ຄະນະກວດກາສູນກາງພັກ ແລະ ອົງການກວດກາແຫ່ງລັດ ເຊື່ອມຊຶມ ເອກະສານກອງປະຊຸມໃຫຍ່ຄັ້ງທີ XII ຂອງພັກ

ໃນພິທີດັ່ງກ່າວນີ້, ສະຫາຍ ວັນໄຊ ພອງສະຫວັນ ໄດ້ກ່າວວ່າ: ການເຜີຍແຜ່ເຊື່ອມຊຶມເອກະສານ ເນື້ອໃນມະຕິກອງປະຊຸມໃຫຍ່ ຄັ້ງທີ XII ຂອງພັກ ໃນຄັ້ງນີ້ ແມ່ນຖືວ່າມີຄວາມໝາຍຄວາມສໍາຄັນທີ່ສຸດ ແລະ ຖືວ່າເປັນຄວາມຮັບຜິດຊອບການເມືອງອັນສູງສຸດ ຂອງບັນດາສະມາຊິກພັກ-ພະນັກງານ ໃນການຄົ້ນຄວ້າກໍາແໜ້ນມະຕິດັ່ງກ່າວ ໃຫ້ມີຄວາມຮັບຮູ້, ຄວາມເຂົ້າໃຈ, ມີຄວາມເປັນເອກະພາບສູງ ແລະ ຄົ້ນຄວ້າຜັນຂະຫຍາຍແນວທາງນະໂຍບາຍຂອງພັກ ເຂົ້າສູ່ການຈັດຕັ້ງປະຕິບັດໃຫ້ປະກົດຜົນເປັນຈິງ. ພ້ອມກັນນັ້ນ, ຍັງເປັນການຫວນຄືນປະຫວັດຕົ້ນກໍາເນີດ, ການເຕີບໃຫຍ່ຂະຫຍາຍຕົວ ຂອງພັກປະຊາຊົນປະຕິວັດລາວ ໃນແຕ່ລະໄລຍະ ແລະ ລະນຶກເຖິງມູນເຊື້ອຄວາມພິລະອາດຫານ ຂອງປະຊາຊົນລາວບັນດາເຜົ່າ ໃນການຕໍ່ສູ້ກູ້ຊາດ ຍາດເອົາເອກະລາດຈາກຈັກກະພັດຜູ້ຮຸກຮານ ຈົນສາມາດປົດປ່ອຍປະເທດຊາດໄດ້ຢ່າງສົມບູນ. ຫຼັງຈາກນັ້ນ, ສະຫາຍ ຄຳໄຫຼ ສີປະເສີດ ກຳມະການສູນກາງພັກ ຮອງເລຂາຄະນະພັກ ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ໄດ້ໃຫ້ກຽດເຜີຍແຜ່ເອກະສານ ຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການຈັດຕັ້ງເຊື່ອມຊຶມ ແລະ ຜັນຂະຫຍາຍ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ ແລະ ເຜີຍແຜ່ເອກະສານ ເນື້ອໃນຈິດໃຈສຳຄັນຂອງໂຄງການການເມືອງຂອງພັກປະຊາຊົນປະຕິວັດລາວ ແລະ ເນື້ອໃນຈິດໃຈສຳຄັນຂອງ ບົດລາຍງານການເມືອງຕໍ່ກອງປະຊຸມໃຫຍ່ ຄັ້ງທີ XII ຂອງພັກປະຊາຊົນປະຕິວັດລາວ. ຈາກນັ້ນ, ສະຫາຍ ນາງ ປິ່ງຄຳ ລາຊະສິມມາ ກຳມະການສູນກາງພັກ, ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ກໍໄດ້ເຜີຍແຜ່ເອກະສານ ແຜນພັດທະນາເສດຖະກິດສັງຄົມ 5 ປີ ຄັ້ງທີ X(2026-2030) ແລະສະຫາຍ ຄຳສຸກ ອອຍຍະວົງ ຮອງປະທານຄະນະກວດກາສູນກາງພັກ ຮອງປະທານອົງການກວດກາແຫ່ງລັດ ແລະ ຮອງຫົວໜ້າອົງການຕ້ານການສໍ້ລາດບັງຫຼວງສູນກາງ ຍັງໄດ້ເຜີຍແຜ່ ເອກະສານ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 71 ປີ (22 ມີນາ 1955 - 22 ມີນາ 2026) ແລະ ເອກະສານວັນນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 80 ປີ. ພ້ອມກັນນີ້, ໃນກອງປະຊຸມຍັງໄດ້ຜັດປ່ຽນກັນປະກອບຄຳເຫັນໃສ່ເອກະສານທີ່ຕິດພັນກັບວຽກງານກວດກາ.

ໃນຕອນທ້າຍຂອງກອງປະຊຸມ, ສະຫາຍ ວັນໄຊ ພອງສະຫວັນ ໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງສະຫາຍໄດ້ເນັ້ນ ບັນດາສະຫາຍເລຂາໜ່ວຍພັກຈົ່ງສັບຊ້ອນເວລານຳເອົາເອກະສານໃນມື້ນີ້ໄປເຜີຍແຜ່ຄືນໃຫ້ສະມາຊິກຂອງຕົນເພື່ອໃຫ້ກຳໄດ້ບັນດາເນື້ອໃນທີ່ສຳຄັນ; ໂດຍສະເພາະແມ່ນກ່ຽວກັບວຽກງານກວດກາພັກ, ກວດກາລັດ ແລະ ວຽກງານຕ້ານການສໍ້ລາດບັງຫຼວງກໍເປັນວຽກງານຍຸດທະສາດທີ່ສຳຄັນໜຶ່ງໃນການຊຸກຍູ້ຜັກດັນເພື່ອເຮັດໃຫ້ພັກ-ລັດມີຄວາມເຂັ້ມແຂງ,ເພື່ອເຮັດໃຫ້ປະເທດຊາດມີຄວາມໝັ້ນຄົງ ແລະ ຂະຫຍາຍຕົວ, ວຽກງານກວດກາເປັນວຽກທີ່ຕັດສິນເຖິງຄວາມໝັ້ນຄົງຂອງປະເທດຊາດ, ເປັນເຄື່ອງມືໜຶ່ງໃນການປົກປ້ອງພັກ ເພື່ອຮັບປະກັນໃຫ້ພັກມີຄວາມປອດໃສເຂັ້ມແຂງ, ຖ້າເຮົາເຮັດວຽກງານກວດກາໄດ້ດີກໍຈະເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມມີການເຕີບໂຕເພາະຈະສ້າງຄວາມເຊື່ອໝັ້ນໃຫ້ນັກລົງທຶນທັງພາຍໃນ ແລະ ຕ່າງປະເທດ. ພ້ອມນັ້ນກໍເນັ້ນໃຫ້ວຽກງານກວດກາຕ້ອງຫັນເປັນທັນສະໄໝ ເພື່ອຮັບປະກັນຄວາມວ່ອງໄວ, ຊັດເຈນ ແລະ ຖືກຕ້ອງ, ສຳລັບພະນັກງານຜູ້ທີ່ເຮັດວຽກງານກວດກາກໍຕ້ອງຝຶກຝົນຫຼໍ່ຫຼອມຕົນເອງໃຫ້ມີຄວາມສາມາດ ເພື່ອເຮັດໃຫ້ການເຄື່ອນໄຫວວຽກງານມີປະສິດທິພາບ ແລະ ປະສິດທິຜົນຂຶ້ນເລື້ອຍໆ.

(ຂ່າວ: ທ. ຕູ່ ນ່າ)