ການພົບປະສອງຝ່າຍກັນໃນຄັ້ງນີ້ ເປັນຂີດໝາຍສຳຄັນ ໃນການສືບຕໍ່ ເສີມຂະຫຍາຍສາຍພົວພັນຮ່ວມມືແນໃສ່ຊຸກຍູ້ຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນ ເພື່ອພັດທະນາຂະແໜງການກວດສອບແຫ່ງລັດຂອງສອງປະເທດ ໃຫ້ກ້າວໜ້າຢ່າງບໍ່ຢຸດຢັ້ງ, ທັງເປັນການປະກອບສ່ວນອັນສຳຄັນເຂົ້າໃນການຜັນຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດກໍຄືການເສີມຂະຫຍາຍສາຍພົວພັນທາງການທູດ ຄົບຮອບ 71 ປີ (5/3/1955-5/3/2026).
ການເຄື່ອນໄຫວພົບປະຢ້ຽມຢາມຄັ້ງນີ້ ແມ່ນມີວາລະການເຄື່ອນໄຫວຄື: ໄດ້ມີກອງປະຊຸມພົບປະສອງຝ່າຍ ລະຫວ່າງຄະນະຜູ້ແທນອົງການກວດສອບແຫ່ງລັດ ສປປ ລາວ ແລະ ຄະນະຜູ້ແທນສະພາກວດສອບປະເທດຍີ່ປຸ່ນ ຊຶ່ງໃນກອງປະຊຸມໄດ້ປຶກສາຫາລືວຽກງານດ້ວຍບັນຍາກາດອົບອຸ່ນໄມຕີຈິດ ຊຶ່ງສອງຝ່າຍໄດ້ແຈ້ງກ່ຽວກັບສະພາບການພັດທະນາເສດຖະກິດ-ສັງຄົມ ແລະ ການເຄື່ອນໄຫວທີ່ພົ້ນເດັ່ນຂອງວຽກງານການກວດສອບໄລຍະຜ່ານມາ ແລະ ທິດທາງເເຜນການໃນຕໍ່ໜ້າ ຄື:
1) ສືບຕໍ່ແລກປ່ຽນການພົບປະ-ຢ້ຽມຢາມ ສອງຝ່າຍໃນລະດັບການນໍາຂັ້ນສູງ ຂອງສອງອົງການກວດສອບແຫ່ງລັດ ຢ່າງປົກກະຕິ;
2) ສືບຕໍ່ແລກປ່ຽນບົດຮຽນສ້າງຄວາມເຂັ້ມແຂງດ້ານວິຊາສະເພາະໃຫ້ນັກກວດສອບ ໃຫ້ຫົວຂໍ້ທີ່ສອງຝ່າຍມີຄວາມສົນໃຈ ເປັນຕົ້ນ: ການນຳໃຊ້ປັນຍາປະດິດເຂົ້າໃນການກວດສອບ
ພ້ອມດຽວກັນນັ້ນ, ຄະນະຜູ້ແທນສອງຝ່າຍຍັງໄດ້ແລກປ່ຽນບົດຮຽນທາງດ້ານວິຊາການໃນຫົວຂໍ້: 1). ບົດບາດສະພາກວດສອບປະເທດຍີ່ປຸ່ນໃນການສ້າງ ແລະ ການພິຈາລະນາ ແຜນງົບປະມານແຫ່ງລັດ ແລະ 2). ບົດຮຽນການກວດສອບຂະແໜງການໂທລະຄົມ ແລະ ການສື່ສານ.
ພ້ອມນັ້ນ, ຄະນະຜູ້ແທນອົງການກວດສອບແຫ່ງລັດ ນໍາໂດຍ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ພ້ອມດ້ວຍຄະນະ ເດີນທາງໄປຢ້ຽມຢາມ ແລະ ເຮັດວຽກຮ່ວມກັບສູນຝຶກອົບຮົມວຽກງານກວດສອບ ຢູ່ເມືອງອັນນະກະ ປະເທດຢີ່ປຸ່ນ. ການຢ້ຽມຢາມໃນຄັ້ງນີ້ ເປັນຂີດໝາຍອັນສຳຄັນໃນການລິເລີ່ມການຮ່ວມມື ລະຫວ່າງ ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ສປປ ລາວ ແລະ ສູນຝຶກອົບຮົມວຽກງານກວດສອບ ຍີ່ປຸ່ນ.
(ຂ່າວ: ກວດສອບແຫ່ງລັດ)
ຄໍາເຫັນ