ຄະນະສື່ມວນຊົນ ຄະນະໂຄສະນາອົບຮົມສູນກາງພັກ (ຄອສພ) ນໍາໂດຍ ທ່ານ ນາງ ສິມມະນີ ແກ້ວແກ່ນ ຜູ້ອໍານວຍການໃຫຍ່ວິທະຍຸກະຈາຍສຽງແຫ່ງຊາດລາວ (ວສລ), ໄດ້ນໍາພາຄະນະສື່ມວນຊົນ ພ້ອມດ້ວຍ 3 ອົງການຈັດຕັ້ງມະຫາຊົນ ຄອສພ ຢ້ຽມຊົມຫໍມູນເຊື້ອແນວລາວສ້າງຊາດ ຢູ່ບ້ານຊຽງຢືນ ເມືອງຈັນທະບູລີ ນະຄອນຫຼວງວຽງຈັນ ໃນວັນທີ 27 ສິງຫານີ້ ເພື່ອສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 76 ປີ (13 ສິງຫາ 1950 – 13 ສິງຫາ 2026), ໂດຍ ທ່ານ ນາງ ແພງພັນ ບຸບຜາພອນ ຫົວໜ້າກົມໂຄສະນາ ສູນກາງແນວລາວສ້າງຊາດ (ສນຊ) ພ້ອມຄະນະ ໃຫ້ການຕ້ອນຮັບ.
ໂອກາດນີ້, ທ່ານ ນາງ ແພງພັນ ບຸບຜາພອນ ຍັງໄດ້ຍົກໃຫ້ເຫັນປະຫວັດຄວາມເປັນມາ, ມູນເຊື້ອອັນສະຫງ່າລາສີ ແລະ ຜົນງານທີ່ພົ້ນເດັ່ນໃນແຕ່ລະໄລຍະ ເລີ່ມແຕ່ປີ 1950-1956 ແນວລາວອິດສະຫຼະ; ປີ 1956-1979 ແນວລາວຮັກຊາດ; ປີ 1979 - ປັດຈຸບັນ ແນວລາວສ້າງຊາດ. ພ້ອມນັ້ນ, ກໍໄດ້ຢ້ຽມຊົມວັດຖຸພັນ, ຮູບພາບທີ່ກ່ຽວຂ້ອງ ຊຶ່ງສະແດງເຖິງປະຫວັດຄວາມເປັນມາ, ມູນເຊື້ອອັນສະຫງ່າລາສີ ແລະ ຜົນງານທີ່ພົ້ນເດັ່ນໃນແຕ່ລະໄລຍະດັ່ງກ່າວ.
ການຢ້ຽມຊົມຫໍມູນເຊື້ອແນວລາວສ້າງຊາດຄັ້ງນີ້ ເພື່ອໃຫ້ຄະນະສື່ມວນຊົນ ພ້ອມດ້ວຍ 3 ອົງການຈັດຕັ້ງມະຫາຊົນ ຄອສພ ໄດ້ເຊື່ອມຊຶມ ແລະ ເຂົ້າໃຈແຈ້ງເຖິງມູນເຊື້ອປະຫວັດສາດຄວາມເປັນມາແຫ່ງການກຳເນີດ ແລະ ການເຕີບໃຫຍ່ຂະຫຍາຍຕົວຂອງແນວລາວອິດສະຫຼະ, ແນວລາວຮັກຊາດ ແລະ ແນວລາວສ້າງຊາດ ຕະຫຼອດ 76 ປີຜ່ານມາ ຕິດພັນກັບພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມນີ້, ເພື່ອໃຫ້ຄົນຮຸ່ນຫຼັງໄດ້ຮັບຮູ້ຂໍ້ມູນ ແລະ ມູນເຊື້ອພິລະອາດຫານຂອງບັນດາທ່ານຜູ້ນຳຂອງການປະຕິວັດລາວ ທີ່ໄດ້ເສຍສະຫຼະຊີວິດເລືອດເນື້ອ ເພື່ອພາລະກິດລວມຂອງປະເທດຊາດ ຊຶ່ງໄດ້ກາຍເປັນບົດຮຽນອັນລ້ຳຄ່າໄວ້ໃຫ້ຄົນຮຸ່ນຫຼັງໄດ້ຮຽນຮູ້ ແລະ ເອົາເປັນແບບຢ່າງ.
ໂອກາດນີ້, ຍັງໄດ້ເຂົ້າຮ່ວມກິດຈະກຳຖາມ-ຕອບ ເພື່ອຮັບຂອງທີ່ລະນຶກຈາກຄະນະຮັບຜິດຊອບຂອງອະນຸກຳມະການໂຄສະນາ-ຂະບວນການ ແລະ ຍ້ອງຍໍ ສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 76 ປີ. ຫໍມູນເຊື້ອແນວລາວສ້າງຊາດ ໄດ້ເປີດນໍາໃຊ້ຢ່າງເປັນທາງການໃນວັນທີ 13 ກໍລະກົດ ປີ 2020.
(ຂ່າວ-ພາບ: ວັນເພັງ)
ຄໍາເຫັນ