ກະຊວງສາທາລະນະສຸກ ສະເໜີປັບປຸງກົດໝາຍວ່າດ້ວຍການປິ່ນປົວ

ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກໄດ້ຂຶ້ນສະເໜີກົດໝາຍວ່າດ້ວຍການປິ່ນປົວສະບັບປັບປຸງໃນວາລະກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ 15 ພະຈິກນີ້, ໂດຍການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ. 
ກົດໝາຍວ່າດ້ວຍການປິ່ນປົວໄດ້ກຳນົດຫຼັກການແລະ ມາດຕະການກ່ຽວກັບການຄຸ້ມຄອງ ແລະ ຕິດຕາມກວດກາວຽກງານປິ່ນປົວ ເພື່ອເຮັດໃຫ້ວຽກງານດັ່ງກ່າວມີຄຸນນະພາບ, ມີຄວາມປອດໄພ ແລະ ທັນສະໄໝ ຊຶ່ງກົດໝາຍດັ່ງກ່າວໄດ້ຖືກຮັບຮອງ ແລະ ປະກາດໃຊ້ໃນປີ 2005. ຜ່ານການນໍາໃຊ້ເຫັນວ່າຍັງມີບາງເນື້ອໃນບໍ່ທັນຄົບຖ້ວນ ແລະ ຍັງບໍ່ທັນກວມເອົາຫຼາຍໆໜ້າວຽກຂອງການປິ່ນປົວ; ສະນັ້ນ, ຈຶ່ງມີຄວາມຈຳເປັນຕ້ອງໄດ້ມີການປັບປຸງກົດໝາຍດັ່ງກ່າວໃຫ້ມີເນື້ອໃນຄົບຖ້ວນສົມບູນ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານປິ່ນປົວໃຫ້ມີຄຸນນະພາບ ສາມາດເຊື່ອມໂຍງກັບພາກພື້ນ ແລະ ສາກົນ.
ຮ່າງກົດໝາຍສະບັບນີ້ປະກອບມີ 9 ພາກ, 4 ໝວດ, 72 ມາດຕາ, ໃນນັ້ນປັບປຸງ 47 ມາດຕາເພີ່ມເຂົ້າໃໝ່ 1 ພາກ, 15 ມາດຕາ.ຄາດຄະເນຜົນໄດ້ຮັບດັ່ງນີ້:
1. ສາມາດຕິດຕາມ, ຄຸ້ມຄອງ ແລະ ກວດກາວຽກງານປິ່ນປົວທາງພາກລັດ ແລະ ເອກະຊົນໃຫ້ປະຕິບັດໜ້າທີ່ຂອງຕົນຢ່າງຖືກຕ້ອງ, ສອດຄ່ອງກັບລັດຖະທຳມະນູນ, ກົດໝາຍ ແລະ ນິຕິກໍາໃຕ້ກົດໝາຍ ປົກປ້ອງສິດ ແລະ ຜົນປະໂຫຍດຂອງຜູ້ໃຊ້ບໍລິການກໍຄືຄົນເຈັບ;
2. ສາມາດຍົກລະດັບວຽກງານການປິ່ນປົວ, ເຮັດໃຫ້ຕາໜ່າງສາທາລະນະສຸກໃນຂອບເຂດທົ່ວປະເທດ ນັບແຕ່ສູນກາງລົງຮອດທ້ອງຖິ່ນ ໄດ້ຮັບການຈັດຕັ້ງຢ່າງເປັນລະບົບຄົບຊຸດ, ຄ່ອງຕົວ, ມີປະສິດທິພາບ ແລະ ປະສິດທິຜົນ;
3. ແພດໝໍມີນໍ້າໃຈເສຍສະຫຼະ, ມີມະນຸດສະທຳ, ຈັນຍາທຳ ແລະ ຄຸນສົມບັດສິນທຳປະຕິວັດຊຶ່ງໄດ້ກຳນົດແຈ້ງຈັນຍາບັນຂອງຜູ້ປະກອບວິຊາຊີບປິ່ນປົວ ແລະ ຂໍ້ຫ້າມສຳລັບຜູ້ປະກອບວິຊາຊີບປິ່ນປົວ;
4. ຄຸ້ມຄອງບັນດາຫ້ອງກວດພະຍາດເອກະຊົນ ແລະ ສູນເສີມຄວາມງານ ທີ່ຖືກຕ້ອງທາງດ້ານການແພດໃຫ້ສາມາດຕິດຕາມກວດກາໄດ້ ລວມໄປເຖີງການອອກໃບອະນຸຍາດໃນການດໍາເນີນການ;
5. ປະກອບສ່ວນໃນການບັນລຸເປົ້າໝາຍພັດທະນາແບບຍືນຍົງ SDGs ຫຼຸດຜ່ອນອັດຕາການຕາຍຂອງແມ່ ແລະ ເດັກແລະ ເພີ່ມອັດຕາການເກີດລູກມີແພດຊ່ວຍ;
6. ກ້າວໄປສູ່ຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ.
ຂ່າວ: ຍຸພິນທອງ