ຄະນະຜູ້ແທນຂັ້ນສູງ ຄະນະກວດກາສູນກາງພັກ ສຳເລັດການຢ້ຽມຢາມ ສປ ຈີນ 

ໂດຍປະຕິບັດຕາມການເຊື້ອເຊີນຂອງ ຄະນະພົວພັນຕ່າງປະເທດສູນກາງພັກກອມມູນິດຈີນ ແລະ ປະຕິບັດຕາມແຜນການຮ່ວມມືປະຈຳປີຂອງສອງພັກ ກໍຄືສອງອົງການກວດກາພັກ-ລັດ ລາວ-ຈີນ ແລະ ເພື່ອຜັນຂະຫຍາຍເນື້ອໃນຈິດໃຈທີ່ເປັນເອກະພາບຂອງການນໍາສູງສຸດສອງພັກ-ສອງລັດ, ທັງເປັນການປະກອບສ່ວນສຳຄັນເຂົ້າໃນການປະຕິບັດເນື້ອໃນແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາລາວ-ຈີນ ລະຫວ່າງ ພັກປະຊາຊົນປະຕິວັດລາວ ກັບ ພັກກອມມູນິດຈີນ (ປີ 2024 - 2028) ກ່ຽວກັບການສືບຕໍ່ເພີ່ມທະວີການພົວພັນຮ່ວມມືໃນຂົງເຂດວຽກງານຕິດຕາມ, ກວດກາ ຂອງສອງອົງການກວດກາພັກ-ລັດ ລາວ-ຈີນ. ໃນລະຫວ່າງວັນທີ 5-9 ທັນວາ 2023, ຄະນະຜູ້ແທນຂັ້ນສູງ ຂອງຄະນະກວດກາສູນກາງພັກ ນຳໂດຍ ສະຫາຍ ຄຳພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານ ຄະນະກວດກາສູນກາງພັກ, ປະທານ ອົງການກວດກາແຫ່ງລັດ ແລະ ຫົວໜ້າ ອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສປ ຈີນ. 
    ໃນການເຄື່ອນໄຫວຢ້ຽມຢາມແລະເຮັດວຽກຢູ່ສປຈີນຄັ້ງນີ້ໄດ້ພົບປະແລກປ່ຽນບົດຮຽນລະຫວ່າງສອງຄະນະກວດກາ, ຝ່າຍລາວ ໄດ້ແຈ້ງໂດຍຫຍໍ້ຜົນສໍາເລັດອັນພົ້ນເດັ່ນໃນໄລຍະກາງສະໄໝການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ XI ຂອງພັກ ໂດຍສະເພາະໃນການເຄື່ອນໄຫວວຽກງານຕິດຕາມ-ກວດກາ ແລະ ການຕ້ານການສໍ້ລາດບັງຫຼວງ, ລວມທັງການຕິດຕາມ, ກວດກາຄວາມປອດໃສຂອງໂຄງການທາງລົດໄຟລາວ-ຈີນໃຫ້ຝ່າຍຈີນ ຊາບ. ຈາກນັ້ນ, ຝ່າຍຈີນ ໄດ້ຕີລາຄາສູງຕໍ່ການຢ້ຽມຢາມເຮັດວຽກຂອງຝ່າຍລາວ ແລະ ໄດ້ແຈ້ງສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XX ຂອງພັກກອມມູນິດຈີນ, ສະພາບກ່ຽວກັບການເຄື່ອນໄຫວວຽກງານກວດກາລະບຽບວິໄນຂອງພັກ, ກວດກາລັດ ແລະ ຕ້ານການສໍ້ລາດບັງຫຼວງ, ການຮ່ວມມືສາກົນເສັ້ນທາງສາຍໄໝປອດໃສຂາວສະອາດ “ໜຶ່ງແລວໜຶ່ງເສັ້ນທາງ” ແລະ ບັນຫາການກໍ່ສ້າງພັກໃນຍຸກສະໄໝໃໝ່. ສໍາລັບວຽກງານກວດກາ ຝ່າຍຈີນ ແມ່ນເນັ້ນໃສ່ວຽກງານຕ້ານການສໍ້ລາດບັງຫຼວງຕິດພັນກັບການດຳເນີນການຄຸ້ມຄອງລະບຽບວິໃນພັກເຂັ້ມງວດຮອບດ້ານ ແລະ ການກໍ່ສ້າງພັກແບບ ແຜນປອດໃສຂາວສະອາດ. 
    ຜ່ານການຢ້ຽມຢາມຄັ້ງນີ້ທັງສູນກາງ ແລະ ທ້ອງຖິ່ນ ຝ່າຍຈີນ ແມ່ນໃຫ້ການຕ້ອນຮັບຢ່າງອົບອຸ່ນ, ໃຫ້ຄວາມສຳຄັນ ແລະ ມີຄວາມຈິງໃຈແລກປ່ຽນບົດຮຽນ ໃຫ້ຄະນະຜູ້ແທນຄະນະກວດກາສູນກາງພັກ. ເຊິ່ງໃນການພົບປະກັນຄັ້ງນີ້ສອງຝ່າຍເປັນເອກະພາບກັນໃນການສືບຕໍ່ພົວພັນຮ່ວມມືນຳກັນໃນຕໍ່ໜ້າເປັນປົກກະຕິ ທັງໃນລະດັບຄະນະຜູ້ແທນຂັ້ນສູງ ແລະ ລະດັບວິຊາການ; ສືບຕໍ່ຮ່ວມມືການຕິດຕາມ, ກວດກາຄວາມປອດໃສໃນໄລຍະດຳເນີນກິດຈະການຂອງລົດໄຟລາວ-ຈີນ, ລົງເລິກການຮ່ວມມືດ້ານກົດໝາຍຕ້ານການສໍ້ລາດບັງຫຼວງ, ການນຳຫາຜູ້ກະທຳຜິດທີ່ຫລົບໜີໄປຢູ່ຕ່າງປະເທດ ແລະ ການນໍາຄືນຊັບສິນທີ່ເສຍຫາຍຈາກການສໍ້ລາດບັງຫຼວງ; ເພີ່ມທະວີການປຶກສາຫາລື, ປະສານສົມທົບໃນຂອບ ‘‘ສົນທິສັນຍາວ່າດ້ວຍການຕ້ານການສໍ້ລາດບັງຫລວງຂອງສະຫະປະຊາຊາດ’’, ຂອບ ຈີນ-ອາຊຽນ ແລະ ຂອບການຮ່ວມມືຫຼາຍຝ່າຍ.ພ້ອມນີ້, ຝ່າຍຈີນ ເຫັນດີຈະໃຫ້ການຊ່ວຍເຫຼືອໃນການຈັດຝຶກອົບຮົມພະນັກງານກວດກາດ້ານເຕັກນິກ ແລະ ສະໜັບສະໜູນອຸປະກອນຮັບໃຊ້ທີ່ຈໍາເປັນໃນການເຄື່ອນໄຫວວິຊາສະເພາະຂອງຄະນະກວດກາພັກ-ລັດຕາມສະພາບເງື່ອນໄຂຕົວຈິງ.
ຂ່າວ: ກວດກາສູນກາງພັກ