ກະຊວງຍຸຕິທຳ ເຊື່ອມຊຶມເອກະສານເພື່ອກະກຽມດຳເນີນກອງປະຊຸມໃຫຍ່3ຂັ້ນຂອງພັກ

ຄະນະບໍລິຫານງານພັກກະຊວງຍຸຕິທຳ ໄດ້ຈັດກອງປະຊຸມເຊື່ອມຊຶມບັນດາເນື້ອໃນເອກະສານຂອງສູນກາງພັກກ່ຽວກັບການກະກຽມແລະດຳເນີນກອງປະຊຸມໃຫຍ່3ຂັ້ນຂອງພັກຂຶ້ນໃນວັນທີ6ທັນວານີ້ ທີ່ກະຊວງດັ່ງກ່າວ ພາຍໃຕ້ການເປັນປະທານ ແລະ ໃຫ້ກຽດເຜີຍແຜ່ເອກະສານຂອງສະຫາຍ ໄພວີ ສີບົວລິພາ ກຳມະການສູນກາງພັກເລຂາຄະນະບໍລິຫານງານພັກ ລັດຖະມົນຕີກະຊວງຍຸຕິທຳ, ມີຮອງເລຂາພັກ, ກຳມະການຄະນະປະຈຳພັກ, ກໍາມະການຄະນະບໍລິຫານງານພັກກະຊວງ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມ.
ໃນພິທີສະຫາຍເລຂາພັກ ແລະ ຮອງເລຂາພັກ ໄດ້ຜັດປ່ຽນກັນຂຶ້ນເຜີຍແຜ່ເອກະສານສຳຄັນຊຶ່ງເນື້ອໃນເອກະສານທີ່ນໍາມາເຜີຍແຜ່ໃນຄັ້ງນີ້ປະກອບມີ: ເຜີຍແຜ່ຄຳສັ່ງຂອງຄະນະເລຂາທິການສູນກາງພັກ ເລກທີ 411/ຄລສພ, ລົງວັນທີ 8 ສິງຫາ 2023 ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ; ເຜີຍແຜ່ຄຳແນະນຳຂອງຄະນະຈັດຕັ້ງສູນກາງພັກ ເລກທີ 211/ຄຈສພ, ລົງວັນທີ 16 ສິງຫາ 2023 ວ່າດ້ວຍການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ເລກທີ 411/ຄລສພ; ເຜີຍແຜ່ບົດແນະນຳຂອງຫ້ອງວ່າການສູນກາງພັກ ເລກທີ 05/ຫສພ, ລົງວັນທີ 31 ຕຸລາ 2023 ກ່ຽວກັບການກະກຽມເນື້ອໃນຮ່າງລາຍງານການເມືອງຂອງອົງຄະນະພັກແຕ່ລະຂັ້ນ; ເຜີຍແຜ່ຄຳແນະນຳຂອງຄະນະໂຄສະນາອົບຮົມສູນກາງພັກ ເລກທີ 254/ຄອສພ, ລົງວັນທີ 6 ພະຈິກ 2023 ກ່ຽວກັບການສ້າງສ້າງຂະ ບວນການເພື່ອກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ; ເຜີຍແຜ່ຄຳແນະນຳຂອງຄະນະກວດກາສູນກາງພັກ ເລກທີ 285/ຄກສພ, ລົງວັນທີ 15 ກັນຍາ 2023 ກ່ຽວກັບການກະກຽມ ແລະ ດຳເນີນຊີວິດການເມືອງທ້າຍສະໄໝກອງປະຊຸມໃຫຍ່ 3 ຂັ້ນຂອງພັກ; ແນະນຳການຂຽນບົດສຳຫຼວດ ການນຳພາລວມຂອງຄະນະພັກ; ບົດສຳຫຼວດຂອງບຸກຄົນ ຄະນະພັກ ແລະ ບົດສຳຫຼວດບຸກຄົນສະມາຊິກພັກ.
    ກອງປະຊຸມຄັ້ງນີ້ຈັດຂຶ້ນ ເພື່ອເປັນການປັບປຸງພາຍໃນພັກໃຫ້ມີຄວາມປອດໃສ, ເຂັ້ມແຂງແລະໜັກແໜ້ນຮັບປະກັນການກໍ່ສ້າງພັກຕາມ5ຫຼັກການແລະ3ທິດນໍາຂອງພັກ, ຖືກຕ້ອງຕາມກົດລະບຽບພັກ, ເພີ່ມທະວີຄວາມສາມັກຄີ, ຍົກສູງຄວາມສາມາດນໍາພາແລະກຳລັງແຮງສູ້ຮົບຂອງການຈັດຕັ້ງພັກ; ເສີມຂະຫຍາຍປະຊາທິປະໄຕ,ເຊີດຊູສະຕິປັນຍາ, ຄວາມຮັບຜິດຊອບຂອງຄະນະພັກແຕ່ລະຂັ້ນແລະບັນດາອົງການຈັດຕັ້ງໃນລະບົບການເມືອງ;ເພື່ອກວດກາ, ຕີລາຄາການຜັນຂະຫຍາຍນໍາພາ-ຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXI ຂອງພັກ, ກົດລະບຽບພັກ, ແຜນພັດທະນາເສດຖະກິດ-ສັງຄົມ5ປີແຫ່ງລັດຄັ້ງທີIX; ຕິດພັນກັບການປະຕິບັດມະຕິກອງປະຊຸມໃຫຍ່, ແຜນພັດທະນາກົດໝາຍແລະວຽກງານຍຸຕິທໍາ5ປີຂອງກະຊວງພ້ອມນັ້ນກຳນົດທິດທາງ, ຄາດໝາຍສູ້ຊົນແຕ່ລະດ້ານ, ແຜນພັດທະນາກົດໝາຍແລະວຽກງານຍຸຕິທໍາ5ປີຕໍ່ໜ້າຂອງຄະນະພັກຂັ້ນຕົນໃຫ້ສອດຄ່ອງກັບຄວາມເປັນຈິງ, ພາວະວິໄສ, ຮອບດ້ານແລະສາມາດຈັດຕັ້ງປະຕິບັດໄດ້;ເພື່ອຄັດເລືອກບຸກຄະລາກອນທີ່ມີມາດຕະຖານ, ເງື່ອນໄຂປະກອບເຂົ້າໃນການຈັດຕັ້ງແຕ່ລະຂັ້ນໃນລະບົບການເມືອງເພື່ອບຸກທະລຸສ້າງການຫັນປ່ຽນຢ່າງແຂງແຮງແລະເລິກເຊິ່ງ, ວຽກງານພະນັກງານຂອງຂະແໜງການຍຸຕິທຳສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ເພື່ອສ້າງຄວາມເຊື່ອໝັ້ນ, ສັດທາຂອງມະຫາຊົນຕໍ່ການນໍາພາຂອງຄະນະພັກແຕ່ລະຂັ້ນ;ເພື່ອຍູ້ແຮງການເຄື່ອນໄຫວວຽກງານຮອບດ້ານໃນທົ່ວອົງຄະນະພັກກະຊວງ, ປຸກລະດົມສະມາຊິກພັກ, ພະນັກງານເຂົ້າຮ່ວມພາລະກິດປົກປັກຮັກສາແລະພັດທະນາປະເທດຊາດ, ພັດທະນາຂະແໜງການຍຸຕິທຳໃຫ້ກາຍເປັນຂະບວນການກວ້າງຂວາງ, ຟົດຟື້ນ, ຕໍ່ເນື່ອງ; ຜ່ານຂະບວນການດັ່ງກ່າວສ້າງໄດ້ກົມກອງ, ບຸກຄົນທີ່ດີເດັ່ນໃນຂົງເຂດຍຸຕິທຳ.
ຂ່າວ-ພາບ: ພູວັນ