 |
ສະຫາຍ ພົນຈັດຕະວາ ວົງຈັນ ພັນຈັນທະມານ ຮອງຫົວໜ້າກົມໃຫຍ່ການເມືອງກອງທັບ ປະຊາຊົນລາວ ໄດ້ຜ່ານລັດຖະດໍາລັດຂອງປະທານປະເທດ ວ່າດ້ວຍການປະດັບຫຼຽນໄຊອິດສະຫຼະ, ຫຼຽນໄຊແຮງງານ ແລະ ຂໍ້ຕົກລົງຂອງກະຊວງປ້ອງກັນປະເທດແຫ່ງ ສປປ ລາວ ວ່າດ້ວຍການປະດັບຫຼຽນໄຊພິລະອາດຫານ ໃຫ້ກົມກອງລວມໝູ່ ແລະ ບຸກຄົນທີ່ມີຜົນງານ, ຄຸນງາມຄວາມດີ ປະກອບສ່ວນເຂົ້າໃນການຊ່ວຍເຫຼືອ ສະໜັບສະໜູນອັນໃຫຍ່ຫຼວງໃຫ້ພັກ, ລັດຖະບານ, ກອງທັບ ແລະ ປະຊາຊົນລາວຕະຫຼອດມາ, ເນື່ອງໃນໂອກາດວັນມູນເຊື້ອກົມໃຫຍ່ II ກະຊວງປ້ອງກັນປະເທດ ສສ ຫວຽດນາມ ຄົບຮອບ 80 ປີ, ເປັນການເສີມຂະຫຍາຍສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຮຸ້ນສ່ວນຍຸດທະສາດລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມ ໃຫ້ໝັ້ນຄົງຂະໜົງແກ່ນຕະຫຼອດກາລະນານ. ໃນນີ້, ປະທານປະເທດ ສປປ ລາວ ອອກລັດຖະດໍາລັດ ປະດັບຫຼຽນໄຊອິດສະຫຼະຊັ້ນ II ຈໍານວນ 2 ສະຫາຍ ແລະ 1 ກົມກອງ, ຫຼຽນໄຊອິດສະຫຼະຊັ້ນ III ຈໍານວນ 2 ສະຫາຍ ແລະ 2 ກົມກອງ, ຫຼຽນໄຊແຮງງານຊັ້ນ I ຈໍານວນ 6 ສະຫາຍ, ຫຼຽນໄຊແຮງງານຊັ້ນ II ຈໍານວນ 4 ສະຫາຍ ແລະ 8 ກົມກອງ, ຫຼຽນໄຊແຮງງານຊັ້ນ III ຈໍານວນ 12 ສະຫາຍ ແລະ 1 ກົມກອງ ແລະ ກະຊວງປ້ອງກັນປະເທດ ຕົກລົງປະດັບຫຼຽນໄຊພິລະອາດຫານຊັ້ນ II ຈໍານວນ 7 ສະຫາຍ. ໂດຍການໃຫ້ກຽດຂຶ້ນປະດັບຫຼຽນໄຊຂອງສະຫາຍ ພົນເອກ ຄໍາລຽງ ອຸທະໄກສອນ ກໍາມະການກົມການເມືອງສູນການພັກ ລັດຖະມົນຕີກະຊວງປ້ອງກັນປະເທດແຫ່ງ ສປປ ລາວ.
 |
ໂອກາດນີ້, ສະຫາຍ ພົນເອກ ຄໍາລຽງ ອຸທະໄກສອນ ໄດ້ກ່າວມີຄໍາເຫັນວ່າ: ສຸດທີ່ມີຄວາມປິຕິຍິນດີ ແລະ ພາກພູມໃຈເປັນຢ່າງຍິ່ງ ທີ່ໄດ້ຕາງໜ້າໃຫ້ລັດຖະບານແຫ່ງ ສປປ ລາວ ກໍຄືກະຊວງປ້ອງກັນປະເທດ ໄດ້ເປັນກຽດປະດັບບັນດາຫຼຽນໄຊຂອງລັດຖະບານລາວ ແລະ ຂອງກະຊວງປ້ອງກັນປະເທດແຫ່ງ ສປປ ລາວ ໃຫ້ບັນດາກົມກອງລວມໝູ່ ແລະ ບຸກຄົນ ກົມໃຫຍ່ II ກະຊວງປ້ອງກັນປະເທດຫວຽດນາມ ທີ່ມີຜົນງານດີເດັ່ນໃນການປະສານສົມທົບຊ່ວຍເຫຼືອ ສະໜັບສະໜູນອັນໃຫຍ່ຫຼວງໃຫ້ພັກ, ລັດຖະບານ, ກອງທັບ ແລະ ປະຊາຊົນລາວຕະຫຼອດມາ, ການຍ້ອງຍໍໃນຄັ້ງນີ້ ບໍ່ພຽງແຕ່ຢູ່ໃນທ່າມກາງຜົນສໍາເລັດທີ່ ສສ ຫວຽດນາມ ຍາດມາໄດ້ຕະຫຼອດໄລຍະ 80 ປີ ແຫ່ງການສະຖາປະນາ ກໍຄືໃນທ່າມກາງບັນຍາກາດຂອງການສະເຫຼີມສະຫຼອງວັນມູນເຊື້ອກົມໃຫຍ່ II ກະຊວງປ້ອງກັນປະເທດ ແຫ່ງ ສສ ຫວຽດນາມ ຄົບຮອບ 80 ປີ ຊຶ່ງຕະຫຼອດໄລຍະ 80 ປີທີ່ຜ່ານມາ, ກົມໃຫຍ່ II ກະຊວງປ້ອງກັນປະເທດຫວຽດນາມ ໄດ້ເອົາໃຈໃສ່ໃນການປະຕິບັດໜ້າທີ່ ວິຊາສະເພາະຂອງຕົນຢ່າງມີຄວາມຮັບຜິດຊອບ ແລະ ມີຜົນສໍາເລັດຕະຫຼອດມາ.
 |
ໃນໂອກາດທີ່ມີຄວາມໝາຍ ຄວາມສໍາຄັນດັ່ງກ່າວ, ພັກ, ລັດຖະບານ, ກອງທັບ ແລະ ປະຊາຊົນລາວ ຂໍຈົດຈໍາບຸນຄຸນ ແລະ ຄຸນງາມຄວາມດີຂອງບັນດາສະຫາຍ ເຂົ້າໃນປຶ້ມປະຫວັດສາດໜ້າຄໍາຂອງ ສປປ ລາວ. ສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ຜົນງານທີ່ພວກສະຫາຍຍາດມາໄດ້ໃນຕະຫຼອດໄລຍະ 80 ປີທີ່ຜ່ານມາ. ຫວັງວ່າ: ກົມໃຫຍ່ II ກະຊວງປ້ອງກັນຊາດ ສສ ຫວຽດນາມ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອ ແລະ ປະສານສົມທົບກັບກະຊວງປ້ອງກັນປະເທດ, ກອງທັບປະຊາຊົນລາວ ເຮັດສຳເລັດໜ້າທີ່ການເມືອງຂອງຕົນ. ອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຮຸ້ນສ່ວນຍຸດທະສາດລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດລາວ-ຫວຽດນາມຈົ່ງໝັ້ນຄົງຂະໜົງແກ່ນຕະຫຼອດກາລະນານ.
 |
ຂ່າວ: ສົມພອນ
ຄໍາເຫັນ