ກະຊວງພາຍໃນເຊື່ອມຊຶມເອກກະສານກະກຽມດຳເນີນກອງປະຊຸມໃຫຍ່3ຂັ້ນຂອງພັກ

ກະຊວງພາຍໃນໄດ້ຈັດກອງປະຊຸມເຊື່ອມຊຶມບັນດາເອກະສານກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3ຂັ້ນຂອງພັກໃຫ້ສະມຊິກພັກ,ພະນັກງານ ຂຶ້ນໃນວັນທີ 15 ພະຈິກນີ້ທີ່ກະຊວງດັ່ງກ່າວໂດຍການເປັນປະທານ ຂອງ ສະຫາຍ ທອງຈັນ ມະນີໄຊ ກຳມະການສູນກາງພັກເລຂາຄະນະພັກລັດຖະມົນຕີກະຊວງພາຍໃນ, ມີ ສະຫາຍ ນາງ ທອງຈັນ ແກ້ວແສນຫອມ ຄະນະປະຈຳພັກ ຫົວໜ້າກົມເອກະສານແຫ່ງຊາດກະຊວງພາຍໃນ,ມີຄະນະພັກ,ຄະນະນຳກະຊວງ,ບັນດາຫົວໜ້າກົມ,ຮອງກົມ,ສະມາຊິກພັກ ແລະ ພະນັກງານເຂົ້າຮ່ວມ.
ໃນກອງປະຊຸມ ສະຫາຍ ທອງຈັນ ມະນີໄຊ ໄດ້ເຜີຍແຜ່ເອກະສານ ຄວາມເຂົ້າໃຈກ່ຽວກັບກອງປະຊຸມໃຫຍ່ 3 ຂັ້ນຂອງພັກ,ຄຳສັ່ງ 411/ຄລສພ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ,ຄຳແນະນຳ 211/ຄຈສພ ການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ,ຄຳແນະນຳກ່ຽວກັບການສ້າງຂະບວນການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ,ສະຫາຍ ນາງ ທອງຈັນ ແກ້ວແສນຫອມ ໄດ້ເຜີຍແຜ່ຄຳແນະນຳ 285/ຄກສພ ການກະກຽມ ແລະ ດຳເນີນຊີວິດການເມືອງທ້າຍສະໄໝ ກອງປະຊຸມໃຫຍ່3 ຂັ້ນຂອງພັກ, ບົດແນະນຳ 5/ຫສພ(ສະບັບປັບປຸງ)ກ່ຽວກັບການກະກຽມເນື້ອໃນຮ່າງລາຍງານການເມືອງຂອງອົງຄະນະພັກແຕ່ລະຂັ້ນ.
ການຈັດຕັ້ງເຊື່ອມຊຶມບັນດາເອກກະສານສຳຄັນຄັ້ງນີ້ ແມ່ນແນໃສ່ເຮັດໃຫ້ຄະນະພັກທຸກຂັ້ນ ແລະ  ສະມາຊິກພັກ,ພະນັກງານ-ລັດຖະກອນ ທົ່ວກະຊວງພາຍໃນໄດ້ເຊື່ອມຊຶມ,ຮັບຮູ້,ເຂົ້າໃຈ ແລະ ກຳແໜ້ນເນື້ອໃນບັນດາເອກກະສານກ່ຽວກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ,ໂດຍສະເພາະແມ່ນກະກຽມດ້ານບຸກຄະລາກອນທີ່ມີມາດຖານເງື່ອນໄຂທີ່ຈະອອກສະໝັກຮັບເລືອກຕັ້ງເປັນຄະນະພັກຊຸດໃໝ່ແຕ່ລະຂັ້ນ ແລະ ເປັນເອກກະພາບກັນ ໃຫ້ເລິກເຊິ່ງ ແລະ ທົ່ວເຖິງ ພ້ອມທັງຫັນເປັນແຜນການລະອຽດຂອງແຕ່ລະຮາກຖານພັກໃຫ້ປະກົດຜົນເປັນຈິງ. 
(ຂ່າວ-ພາບ:ສຳນານ)