ຄໍາມ່ວນ ເຊື່ອມຊຶມຄຳສັ່ງຄຳແນະນຳຂອງສູນກາງພັກ 

ກອງປະຊຸມເຊື່ອມຊຶມ ແລະ ຜັນຂະຫຍາຍຄຳສັ່ງ, ຄຳແນະນຳ ຂອງສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ໄດ້ຈັດຂຶ້ນໃນວັນທີ 6 ພະຈິກ ນີ້ ທີ່ສະໂມສອນຫຼັກ 4 ໂດຍພາຍໃຕ້ການເປັນປະທານຂອງສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ, ມີບັນດາສະຫາຍໃນຄະນະບໍລິຫານງານພັກແຂວງ, ຄະນະປະຈຳພັກກອງບັນຊາການ ປກຊ-ປກສ ແຂວງ, ເລຂາຄະນະພັກຮາກຖານ ແລະ ເລຂາໜ່ວຍພັກອ້ອມຂ້າງແຂວງເຂົ້າຮ່ວມ.
ໃນວາລະກອງປະຊຸມແມ່ນໄດ້ພ້ອມກັນຄົ້ນຄວ້າ, ເຊື່ອມຊຶມ ກ່ຽວກັບຄໍາສັ່ງຂອງຄະນະເລຂາທິການສູນກາງພັກ ເລກທີ 411/ຄລສພ, ຄຳແນະນຳຂອງຄະນະຈັດຕັ້ງສູນກາງພັກ ເລກທີ 211/ຄຈສພ, ລົງວັນທີ 16 ສິງຫາ 2023 ກ່ຽວກັບການຈັດຕັ້ງປະຕິບັດຄຳສັ່ງຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່3 ຂັ້ນຂອງພັກ, ຄຳແນະນຳຂອງຄະນະປະຈຳພັກແຂວງຄຳມ່ວນ ເລກທີ 14/ຄປຈ, ກ່ຽວກັບການກະກຽມຈັດຕັ້ງດຳເນີນກອງປະຊຸມໃຫຍ່ອົງຄະນະພັກເມືອງ, ຄະນະພັກກອງບັນຊາການທະຫານແຂວງ, ຄະນະພັກກອງບັນຊາການປ້ອງກັນຄວາມສະຫງົບແຂວງ, ຄະນະພັກຮາກຖານ ແລະ ໜ່ວຍພັກຮາກຖານ ໃນທົ່ວແຂວງຄຳມ່ວນ, ຄຳແນະນຳ ຂອງຄະນະກວດກາສູນກາງພັກ ເລກທີ 285/ຄກສພກ່ຽວກັບການກະກຽມ ແລະ ດຳເນີນຊີວິດການເມືອງທ້າຍສະໄໝກອງປະຊຸມໃຫຍ່ 3 ຂັ້ນຂອງພັກ, ມະຕິຂອງກົມການເມືອງສູນກາງພັກ ເລກທີ 13/ກມສພວ່າດ້ວຍການເລືອກເຟັ້ນແຕ່ງຕັ້ງ, ສັບປ່ຽນໜ້າທີ່ພະນັກງານນຳພາ-ຄຸ້ມຄອງ ແລະ ເອກະສານທີ່ກ່ຽວຂ້ອງອີກຈໍານວນໜຶ່ງ.
ນອກນັ້ນກອງປະຊຸມຍັງໄດ້ຮັບຟັງການປະກອບຄໍາຄິດ, ຄໍາເຫັນຈາກບັນດາສະຫາຍຜູ້ແທນທີ່ເຂົ້າຮ່ວມ ເພື່ອສ້າງຄວາມເປັນເອກະພາບ ໃນການນຳພາ-ຊີ້ນຳ ກອງປະຊຸມໃຫຍ່ຂອງແຂວງ, ເມືອງ ແລະ ຮາກຖານພັກ ໃຫ້ຖືກຕ້ອງຕາມລະບຽບການຂອງພັກ ແນໃສ່ເຮັດໃຫ້ບັນລຸຕາມຈຸດປະສົງ ແລະ ຄາດໝາຍທີ່ກຳນົດໄວ້ ເປັນຕົ້ນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ຮັບປະກັນການກໍ່ສ້າງພັກຕາມ 5 ຫຼັກການ ແລະ 3 ທິດນໍາຂອງພັກ, ຖືກຕ້ອງຕາມກົດລະບຽບພັກ, ເພີ່ມທະວີຄວາມສາມັກຄີເປັນປຶກແຜ່ນ, ຍົກສູງຄວາມສາມາດ ແລະ ກໍາລັງແຮງສູ້ຮົບຂອງການຈັດຕັ້ງພັກ, ເສີມຂະຫຍາຍປະຊາທິປະໄຕ, ເຊີດຊູສະຕິປັນຍາ, ຄວາມຮັບຜິດຊອບຂອງຄະນະພັກແຕ່ລະຂັ້ນ ແລະ ບັນດາອົງການຈັດຕັ້ງ ໃນລະບົບການເມືອງ,ເປັນການກວດກາ, ຕີລາຄາຄືນ ການຜັນຂະຫຍາຍມະຕິກອງປະຊຸມຂອງພັກແຕ່ລະຂັ້ນ, ແຜນພັດທະນາເສດຖະກິດ-ສັງຄົມ 5 ປີຜ່ານມາ ໃຫ້ສອດຄ່ອງກັບຄວາມເປັນຈິງ, ພາວະວິໄສ, ຮອບດ້ານ, ສາມາດນໍາໄປຈັດຕັ້ງປະຕິບັດໄດ້ ແລະ ເພື່ອຄັດເລືອກບຸກຄະລາກອນທີ່ມີມາດຕະຖານ, ເງື່ອນໄຂຕາມທີ່ກໍານົດໄວ້ ປະກອບເຂົ້າໃນການຈັດຕັ້ງແຕ່ລະຂັ້ນ ໃນລະບົບການເມືອງ ເພື່ອບຸກທະລຸ ການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ຕໍ່ວຽກງານພະນັກງານ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງ ໃນໄລຍະໃໝ່ ແລະ ເພື່ອສ້າງຄວາມເຊື່ອໝັ້ນ, ຄວາມສັດທາຂອງມະຫາຊົນຕໍ່ການນໍາພາຂອງຄະນະພັກແຕ່ລະຂັ້ນ.
ຂ່າວ-ພາບ: ກອງຄຳ