 |
ສະຫາຍ ແກ້ວວັນໄຊ ສຸກແສນທອງ ຫົວໜ້າໂຮງຮຽນການເມືອງ ແລະ ການປົກຄອງແຂວງຄຳມ່ວນໄດ້ຜ່ານແຜນການຮຽນ-ການສອນ ລະບົບຮຽນທິດສະດີການເມືອງ ຂັ້ນກາງ ລະບົບ 4 ເດືອນ ຮຸ່ນທີ VI ເຊິ່ງຊຸດຮຽນດັ່ງກ່າວນີ້, ມີຈໍານວນນັກສຶກສາຈຳນວນທັງໝົດ 60ສະຫາຍ, ຍິງ 21ສະຫາຍເຊິ່ງປະກອບມີກຸ່ມວິຊາຮຽນຄື: ກຸ່ມວິຊາ ປັດຊະຍາມາກ-ເລນິນ ມີ 5 ບົດ, ລວມ 32 ຊົ່ວໂມງ, ກຸ່ມວິຊາ ເສດຖະສາດການເມືອງ ມາກ-ເລນິນ ມີ 8 ບົດ, ລວມ 51 ຊົ່ວໂມງ, ກຸ່ມວິຊາ ລັດທິສັງຄົມນິຍົມວິທະຍາສາດ ມີ 5 ບົດ, ລວມ 40 ຊົ່ວໂມງ, ແນວຄິດ ໄກສອນ ພົມວິຫານ ມີ 6 ບົດ, ລວມ 38 ຊົ່ວໂມງ, ກຸ່ມວິຊາປະຫວັດສາດພັກ ແລະ ກໍ່ສ້າງພັກ 9 ບົດ, ລວມ 53 ຊົ່ວໂມງ, ກຸ່ມວິຊາພື້ນຖານການຄຸ້ມຄອງບໍລິຫານລັດ 13 ບົດ, ລວມ 80 ຊົ່ວໂມງ, ກຸ່ມວິຊາບັງຄັບ ແລະ ຫົວຂໍ້ລາຍງານເພີ່ມ 28 ຊົ່ວໂມງ, ຂຽນບົດຈົບຂັ້ນ 50 ຊົ່ວໂມງ.
ຊຸດຮຽນຄັ້ງນີ້ ແນໃສ່ໃນການບຳລຸງທິດສະດີການເມືອງໃຫ້ພະນັກງານນໍາພາ-ຄຸ້ມຄອງ, ນາຍທະຫານ ແລະ ນາຍຕຳຫຼວດທີ່ພວມດຳລົງຕຳແໜ່ງບໍລິຫານ ປະເພດ 4 ເຖິງປະເພດ 6 ຢູ່ອົງການຈັດຕັ້ງພັກ-ລັດ ແລະ ອົງການຈັດຕັ້ງ ມະຫາຊົນ ຢູ່ສູນກາງ ແລະ ທ້ອງຖິ່ນ, ຍົກລະດັບຄວາມຮູ້, ຄວາມສາມາດດ້ານທິດສະດີການເມືອງ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ, ການຄຸ້ມຄອງ ຂອງລັດ, ເຮັດໃຫ້ຜູ້ເຂົ້າຮຽນມີແນວຄິດທັດສະນະຫຼັກໝັ້ນ ຊົນຊັ້ນກຳມະກອນ, ເຊື່ອໝັ້ນຕໍ່ການນໍາພາຂອງພັກ, ເຊື່ອໝັ້ນຕໍ່ອຸດົມການ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດ, ມີຄຸນສົມບັດສິນທຳປະຕິວັດ, ມີຄວາມຈົ່ງຮັກພັກດີຕໍ່ປະເທດຊາດ ຕໍ່ປະຊາຊົນ, ມີຄວາມຫ້າວຫັນເປັນແບບຢ່າງໃນການປະຕິບັດໜ້າທີ່ການເມືອງ ຂອງຕົນດ້ວຍຄວາມຮັບຜິດຊອບສູງ, ສ້າງພະນັກງານ-ລັດຖະກອນຢູ່ສູນກາງ ແລະທ້ອງຖິ່ນໃຫ້ມີຄຸນທາດການເມືອງໜັກແໜ້ນ, ມີລະດັບຄວາມຮູ້ ຄວາມສາມາດໃນການຄຸ້ມຄອງ ແລະຈັດຕັ້ງປະຕິບັດຕາມແນວທາງນະໂຍບາຍ ຂອງພັກ ໃຫ້ເກີດດອກ ອອກຜົນຢ່າງແທ້ຈິງ, ພ້ອມກັນນັ້ນ, ກໍເຮັດໃຫ້ພະນັກງານ-ລັດຖະກອນ ຮູ້ໝູນໃຊ້ຄວາມຮູ້ທາງດ້ານທິດສະດີ ການເມືອງເຂົ້າໃນວຽກງານທີ່ຕົນຮັບຜິດຊອບໃຫ້ມີປະສິດທິພາບສູງຂຶ້ນ.
ສະຫາຍອານຸພາບ ຕຸນາລົມ ໄດ້ເນັ້ນໃຫ້ ນັກສຶກສາ ຕ້ອງໄດ້ເອົາໃຈໃສ່ໃນການຄົ້ນຄວ້າຮໍ່າຮຽນຢ່າງຄົບຖ້ວນຕາມທີ່ ໂຮງຮຽນວາງອອກດ້ວຍການຮຽນແລະ ຮັບເອົາຄວາມຮູ້ຈາກຄູ-ອາຈານໂດຍສະເພາະໃນບັນດາວິຊາຮຽນຕ່າງໆ ຂອງໂຮງຮຽນນໍາມາສິດສອນນັ້ນ ໃຫ້ເຂົ້າໃຈແຈ້ງຕໍ່ບັນດາເນື້ອໃນ, ບັນດາວິຊາຮຽນຢ່າງຖືກຕ້ອງ, ຄົ້ນຄວ້າຮໍ່າຮຽນໃນຫ້ອງຮຽນກັບການຊອກຮູ້ບັນດາແຫຼ່ງຂໍ້ມູນ-ຂ່າວສານອັນໃໝ່, ຊອກຮູ້ດ້ານພຶດຕິກຳຕົວຈິງເພື່ອມາສົມທຽບໃສ່ທິດສະດີ, ສຶກສາຄົ້ນຄວ້າບັນດານິຕິກຳຕ່າງໆຂອງພັກ-ລັດ, ບົດຮຽນຈາກແຫຼ່ງ ຂໍ້ມູນຄວາມຮູ້ອື່ນໆ ເພື່ອໃຫ້ກາຍເປັນຜູ້ທີ່ມີຜົນການຮຽນທີ່ດີ-ຮຽນເກັ່ງ.
ຂ່າວ: ຄຳມ່ວນ
ຄໍາເຫັນ