທັງຍົກໃຫ້ເຫັນຄວາມສຳຄັນຂອງວັນວິທະຍາສາດແຫ່ງຊາດວັນທີ 12 ຕຸລາ ໃນໄລຍະຜ່ານມາ, ພັກ ແລະ ລັດຖະບານໄດ້ເອົາໃຈໃສ່ພັດທະນາວຽກງານນີ້ຢ່າງຕໍ່ເນື່ອງ, ມີແນວທາງ, ມີນະໂຍບາຍ, ມີຍຸດທະສາດ, ມີນັກວິທະຍາສາດ ແລະເລີ່ມມີຜະລິດຕະພັນ ປະກອບສ່ວນເຂົ້າໃນແນວທາງເສດຖະກິດເອກະລາດ, ເປັນເຈົ້າຕົນເອງໃຫ້ປະກົດຜົນເປັນຈິງເທື່ອລະກ້າວ.

ໂອກາດນີ້, ທ່ານ ກິແກ້ວ ໄຂຄຳພິທູນ ໄດ້ປະດັບນາມມະຍົດຄູປະຊາຊົນໃຫ້ອາຈານ ບຸນມາ ໂພທິລາດ ແລະ ອາຈານ ຄູນວິໄລ ເຄນກິດຕິສັກ. ຈາກນັ້ນ, ທ່ານ ທອງສະລິດ ມັງໜໍ່ເມກ ໄດ້ມອບຕຳແໜ່ງວິຊາການຂັ້ນຮອງສາດສະດາຈານໃຫ້ອາຈານ 14 ທ່ານ ແລະ ມອບໃບຍ້ອງຍໍບົດຄົ້ນຄວ້າວິທະຍາສາດດີເດັ່ນໃຫ້ອາຈານຈຳນວນ 20 ທ່ານ ທີ່ມີຜົນງານດີເດັ່ນໃນການປະກອບສ່ວນເຂົ້າໃນການພັດທະນາວຽກງານການສຶກສາ ແລະ ວິທະຍາສາດແຫ່ງຊາດ.

ຂ່າວ: ກິດຕາ, ພາບ: ຂັນໄຊ